Mede, ce koe kanang’s kali de tuang pastor ce’e tana dite. Toe manga do neho uwa ho’od.
Toe manga tuang pastor ata ici tana. Tuang pe’ang mai tana pe’ang kanang.
Tuang pe’ang mai situ ata loke bakok kanang. Manga ata jage lewed. Manga ata toed. Weki langkas. Toe manga ata mpehak. Isung mongko. Tatok keta. Co’ob tonggong neho golo ketas. Toe keta manga cengatan ata lempe.
Tuang situ toe pecing curup melaju. Apan kole curup kampong dite. Curup Manggarai. Toe pecing lise. Cengata-cengatan kali ata pecing.
Asa nuk kin lite Tuang Verheijen, SVD. Pecing hia curup Manggarai. Cewe hia kole pecing po itet ici tana. Manga dedek buku kamus hia. Kamus curup Manggarai-Indonesia.
Maik cewe do ata toe pecing curup Manggarais tuang situ.
Itu taran nggo’on ga, eme cai ce’e tana dites, laring cain keta olong nungku curup melajus di.
Manga ata linggang pecing melaju. Manga kole ata remon keta di wa po pecing.
Itet ici tana ga do kid ata toe pecing curup melaju. Cewen keta ata tu’a so.
Ata sot pecing melaju de ata laseng donde cumang agu campe tuang.
Manga ata teti ciri guru gama laing’s le tuang. Manga kole ata teti kut campe liwing jarang de tuang.
Jarang situ de ling oto ko motor danong. Ai toe di mangas oto agu motor neho uwa ho’o.
Eme ngo la’at weki serani neteng beo ko stasi tuang pastor leti jarang.
Can jarang te leti de tuang. Can ga kut tekek mendo.
Jarang leti laseng pile ata di’a keta medak’n. Letet keta. Lapeng di’a le sela one wekur jarang. One sela hitu lonton tuang.
Tuang ga cuki deko lewe. Sepatu one wa’in. Jongkong mese genggel eta sa’in kut tadu cekoen leso ko usang rete.
Jarang hitu ca ga tekek mendo de tuang. Na’a one peti belek. Can ce cupu. Nggitu kole cupu can. Camas mendod. Boto mendo doa.
Eme lako jarang tekek hitu rangkukak-rangkukak runing peti. Bae lata eme dengen runing nenggitu. Jarang de tuang hitu.
Denge deit laku tombo data. Ca leso ngo la’at weki serani one ca stasi tuang pastor.
Cai one ca satar mambak. Bea keta. Di’a medak de jarang o letet keta. Tuktak, tuktak, tuktak … runing wa’i de jarang eme medak.
One satar hitu penong jarang oka. Jarang laki manga. Jarang kina kole manga. Manga ata reme mokang koed.
Remon wa ga. Ita kaut jarang kina, jarang de tuang ga ngkihir diha ko nukung keta.
Bo reme nggitun medak kin jarang hitu. Hema kin tuang hot letin. Itu kali holong-holong tuang eta lobo jarang’n hitu. Senang le sesol keta buru koe. Cait tik keta leso one tana biring.
Calak noing le tuang ga kali do ketas jarang kina bolo mai tara lako diha. Ita kaut jarang kina situ jarang de tuang tendi keta mburuk. Ngo kudu jarang situ.
Neho weter tuang. Nukung poto agu wi’uk le tuang rapa jarang hitu. De … ngance apan liha. Woko megi keta tuang poto rapa lorong di le jarang. Woko temo kaut cekoen tuang, mburuk kole jarang.
Haeng ca jarang kina le jarang leti de tuang. Toe rempe-rempe gelang-gelang tuke liha jarang kina hitu. Beta lobo jarang hitu kin tuang.
Ciek ide tuang. Mai taen, “E Kuda, kuda, jangan begitu. Kau bikin dosa pastor.” (E jarang, jarang, asi pande nggitu e. Hau pande ndekok tuang) hehehehe ….
Du ca leso ge sen. Tuang pastor reke aku guru gama. Ketua kelompok te ho’on ga. Manga kole ata caro ketua KBG (Komunitas Basis Gerejawi).
Reke de tuang ga nggo’o, curup melaju, “Bapa guru agama, sebentar sore jam tiga saya kunjung kamu di rumahmu ya.” (Kraeng guru agama, to’ong mane ongga telu aku lejong one mbaru dite).
Senang tu’ung keta nain kraeng guru gama hitu. “Baik Pater, kami tunggu di rumah.” (Delek tuang ami gereng sili mbaru to’ong mane).
Cai one mbarun kraeng guru gama ge tombo agu hae kilon. “Ende Lalong, mai lejong ce’e to’ong mane tuang e.”
“Nggitun a. Ongga pisa to’ong Ema Lalong?” Rei de Ende Lalong.
“Bo taen e ongga telu. Lelon kaut tong. Teneng kid lite tete.” Nggitu wale’d Ema Lalong.
Remo nais gereng le guru gama agu hae kilon. Toe tara cai tuang. Mame moles tete ga.
Mai jauk de guru gama, “Ole toe tara cai tuang ho’o e. Lage mole ongga telu ho’o ga. Cait nanang ngo tei wae sili sawa kaku mane ho’o.”
Main wanti de hae kilon, “Ta Ema Lalong gereng kaut di. Am manga do’ong tuang.
Remon wa ga. Ongga pat ga. Mai tae di guru gama, “Ende Lalong, aku ngo sili sawa cekoen ta. Ai bom tadang koen. Mburuk mole kaut aku ho’o silin. Kut gelang cai sili.”
