Bao leso, du wear sekola, hi Nana ata cucu cumang amangn. Pede liha, “Nana, tombo di’a agu endem, toe geal wekin hi Ema dite sale beo. Naisn ga.”
Toe sokor hang leso hiat cucu, tombo muing agu enden peded amangn hio bao, ai boto ngancek hemong. Cait poli kaut hang leso to’ong ga ngo kawe haju.
Poli tombo li Nana agu enden ga. Denge liha ga, beti hi ema tu’a sale beo. Remo nais betin ga. Sango keta rangan enden denge kreba hitu bao.
Gereng kole duat data tu’a ema po bantang cama kut ngo la’at hi Ema salen.
Kraeng Lipus agu hiat ngaso we’es bo ga. Poli kole cebongn ga. Nggitu kole hiat ngaso. Reme kut inung kopi ho’o ga.
Itu kali tetis kopi agu tete li ende led. Lelo rangad hae kilon hi Kraeng Lipus, sango ketay. Mai rein, “Aga, toe geal weki dite a?”
“Toe, Ema Lalong.”
“Hae, co’o tara sangom keta ga?” Rei kole li Kraeng Lipus.
Itu kali lonto wa paka di’a hi Ende Aga. Cupu mai hi Nana Alo, hiat ngaso. Hiat cucu ga, toed koley kawe haju.
“Neka rabo Ema Lalong, cait reme inungs meu cua agu hi Nana. Aku manga tombog. Hi Ema sale beo, toe geal wekin. Kali naisn ga.” Nggitu tombod Ende Aga.
“Hae, tombo diong ite bo?” Reid Kraeng Lipus.
“Tombo di Agus bao. Du kole sekola hia, cumang agu amangn lau salang. Pede le amangn, tombo agu ite ce’e mbaru.” Nggitu tombo di Ende Aga.
“Nia hi Nana bao ga?”, Rei di Kraeng Lipus.
“Ngo pili hajuy, toe di koley.” Waled Ende Aga.
Reme nggitun ga, dengeg lise sebek runing pencar haju dihat cucu. Og hesen ka’en, ngo curu asen peang lawir dapur.
“Agus, kali beti hi Ema Tu’a sale e?” Rei di Alo.
“Io e Ka’e. Tombo di Amang bo e. Ata cumang lau salang laku bao, du kole sekola.” Nggitu wale di Agus.
“Gelang kali ge. Kawe hau hi Ema one mbaru.” Nggitu taed ka’en.
Itu kali lampuk one mbaru mesen hi Agus ga. Cai one, rei le Eman, “Nana, kali cumang amangm hau bao.”
“Eng Ema. Lau salang du kole sekola daku.” Wale dihat cucu.
Toe rapat gereng rei le eman, danung tombon liha, “Pede li Amang kut tombo kamping hi Ende agu Ite, toe geal wekin hi Ema Tu’a sale beo. Naisn ga. Poli tombon laku bao ga.”
“Eng e, tu’ung. Poli tombo le endem bo ga.” Wantil di Ema Lipus.
Mai rei di Alo, “Ema, asa bantang ngo la’at hi Ema Tu’a lite to. Kali hitut nais betin ga. Am ite kanang ata toed ngo la’at.”
“Eng e Nana, nggitu kole nuk daku. Olong bantang agu endes di.” Nggitu wale di Kraeng Lipus.
Hi Ende Aga reme wilung teneng hang wie sili dapur. Hitu koe di poli na’ang ela. Nggitu kole manuk ata pecak weru polis iringd ga.
Reme nggitun ga, mai rei dihat cucu, “Ema, ngong apa neng la’at hitut caro dite bo?”
“Ole … toe pecing le hau bo ko. Tama laing ata uwa weru meu e. Oe nungku kin curup Manggarai e. Neka bo nukung nungku curup Melaju meu. Boto lepeng ka’eng one beo ru.”
“Engp ta Ema. Ina itu tara rein laku bo. Kut pecing.” Nggitu nggepuk wale dihat cucu. Ho’ot sua ntaung hia wa’u sekolan.
Itu kali pu’ung toing li Ema Lipus ga. Nggo’o tombon, la’at hitu eme curup de meut melajun ngong “tinjau”, “meninjau”. Rapang, ngo la’at uma. Melajun ga, “pergi meninjau kebun”.
Nganceng kole la’at hitu, ngong “besuk/membesuk”, “kunjung/mengunjung” ko “lawat/melawati”.
