“Mai ge Kesa, ngo maeng.” Nggitu wancong de Kraeng Lipus, hae reba de Kobus, kamping hi Pet ata hese kin ruis para kintal natasn.
Eme bantang ngo maeng nenggitu de, toe maleng rei nggo’on kole li Pet ga, “Maeng apa e Kesa Lipus?” Ai bae liha betuan wancong hitu, ngong maeng kartu.
Bo bo tu’ung maeng hitu, curup melajun ga “judi”. Maik lasengn ga ngong “judi” kartu.
Eme wancong kut ngo “judi ayam”, maeng manuk de caron. Toe caro ‘maeng’ kauty.
Caro ‘maeng’ hitu, toe hanang “judi” kanang curup melajun. Manga kole melaju banan, “main” ko “bermain”. Rapangn maeng bal, melajun ga “main bola” toe ngong “judi bola”.
Caro ‘maeng’ hitu nganceng kole celu le gega ko labar, ngong “main” ko “bermain” eme curup melaju. Rapangn, labar ko gega teka mbau, melajun ga “main lompat tali”.
Kole one wancong de Kraeng Lipus hio bao ga. Wancong ngo maeng. Lampuk muing bae de li Kraeng Pet, ngong “judi kartu” de betuan wancong de Kraeng Lipus hitu. Cewen kole woko bae musi olon li Pet, laseng maeng kartun hi Lipus.
Itu de kali nggo’o wantil di Pet ga, “Maeng nia wan e Kesa. Asa hi Kobus, poli wancong lite bo ga? Cait toe laseng bengs meut cua.”
Mai wale de Lipus, “Co’ob maeng lau mbaru dise Kraeng Tu’a ta de. Poli laku wancong hi Kobus bo ga. Toe manga weleng seng, taen.”
“Hae, nganceng maeng tana ma’a lau mbaru hitu ko Kesa?” rei de Pet.
“Ai co’o tara toen? Rei de Kraeng Lipus. “Engp ta Kesa, ai mbaru data tu’a hitu lau ta de. Nuk daku ga, ise ata tukang pepak, neka ndong lako salang be pe’ang. Ata laseng jer boto weleng nitu len tua le kebe.” Nggitu wantil de Pet.
Reges keta tawa de Kraeng Lipus. Mai taen, “Melet keta jepek reweng dite e Kesa. Rapak toe calang salang bana. Ata toing weru ko?”
Wale li Kraeng Pet, “Ta Kesa, ai bom toe aku ca wae de Tu’a. Hitus tingod ligot, pukul curup dise empo laku lawang ho’o ga.”
“Eng e, tu’ung keta hitu. Toe cela.” Wantil de Kraeng Lipus.
Poli hitu ga, benta cenggo hi Kraeng Lipus li Kraeng Pet ga. Cengka paka di’a lewang kintal li Kraeng Pet. Itu kali main pe’ang mai hi Kraeng Lipus. Wajol diki dakang, cebet muing lindi towen one kena. Di’an kali ga toe bete.
Lonto di’a one lempeng Kraeng Lipus. Toet lonto kaut. Wan kole benggat, “Ole, lempeng weru keta kin ho’o e Kesa. Hehel ketay. Lerem muing meka ata lonton.”
“Eng Kesa. Lempeng rojok dise wetam.” Nggitu wale de Kraeng Pet.
Hi Kraeng Lipus ho’o pecing bacang. Pecing kole cau HP. Nggitu kole internet. Eme reme ka’eng bon hia, seber kawe kreba. Cebo bacang kreba situ one HP. Ai mante sekolay danong. Sekola dopo, toe haeng le comong.
Tombo liha kamping hi Pet. “Tae dite bo nganceng maeng lau mbaru dise Kraeng Tu’a ko? Ina iset tu’a laing keta ata cewe lipet maeng. Toe hanang lipet, donde kole maeng.”
“Toe manga salang be pe’ang gejek dite, Kesa. Nuk dite, iset tu’a muing ata benggat eme manga salang be pe’angd wewa. Ise situ ata tukang babang eme manga ata da’atd bantang. Nepi taungs lise ba weki paka besik di’a.”
“Asa denge de’it lite kreba one mai internet so’o?” Nggitu rei de Lipus. Mai wale di Pet, “Ae, ai bom manga dami kaka situ ta Kesa. Le pai welin e. Mai kole ite bo ga, wancong ngo maeng.”
“Cama amit cua agu Kraeng Kobus. Toe manga weleng seng. Agu eme welengn seng koe hitu, co’om tamat rapak weli hang. Niha-nahas ketat ngo maengy.”
Itu kali wan tombo li Lipus ga. Maeng ho’o Kesa, toe hanang ce’e itey. Labok lino. Eme danong ata mangan agu pecing dite maeng teka dadu.
Poli hitu ga maeng kartu agu maeng manuk. Cengkalin-cengkalin maeng jarang. Rie jarang pe. Co’o hot rie weang one ngali kole lite ga.
Rentum keta lawa hitu. Nitu koles cumang de go”et dise empo, padir wa’i, rentu sa’i, hehehehe ….
Bo bo manga kole caro maeng bana. Maik latangt iset lomes situ. Hitu ngasang lise ga maeng ine wai hehehe ….
Ise situ, kanang ata dantat pucud eme ita ine wai molas. Lelo matad lite ga, nehot lepot ketas, toe cemol.
Mai wantil di Pet, “Asa hi Nana kole ca maeng pali bana hitu? Cait reba di’a, hondes bolek loke. Ranga tawa baca tara. Eme ngo lejong, embong pande lemot muing ata lelom. Eme ngo lambu kanang ata naum.”