“Eng damang ga. Nggitu kaut gi. Maik asi di ce koen. Aku manga rei ce koen.” Nggitu wantil de Ende Lalong.
Kali wa nain hi Ende Lalong ho’o rantang’y. Co’o keta eme cai tuang to’ong. Co’o laku reis’n. Bom pecing melaju kaku. Tuang ga toe pecing curup Manggarai.
“E wan de rei dite hitu. Gelang kali ga.” Wale’d kraeng guru gama.
Itu kali main sili mai dapur hi Ende Lalong ga. Mai rein, “Apa melajun acu?”
Wale le guru gama, “Kali rei hitu. Anjing pe.”
Rei kole li Ende Lalong, “Eme lolo ge, apa melajun?”
Wale le guru gama, “Tajam.”
“Ham ga.” Tae di Ende Lalong.
Rei kole liha, “Asa nggeluk ga apa melajun?”
Hehehe … tawa guru gama canggu taen, “Do keta rei dite e. Agu toe laung ngon sili sawa aku tong.”
“Eng pe apa melajun nggeluk hitu bo ga. Wale kaut lite.” Tae di Ende Lalong.
Mai rei de guru gama, “Ai kut co’on betuan rei dite ta Ende Lalong. Melet keta rei nggitum leso ho’o ga.”
“Wale kaut lite pe.” Wantil de Ende Lalong.
“Eng damang ga. Eme caro nggeluk ditet Manggarai ngong lurus curup melajun a. Eme neho haju pe, naring de lite nggo’o, ole nggeluk tu’ung keta haju ho’o etan.” Nggitu wale de guru gama.
Toe keta pecing le guru gama, apa keta betuan rei de hae kilon hitu.
Itu kali ngo sili sawa guru gama ga. Mburuk mole’y. Tipa agu bancik.
De … toe di nais koen sili sawa guru gama, cai tuang ga.
Ita kaut tuang bakok agu weki langkas hitu acu one mbaru de guru gama, lolo de acu situ ko. Re’uk keta.
Sihing kole tuang rodo lampuk one mbaru kaut. Rantang acu’y. Itu tara hese tuang one natas. Ruis salang. Benta nitu main liha guru gama.
Denge benta hitu Ende Lalong itu kali ngon pe’ang. Ita liha tuang hese kin one natas. Dengang kid acu.
Toe sokor-sokor kaut di Ende Lalong ga ciek one mai para olo, “Anjing o anjing, jangan tajam Pater. Pater orang lurus.” Ngong, Acu ta acu neka lolo tuang. Tuang ata nggeluk … hehehehe ….
Manga bo lik’d acu sio a. Tambang mole lolon tuang bakok hitu lise.
Bo denge le tuang curup de hae kilo’d guru gama. Maik toe pecing liha betuan.
Itu kali rei le tuang. Mese-mese keta, “Ibu di mana Bapa guru agama?” (Ende nia kraeng guru agama?”
Bo denge le Ende Lalong. Lepot mole’y lelo tuang. Ai toe pecing liha betuan curup de tuang.
Bae le tuang, am toe bae betuan rei daku lata tu’a ende ho’o e.
Itu kali tesi tuang ga. Mai taen, “Ibu saya pulang saja ya. Nanti baru saya datang lagi.” (Ende kole kaut aku di, manga mai kole aku).
De … mentuk hi Ende Lalong. Watu. Nehot toe tombo agu hia. Lelo kaut liha tuang.
Woko nggitu ga itu kali kole kaut tuang ga.
Remon wa ga cai one mbaru hi guru gama. Rei liha canggu na’a one bate mangan bancik ban. “Asa Ende Lalong, mai tuang bao a?”
Wale le Ende Lalong, “Eng Ema Lalong. Mai’y bo. Dopo peang natas’y.”
“Hae, co’o tara toe benta mai be cen lite bo?” Rei de guru gama.
“Ae, ina acu dite so musi e, re’uk ketas lolo tuang hitu bo.” Wale de Ende Lalong.
“Ole Ende Lalong, co’o tara toe weling lite acu situ ta de. Ongga le hajus pe.” Wantil de guru gama.
Wale le Ende Lalong, “Kabam laku hau go Ema Lalong. Ngancet toe a. Re’ings laku acu situ bo. Ciek mole. Am denge muing liset mbaru sale reweng daku. Ai bom koen bo tombo daku ga.”
“Re’ing acu? Co’os lite re’ing’d?” Rei de guru gama.
Mai wale de Ende Lalong, “Co’ob re’ing le curup melaju ge, kut di’a denge le tuang. Nggo’o tae daku, anjing o anjing, jangan tajam pater. Pater orang lurus.”
Hema guru gama. Ta’ong. Toe tawa. Mai tae wa nain, ole … nai, itu tara pijir keta rein bao du kut ngo sili sawa daku.
Itu kali rei le guru gama, “Asa tuang bo manga tombon agu ite?”
“Eng, denge laku tombon bo. Ae … ta Ema Lalong, tombo apa ko apan. Am tombo agu acu’y. Itu tara porong kaut laku. Poli hitu bo ga, kole gi.” Nggitu wali de Ende Lalong agu guru gama canggu imus.
Denge wali de hae kilon guru gama ga, itu kali ngo cumang laing liha tuang ga.
Apa ko apa tombon guru gama agu tuang du cumang hitun ga, aik’n a.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng
