Tombo one mai hi Salestinus Miadi Nggoro Ongko
Mantar sekola kelas 6, SDK Eduardus, Golo Karot, Borong, Manggarai Timur
Ata lengge agu ata bora kaeng one ca kintal (pa’ang ngaung).
Hiat ata bora do keta bail bokong diha one lino. Hiat bora do tana, do po’ong, do paeng, agu mbaru dia. Am pot boran hia, landing mese nai agu toe manga ngoeng kaeng ruis agu hae ata, agu toe manga momang cama hae ata one leso-leson.
Latang hiat lengge, lorong agu capn hia lengge, lengge keta bail. Mbaru repereot agu mosen toe manga rapakn te hang leso-leson. Hiat lengge toe manga do tana. Tanan kali ca libo koe, paeng toe manga. Manga kali paeng koen, ca kali manuk lalong ata pening diha leso-leson. Uma libo koe dihat lengge, manga ca po’ong pau, agu ca pu’u muku. Landing am pot lenggen hia, maik gawas nain agu hae ata, agu ngoeng keta lambu cama tau one mose leso-leson. Hiat lengge momang agu campe cama hae ata. Hia campe teing bokong latang cama tau. Hia campe ata toe le manga (bora), maik hia campe ata landing le momang.
Wajol dia tombo agu dia gauk diha agu hae ata, itu do keta ata bengkes nai, agu ngoeng lambu one mbaru diha. Hiat lengge do keta hae reba.
One ca leso mantar dihat lengge ho ngo sekola. Mantar dihat lengge, ngo sekola pake kaut sendal, agu lumut le baju rukureket. Nggitu wuk toe manga jangka. Deko koen riwi-rewot. Remeng keta lakon ngo sekolan mantar dihat lengge ho’o, nuhu remong manga mantar dihat bora. Musi mai mantar dihat lengge.
Mantar dihat bora ho’o toe lako hanang koen. Do keta ata raes hia. Mantar dihat bora, nggelok wekin agu rapak keta taung pake one wekin. Baju dia, sepatu dia, deko dia agu ba seng te weli hang one ruis sekola. Tombo agu ba wekin mantar dihat bora kole, tombo mese nai agu nggitu kole ba wekin mese nai. Mantar dihat bora, mbecik mantar dihat lengge. Nggo taen, “Hahaha … ole co tara pake sendal kaut ngo sekola. De … toe manga nenggitun ho ga. Eme ngo sekola paka pake sepatu dia, deko dia . Hahahaha … de co tara toe pake baju dia, deko dia, agu jangka wuk. Baeng mo ….”
Landing am pot nggitu maus le mantar dihat bora latang hiat lengge, landing hiat lengge tiba taungs sangged maus situ. Hiat lengge toe manga ritak. Maik ngo kin sekola. Agu cai one sekola. Toe manga co’o-co’on. Duhu kole one mai sekola. Maus kole le mantar dihat bora cama nuhu maus duhu ngo sekola.
One ca leson, mbaru dihat bora muntung wajol wina dihat bora toe lelo dia kompor gas one dapur cang duhu tenang. Sangged ise bora ca kilo losi agu ba ata nganceng nipu one mbaru dise.
Cang duhu losi diset bora, rei liset lengge, ole … co tara losi one mai mbaru kaengs meu?
Mai wale dihat bora, “Mbaru daku muntung. Wina daku toe pande mata kompor cang duhu poli teneng.
Maik hiat lengge teing wae inung campe iset bora hot muntung mbaru. Toe hanang hitu, hiat lengge kole tombo one hae ata ca kintal (pa’ang ngaung) kudut cama liang, kope oles, todo kongkol campe pande meti api one mbaru dihat bora ho reme muntung.
Bengkes ga, nganceng pesa api one mbaru muntung dihat bora. Agu poli hitu hiat lengge toing hiat te dia one hiat bora kudut ciar kole mose nggerolon. Mai nitu main ga, wina dihat bora, agu sangged iset bora one ca kilo, idep, agu teser sangged tombo agu ba weki toe kop be bolo.
Hiat lengge agu hiat bora, tenung mose, tombo agu gauk ata dian, agu mose raes tau one ca kintal leso-leson. Toe manga kole mose maus lihat bora latang hiat lengge. Ise kali ga tombo ata kop, gauk ata patun.
Hitu koe tombo daku, dasor manga betuan one tombo ho’o, kudut mangan gauk, ba weki ata dian dite one leso ho agu nggerolon one kaeng lino ho’o.
Tulisan ini diterjemahkan ke dalam bahasa Manggarai oleh Adi Nggoro dari video asli bahasa Indonesia yang dikarang sendiri oleh Salestinus Miadi Nggoro Ongko.
EDITOR: Redaksi Krebadia.com
