Manga cengata tuang bakok lau mai tana Eropa. Mese keta reweng’n. Konem toe maleng pake mik eme tombo’y one gereja. Noas keta eme senget tombon lite.
Konem tombo sua tau mole nenggitu keta kin mese reweng’n. Ae … toe nganceng tombo kilo sot neka ndong bae lata bana.
Do ata baen, nenteng tuang hitu. Am le hitu tara mese keta eme tombo’y. Am toe denge di’a le weki run eme tombo koe-koe. Hehehe ….
Eme lako’y linggang. Lelon lite nehot geal keta ba weki hitu. Nggikar keta’y lete leso.
Tuang hitu remo tu’an ga. Hia lami agu riang weki serani one ca paroki one beo.
Remo tadang paroki hitu ce mai Ruteng. Cait salang du hitu toe manga di’an.
Salang ngger one paroki de tuang hitu salang tana. Toe di tena le watu’y. Eme usang mborek hot lebot keta. Eme walis ga tewur kebok haeng awang eta.
Du hitu ca kanang oto de baba ata lako ngger one paroki hitu. Toe lete leso kole lakon.
Itu tara nggo’on eme mai ce’e Ruteng tuang donde leti jarang. Nggitu kole du kolen.
Sangge’d ca o ca ata weli one mai tokong ko ata katu pe’ang mai tana pe’ang katu one otos liha. Maram nais po cai one paroki.
Remon di wa po manga oton tuang. Oto koe. Oto pick up ngasang’n lise.
Nisang keta nain tuang ga. Toe maleng katu one oto data’d sangge’d ca o ca ga. Toe maleng leti jarang eme mai ce’e Ruteng.
Du hitu tuang manga kios. One kios hitu pika liha mina tana, gola, rewos, sabung, agu sangge’d menan kaut kut pande mose weki serani one paroki diha.
Tara pande kios tuang ai ita liha do ketas weki serani ata tadang ketas lakod eme nanang weli ca o ca.
Nisang keta nai’d sangge’d weki serani nitu. Cait toe danga wegit ketas pika’d le tuang sangged ca o ca ata manga one kios hitu.
Bo oton ga manga gi. Maik liong ban ga. Nggitu nuk de tuang. Ai weki run hia toe pecing. Nia di sokor kut nungkun ba oto. Tu’a mose ga.
Di’an kali ga nuk liha manga cengata tuang bakok. Hae reba diha ata do ketas oton. Tantu do kole spir’n a.
Itu kali ngo cumang liha hae reban hitu. Di’an kali toe danga tadang keta kaeng’n hae raban hitu one mai Ruteng.
Cai nitu reweraes keta tombo bana di. Bom koen bo tombo di tuang. Inung wae kolang.
Remon wa ga itu kali tombon liha betuan lejong diha. Eme curup Manggarai nggo’o tombon, “Tuang aku manga cai oto weru ge. Maik toe manga ata ban. Campe koe aku cengatan spir dite. Maram neka nais cepisa.”
Di’an ga toe lewang le tuang hae reban hitu. Og de benta le tuang hae reban hitu cengata spir.
Spir hitu toe di beheng pecing ba oto. Hitu di poli nungku werun. Bo kali manga SIM ga.
Tombo agu toing di’a spir le tuang hae reban hitu.
Toe wale le spir. Mentuk. Porong kaut le tuang. Woko toe walen spir ga, itu kali malek kole le tuang hae reba’d tuang meka hio bo. Te ho’on ga mese-mese keta liha tombon, “Ite campe tuang ho’o kut ba oto diha. Asa nganceng ko?”
Bo woko mese-mese nenggitu tombon ga itu po denge le spir. Itu kali ngetuk spir canggu taen, “Io Tuang. Nganceng.”
Mai pede de tuang agu spir hitu, “Pu’ung minggu musi tite campe ba oto daku. Leso Jemaak aku gereng ite awo Ruteng. Awo mbaru SVD. Neka hemong ba agu SIM dite.”
Ngetuk spir canggu wale, “Io Tuang. Aku ngo gula-gula awo Ruteng leso Jemaak.”
Rapak du leso Jemaak ge, gula-gula keta’y spir ngo awo Ruteng. Neho reke run.
Cai awo ga. Toe di sokor lonto wa spir mai tuang jera ngo wa tokong. Wuat le tuang, “Ite ngo wa tokong. Ngo emi kompiang. Poli laku bajar’d ga. Asa baep lite tokong hitu?”
Wale le ngetuk kaut le spir. Poli tesi agu tuang lako gi. Lako wa’i kaut. Ata iwod reme teti mendo tena one oto.
Cai one salang ga damang caro kole ngasang le spir apa hiot bate jera de tuang bo. Curup hanang koen. Caro liha “Kompinyong.” Hehehe.