Renggas tawa diset cua. Mai tae di Kraeng Lipus ga, “Pande keta songet isung agu bombong pesu daku kesam ite e ….”
Mai taen kole ga, “Ogo kaku maeng hitu, Kesa. Do bail soun. Ngain sou seng, sou kole pali banan hehehe …. Maik sou ata cewe mesen keta, wolet le ponteng mose. Cemoln ga labang mamur nawan hi nana. Mora mose laing.”
Ruda tombo de Lipus ga. “Te ho’on ga manga ‘judi online’ ngasang lise. Ta Kesa caro kaut lite, maeng tadang main. Lonto no’o kid ite. Nggitu koles ata bana. Lonto masing mbarud.”
“Hiat bandar laing ga lau tana lauy ka’engn. Nia ko niay nitu wa laun. Aikn a. Toe mopo lite lonton. Ata situt one maeng ga nggetel kaut one HP rud. Katu nitu maid kole seng laun.”
“Hitu bo, toe ata bapa situ maeng. Ata pecing taung. Ata sekola. Toe ata bod.”
“Kut bae lite Kesa, kreba data so’o, ata bacang one HP laku, one mai ‘Liputan 6.com’, ngasang diset ngara kreba hitu. Du ntaung 2021 nekid seng one ‘judi online’ hitu 57,91 triliun repia.”
“Cewe logur kole nitu main ga, du ntaung 2022. Nekid du hitu ga 104,41 triliun repia.”
“Asa baep lite ta Kesa, 1 triliun ngong pisa?” Nggitu rei di Lipus kamping hi Kraeng Pet. Ai lelo li Lipus, neket taung loke sa’i galan hi Pet ga. Lelo wiwir ga ndeong gi hehehehe ….
Mai tae di Kraeng Pet, “Asi de Kesa geong. Rundeng le bules nai daku ga. Denet le nendep daku sa’i. Wajol caro trilililiun hio dite bo. Ngong apa hitu?”
Reges muing hi Kraeng Lipus. “Neka nggitu bail wiwir ta Kesa. Neka pande ndehol bail koey … hehehe.” Reges ketas tawad ga. Eme neho go’et, reges lime leke, tawa lima gantang.
Danung kole li Kraeng Lipus, “Toe trilililiun ta Kesa. Eme nggitu caron, dere data koe sekola hitu. Hiot ‘di pucuk pohon’, wangkan dere hitu hehehehe ….”
Itu kali danung tombon Kraeng Lipus, “Kesa, ca triliun ngong ca sebu miliar. Eme ca miliar ga ngong ca sebu juta. Asa bop juta pecing lite?”
Ciek ide hi Pet, “Ole … darat tana masan. Kali seng lanar laek situ. Logur kouk. Monggurou e …. Eme na’a le jorengs seng 104 triliun situ bo e, penong pisa jorengs peng.”
Mai kole tae di Kraeng Pet, “Ole Kesa, logur tu’ung ketas seng situt lur ngger pe’ang tana peang situ e … ae. Eme weli dea seng lanar situ, pisa sebu ton muing. Nggitu kole eme dedek wae inung. Toe kole rapak tana Manggarai ho. Labok kaut ta ite. Eme kut sekola anak e … pisa sebu atad muing serjana.”
Wantil le run kole hi Kraeng Pet, “Maik bet daku hio bo e … Kesa geong, eme toe manga lawo kador te takod. Eme toe manga retang ela te jengad. Agu eme toe dumpu pus kut pujut, seng lanar situ hehehe ….”
“Toe manga celan tombo rum hio bao Kesa. Nuk kin laku. Wae de tu’a tu’ung keta ite. Senget kaut go’et hitut werun laku retuk. Hitu ngasang rapak pakadn jepek lepetn.” Wantil de Lipus.
“Nggitu koe rangan dakun e, boto hanang ite ata pecing pande durit.”
“Asa to, kole akug ge. Rantang kole weki rug aku tombo so’o bo ge.” Nggitu turung cemoln tombo di Lipus canggu lakon.
Neho baon mole Kraeng Lipus kolen ga. Nitu keta kin hi Pet lonto jojop hanang koen. Reme nggitun ga, cai hae kilon, ba agu wae kolang.
Mai tae di Kreang Pet, “Engp ta Weta, bao mole kolen naram hi Lipus ga. Ho’o keta nas di bad wae kolang dite.”
“O … nuk daku bo toed koley hi nana hitu. Neka rabom bo ga. Tombo toe inungm. Ite kaut ata inung ga. Boto pande bod laku kopi so’o.” Nggitu reweng de hae kilod Kraeng Pet, canggu na’a wa ranga de kilon kopi hitu. Ca mokn ga kut weki run. Lonto agu cimo di’a towen bolo mai hae kilon.
Poli hitu ga etan cemek kopi kolang hitu. Mai rein, “Tombo apas keta bo?”
“O … Weta, tombo maeng e. Wancong aku hia. Toe manga weleng seng tae daku. Ruda ka’eng no’on, cebo tombo maeng. ‘Judi online’ taen.” Nggitu wali di Kraeng Pet kamping hae kilon. Etan kole de Kraeng Pet, cemek cekoen kopi, ai kolang kin.
Poli hitu ga, itu kali tombo banad ga. Tombo kopi agu cengke lau uma ata pu’ungs welad ga. Kaing dani kamping Mori Jari. Keng tegi sembeng ngger le Mori Dedek.
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.