Rapangn, diang gula aku ngo la’at hi Ema Tu’a. Curup melajun ga, “Esok pagi saya pergi mengunjungi/membesuk Kekek”.
“Bae laku ge Ema.” Nggitu wale dihat cucu.
Rei li Ema Lipus, “Asa lejong agu cenggo le hau, pecing?”
Ngengur hi Agus. Mai tae di Ema Lipus. Lejong hitu ngong “bertamu” curup melajun.
Curup melajun cenggo ga “singgah” ko “mampir”.
Jari a, woleng de ‘lejong’ agu ‘cenggo’.
Lejong bantang ko nanang muing kudut ngo one mbaru hitut lejong dite. Rapangn, “Asa Nana, ngo lejong sale ise Amang Nadus te?”
Cenggo, toe ngo nitu tite betuan. Nanang ngo bana. Maik manga mbaru de hae diding dite one salang hitut lako dite. Boto lako lage kaut ga, cenggo di cekoen.
Rapangn, ite nanang ngo laat hi Ema sale beo. Cai sale ise Kobus ga, amang dite, sale beo hitu taki ce’e, asi di, cenggo one ise.
Reme nggitun ga, tetis li Alo hang wie ga. Itus kali lonto liup diset pat ga.
Poli hang wie ga, bantang camas iset ca kilo, kut la’at hi Ema sale beo.
Bantang dise ga, asi beheng bail, ngo diang muing salen. Jera iset cua, ase-ka’e, ngo deko manuk sili kandang. Emi hiot dai reba koen. Hitu ata ngoeln. Mbele muingy agu teneng muing wie hitu le Ende Aga, kut lako gula diang.
“Ngo aku kaud diang salen. Ai co’o keta lakon endes. Bom ruis. Cait ende de meu reme weki mendon.”
“Ite diang Alo, danung ngo karong duat. Bengkes daku, poli diangy wedak hitu lau. Cait tiong cekeng ho’o wa len ga.” Nggitu anor di Kraeng Lipus.
Wali nggitu lise agu ended. Toe lewang le ended.
Gula ucap keta hi Ende Aga to’on. Poli taungs pedeng one rantangd hang agu ute ga. Pat muing lojokd rantang situ.
Hang emo can kaut, maik wedang ketay. Ute telud rantangd muing. Toe danga penongs. Boto bambek one salang.
Itu kali tesin hi Kraeng Lipus kut lako gi.
Lage ca wae li lipus ga. Lelo kali nombern ga lehes keta. Co’o kong toe nombern, egen tuke kebe hitu wa mai so’et keta.
Cai eta bea noing masa wae. Lonto di’a one mbau haju. Noing li Lipus di’a keta sesol buru koe.
Reme nggitun ga lampuk keta one isung dihad nendong benge hang agu nuru one mai rantang ban. Tuke muing darum.
Itu kali nggo’o nukn, damang de cengkad. De … woko cengka nggitus ga, tambang ketas nendong benged ga. Tambang tuke darum.
Og de damang campok cekoen hang, emi ca ceruk nuru, agu cemek ce regukn wae ute.
Minak noing nooo nai. Pande kakas darum. Tambang kole cekoen hang. Emi kole teme ca cerukn nuru. Nggitu kole waed ute cemek kole cekoen.
Ruda pande nggitun hi Lipus. Calak noing liha, taungs ute ga. Itu kali neho weter kole weki run, taen, “Ta’i darak goooo … kali tiong taungs ute so’o ga. Ole nai copel ho’o ga. Co’o keta mole gi.”
Mai nukn ga, “Ae … co’om danung kauts ga.” Itu kali hang keta taugs liha hang agu nuru situ. Becur muing tukan. Remon wa ga ruda lerem agu toko lemot wa mbau haju hituy.
Remo nais toko nitu hia. Holes leso du to’o tokon. Itu kali nggo’on nukn ga, “Co’om kolek ga. Ma’ut ba apa laku hi Ema to’ong. Tegi daku kali ga, nahi ina koe beti di Ema ga.”
Cai one mbaru, teing wae le hae kilon. Reis di’a, “Hitu kole Dite bo ga? Nuk dami asa toko sale ite. Asa koe hi Ema?”
“Ae … bo wangkan toko salek. Maik woko ita laku hi Ema ngarat hang agu di’a noing taen, tegi kole muing aku. Nuk ite ce’e mbaru. Agu jera kole li Ema, boto hanang koes meu, cait reme weki mendo.” Nggitu wale di Lipus.