Mai taen, curup hanang koen itu, eng hitu ata bate caro de tuang bo. Nuk kin laku.
Cai wa tokong ga. Toe manga ata banan nitu. Baba kali agu sangge’d ata campen.
Itu kali madis keta ngon one tokong. Hese bolo mai baba. Teing karcis liha one baba canggu taen, “Baba aku mai emi kompinyong de tuang.”
Teti sa’i de baba lelo spir hitu, canggu wale, “Apa? Kompinyong? Toe pecing laku apa hitu. Ata pecing dakun kali, meseng tuang weli kompiang.”
Woko nggitu reweng de baba ga hema spir. Letet porong baba. Mai tae de baba, “Co’o gi. Asa kut emi kompiang situ kali?”
Mai wale de spir ga, “Toe. Ina kompinyong tae de tuang bo.”
Wantil le baba, “Eme nggitu ga tae lite tuang toe pecing laku kompinyong hitu.”
Itu kali hidi hada keta kolen spir ga. Toe beheng ga cumang tuang.
Ita le tuang toe manga tiwit’n spir. Toe rapat gereng baro le spir. Rei le tuang, “Nias apa situt ngo emi dite bo ge?”
Mai wale de spir, “Toe bae le baba apa situ Tuang. Nggo’o taen toe manga kompinyong ce’e ami.”
Tuku sa’i galan tuang canggu imus. Mai taen, “Oe Spir, toe kompinyong e, maik kompiang.”
“Ina bo eme situ bo manga wa baba. Tae dite bo Tuang ga kompinyong.” Nggitu wale de spir canggu gelang holes kole ngo kole wa tokong.
Toe beheng cai wa tokong ga. Ai mburuk mole spir. Lampuk ngo cumang baba. Tombo agu Baba, “Bapa kali tu’ung e kompiang siot weli de Tuang meseng.”
Toe wale le baba. Imus kaut’y. Og de teing’s liha kompiang situ. Ata poli rokod le plastik.
Kole spir ga. Ngela keta rangan ga. Toe beheng ga cumang tuang. Teing one tuang’s liha apa situ.
Tibas kaut’s le tuang. Mai taen, “Lampuk ba one oto kaut’s lite ga. Na’a bolos lite.”
Ngetuk spir canggu lako ngo ba kompiang situ. Na’a di’a one oto. Bolo, neho pede de tuang.
Cai one paroki bate ka’eng de tuang ga. Toi le tuang gori de spir. Lete leso ngo elong laing one mai ngalor ba ngger ce’e. Na’a one ruis gereja.
Rapak du ca gula ge du wear misa, rei spir le tuang tadang main. “Sopir, jam berapa kamu pergi muat pasir di kali?” (Spir ongga pisa ite ngo teti laing wa ngalor tong?)
“Ya Pater. Ya Pater.” (Io Tuang. Io Tuang), canggu mburuk lampuk one lo’ang one bate weo wase lonceng gereja. Jintot keta walen kali toe nilor. Hehehe ….
Cai one toe rempe-rempe ndola wase lonceng gereja le kraeng spir. Runing lonceng hitu ko toe koen ntelung-ntelung … ntelung lung ntelung ….
Denge kaut runing lonceng hitu ciek ide tuang, “Kraeng sopir jangan goyang lonceng! Ya kau bodoh ya. Padahal kau tuli seperti saya ya!” (Kraeng spir neka pande runing lonceng e. Ole bodok de hau e. Kali nenteng neho aku kole hau). Hehehe.
Wajol denge runing lonceng hitu, sangged weki serani sot kole misa gula holes kole ngger one gereja. Dian kali manga cengata ata hese ruis tuang gelang ngo tombo weki situ.
Poli hitu gelang ngo nggewit kraeng spir, canggu taen, “Asi ndola wase lonceng Kesa!”
Holes spir, canggu rei, “Co’o tara benang lite? Ina jera le Tuang aku.” Hehehe ….
Tawan kraeng hitu, mai taen, “Toe jerang ongga lonceng Tuang bo. Ata rei ite hia. Ongga pisa ite ngo teti laing wa ngalor to’ong.”
“Ole nggitun ko. Toe denge di’a laku bo e Kesa. Terima kasih bo ge.” Nggitu wale de spir.
Itu kali ngo cumang tuang spir. Mai taen, “Pater minta maaf. Saya kira Pater suruh saya goyang lonceng.” (Tuang neka rabo ite ga. Nuk daku bo ite jera aku ongga lonceng). Hehehe ….
Toe walen tuang. Toe baen ga am toe denge liha tombo’d kraeng spir. Dopo da’at’n ka’eng cama neteng. Hehehe.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng
