Bora Le Lorang Rona Data

Avatar of Ditulis oleh Maksi Mbangur
Ne nggo'o de taran eme bora momang mohas ata rowa. Ndurus wae lu'u wajol nuk. (Fimela.com)
Ne nggo'o de taran eme momang mohas ata rowa. Ndurus wae lu'u wajol nuk. (Fimela.com)

Tombo data ho’o, ata ita one mai grup WA. Curup Manggarai mole laku. Eme neho tae data jomel danong, RKB Kesmal. Ngong rantang ka’eng bo kesep mame lompong … hehehe.

Cengata ine wai one ca kota mese recut keta raha tau agu ronan. Palak keta o’o. Denge taung liset mbaru ce cupu. Toe baen, apa ko apa campitn. Denge kaut mu’u mese taud.

Sangged reweng sot tepeng one nais lawang ho’o nehot wencok keta taungs peangd. Loer tau. Du hitu caro keta taungs acu, ela ….

Nggitu kole tarad ranga, caro taungs: reba da’at neho tana raga ringirangas, molas bike ringet neho lide … ae co’ob toe kaut dia’n te senget.

Bo keta nanang retang bolo mai inang agu amang hi enu, maik ritaky. Retang one mbaru run kole ritak. Ai nuk kin liha kawing diha agu ronan hitu danong toe manga sendon le ende-eman.

Reme nggitun ga rodo manga kaut nuk wa nain. De nai … co’om ngo jejeng one mbaru loling rapu’k.

One kota hitu toe laseng loling one mbaru bate ka’engn ata mata, maik laseng loling one mbaru sewa. Ngasangn mbaru hitu lise ga “rumah duka”. Eme curup dite ga mbaru susa, maik ata bajar moley.

Nuk di enu ga, eme retang nitu aku di’a tu’ung keta. Bom manga ata baen co’o tara retang aku. Ata pecing datan kali ga, ata nuk agu momang mohas hiat rowa aku.

Itu kali ngo jejeng one mbaru susa hitun hi enu. Cai nitu tadu di’a rangan le handuk, tikul paka di’a one lupi wongka bate loling ata tu’a ema. Len jejeng hot teles keta. Ngeges lewe toe beteng.

Du hitu manga ata suas ine wai reme hese kid baling mai wongka loling rapu hitu. Tundu kid. Maik toe manga retangd. Am maels ga.

Du senget teles jejeng mese di enu hitut cai weru ga, itu kali lelo taud iset cua canggu jauk saok pocu ata tu’a ema hot rowa, “De … tama laing ata tu’a dunggak toe nganceng ngo duat lau uma. Lopo donggok cebo lonto jojob toe poso. Kali manga kole wina ceha te telun.”

Nuk dise, iset cua kanang wina di teriha lawang ho’o.

Cebo saisaok iset cua. Saok apa ko apad. Toe manga pinga li enu cai weru. Ruda recut kin retang hia. Toe tara emo.

Woko koe-koe retang hi enu ga agu nesi-nesut kaut gi, itu kali pesot-pesot ine wai sio sua bao. Entap koe-koe agu asur di’a bekek di enu hiot reme nesutn, canggu taed, “Ase te telun, kong kaut hia ga. Ai co’o mole lite panden. Lelo lami Ite leng keta susa naim. Nehot keti taungs celim, le nuk agu mohas momang kraeng ho’o.”

Tambang mole nesut hi enu agu cengkalin-cengkalin ngenges mese-mese. Woko nggitu ga, itu kali tombo le ine wai situ sua, saok dungka one tilu wanang di enu, “Ase, poli bantang ami cua ga. Asi danga simpung Ite. Seng ata reding de Kraeng Tu’a lima miliar.  Latangt Ite situ. Maik sangged paeng bana, neho mbaru, seng ata na’a one bank agu one pabrik, kut ami agu anak dami situ. Asi tegi situ Lite. Asa Ase, denge Lite a?”

Ngetuk kaut hi enu canggu danung kole retang. Maik retang te ho’on ga wajol senang nai ai rodo tu’ad kaut seng monggur kouk situ. Hitu de ngasangn bora le lorang rona data hehehe ….

Asa, manga ata nanang damang pande di enu hitu? hehehe ….

 

Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com


tombo-tomboMaksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.