“Delek eme nggitu ta Ema Lalong. Ina simpung kig aku bo.”
Gula-gula keta ngo duat Kraeng Lipus agu hi Alo. Ngo la’at umat hiot duat latay meseng.
Rapak du lesak leso ga cain ata mai wero, rowa hi Ema sale ga.
Retang di Ende Aga ko … teles jejeng, “Ema gooo … Ema daku e … Ema momang daku ta de … poli kaut hang nuru manuk katu dakuy e nai … itu kali lakon hi Ema daku e …. Ema lembak nai daku e …. Kali ata wuat kaut hang hitu meseng go nai …. Dee …. Ema pata dite e …. Legong kaut ami lite gee ….”
Senget kaut le koan hot mai wero. Toe ngaok. Maik wa nain ga rei, nuru manuk nia kali situ ga. Bom manga ngo banag aku meseng. Akup ata lami hi Ema meseng.
Woko lik retang de inangn ga, itu kali rei le koan, “Inang, katu lut ceings lite meseng nuru manuk sot caro dite du retang bao?”
“Deee … Nana, co’ob ba dungka le amangm ga. Ngo salep hia meseng. Ngo laat hi Ema. Lelo lite, hio kid rantang ba hang agu nuru manuk situ meseng. Toed nawis laku. Maik kole luty meseng. Lorong runing di Ema, taen. Ai remo geal weki di Ema ga.” Nggitu wale di Ende Aga.
Lelo kauts le koan one bate toso de inangn canggu taen, “Taaa Inang, toe manga ita hi Amang aku meseng e. Aku ata lami hi Ema meseng. Toe nganceng hang agu inung. Pu’ung holes leso meseng ga, boat hi Ema ga. Nais boat a.”
“Ba’ang keta hitu ge Nana. Ma’ut ata adong d’amangm ko. Kong Nana, aku rei koley to’ong. Tiong cai gi ai mane tana ho’o ga. Ite weli ga toko ce’e di. Gula di’ang cama agu ami ngo sale.” Nggitu wale di Ende Aga.
Toe sokor lonto wa hi Lipus, wali li Ende Aga. Canggu nesut retang, “Ema Lalong kali toe manga cai sale dite meseng e… Ema Lalong. Da’at tu’ung keta wintuk dite. Pata dite e Ema Lalong. Kali toe manga nuk Ema daku dite.”
Ruda tambang mese retang di Ende Aga. Mai wantil di Kraeng Lipus, “Taaa … de co’ob tara toe imbi aku dite ge. Toe laseng sabi nggopet aku e.”
“Ta … Ema lalong ma’u e, tu’ung daku. Damang rei le ru dite. Hitu le koam ata mai wero, rowa hi Ema sale ga.”
Denge hitu Lipus ga, lik. Toe ngaok. Berit one siding dapur bancikn. Caca kope selekn. Weo nitu koley.
Cai le molang ita li Kraeng Lipus lonto kin koan one loce. Cau lime canggu reis, “Nana, bao iteg ko? Neka rabo ge, ho’o di we’e ami. Toe di’an denge daku bo ge. Tombo de Inangm.”
“Eng ta Amang. Rowa hi Ema sale bao ge. Engp ta Amang kali ngo sale Ite meseng?” Nggitu reid koan hi Lipus.
Ruda imi amas hi Lipus ga. Denge pisik toe denge. Pisik-pisik pande suhu-seher hamar pelastik mbakon one mai cikang deko. Emi mbako agu kertas. Guling pande rongko. Poli hitu kacik pemantik. Tutung rongko canggu mecol rongko hitu liha. Lego nus one mai isung. Towol keta bolo mai rangad koan.
Poli mecol, mecol kole rongko hitu. Nukung keta. Toe ngaok. Nus rongko itu kali kembus. Panggu muing matad koan.
Koan hio bo ga hema gi. Toe malek kole liha rein. Nggiret kaut matan lelo amangn. Pecing liha ga, kali nggope-nggapet hi Amang. Am mboros le weki run nuru manuk situ meseng. Adong kaut inang daku liha.
Mai taed koan wa nain, “Oee … Amang Lipus, eme ngo laat amang e neka lako ndorik agu longkir. Neka lele agu bara mese. Olong pedeng di belek. Na’an bara ata laseng hang lanar. Ba’ang keta bail e, tundung hang kole rum nuru.”
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.
