Toe Hang Hau Tong ko?

hang tete
Ho'os polis na'a one mangkod li Ende tete ga. Reme gereng hi Ema agu ro'eng kali ga kut di'a hang cama. (pahrur raji/piamanexplore.com)

Liup impung iset ca kilo sili dapur du mane tana.

Neho baon koe cekoen, hi Ende kole cake tete awo mai uma. Penong roto ba teten.

Toe di sokor ngo cebong hi Ende, olong teneng tete di. Nggale ata nggoles’d. Ata kuntung’d ga na’a diod. Teneng neki agu saung situ tong kut na’ang ela.

Remon wa ga, benta hi Ema li Ende agu sangged ro’engn, “Uuuu … sangen taung e mai hang tete ga.”

Itu kali lego dali kope di Ema ga. Nggitu kole sangged ro’eng, lego labar teka mbau one natas. Lampuk sili dapur.

Polis li Ende na’a one mangkod tete ga. Nggitu kole kopi di Ende agu Ema. Wos kid. Ai hitus di celad one mai api. Ro’eng koe ga inung wae kaut. Bo sot dai tu’a manga pande kopid le Ende.

Cai sili dapur ro’eng situ toe sokor-sokor lampuk keta emi tete wa mangko. Gelang-gelang re’ing li Ende, “Eee … lego kole wa gelang. Supe-sapel le lime saki situ. Olong samo lime di. Ho’o wae.”

Denge re’ing hitu go, itu kali dikidakang lego kole wa mangko tete situ. Cait wajol kolang kole iwo. Poli hitu ga koso one baju lime koed. Samo di’a lime.

Bo hi Ema bo poli samo limen ga. Le wae dali kope kaut. Koso one sapu kaut limen.

Liup ketas lontod ga. One rehas tete agu kopi. Madis ketas hang’d ga.

Reme nggitun ga mai tae di Ende,

“Bo de meut uwa weru ho’o ge Nana, di’a tu’ung moses. Ngo nia-nia kaut lonto lobo oto ko motor. Toe beheng cai olo ga.”

“Ai co’o meu danong Ende?” Rei di Nana.

“Ami danong lako wa’i Nana. Cu’ung kid mendo. Lako ruis mole. Nggitu kole eme lako tadang. Wekut keta lako wa’i. Toe manga oto agu motor. Nais po cai olo. Eme tuke kebe bail. Hahal nai koen. Nomber itu kali nggarak keta.” Nggitu wale de Ende.

“Eng pe Ende, co’o keta eme lako tadang, cai leleng leso hitu olo a?” Rei di Enu.

Itu kali wan tombo di Ende ga. Danong Enu du koe kig aku do meka ata toko rontong one mbaru dami.

Wajo tadang salang  toe tara cai olo, caig mane tana. Itu kali ketok one mbaru damis meka situ. Tegi mbaru kut toko nitus di wie hitu. Neho diang gulan po lako kole.

Du reme caok hang wie sili dapur mai toing di Ende, “Enu, tong teti hangd meka e. Poli hitu ga lonto ruis nitu tite. Eme inung wae meka tong ga, tetis lite mangkon ga. Ba ce dapur.”

Ngetuk kaut aku senget toing de Ende. Rapak poli taungs caok li Ende hang agu ute ga itu kali tetid laku ba le meka. Pesot-pesot na’a wa rangad meka. Poli hitu ngo kole sili dapur aku ngo teti wae.

Woko manga taugs wa rangad mekad ga, mai tae daku, “Asa Amang pandes ga.”

“Io Enu. Asa Enu pande camas ga.” Ngetuk kaut aku wale tombod meka hitu.

Itu kali pu’ung hang meka ga. Toe hemong tanda panggol.

Hitu di bahi rehan hang de meka, cain cekes. Woko nggitu ga, gelang emi wae le meka hitu etan inung.

De … ita kaut inung wae meka hitu laku, toe rempe-rempe aku hese ngo teti mangko hang agu ute. Ai nuk kin laku toing di Ende bo sili dapur, eme inung wae meka ga, hitu tandan kut emo gi.

Hema kaut meka hitu. Toe manga reweng kole hia. Ot ngo’o koe tae, Enu asi di toe di emo aku.

Woko nggitu ga teti rudas laku mangko situ ba sili dapur.

Lonto kin hi Ende sili dapur. Cai sili rei li Ende, “Hae, Enu co’o tara teti ta’ad le hau mangko situ? Am toe di emo Amang hitu bo.”

Mai wale daku, “Ma’u Ende emo hi Amang hitu bo ga. Ai ita laku bo inung wae gi. Ai lorong toing dite pa.”

Tawa hi Ende, canggu taen, “Deee … calang bo toing hitu ga. Nuk daku bae li Enu, eme taung hangn meka agu poli inung waen ga itu po tetis lite mangkon.”

Ba kole les laku hang agu ute situ. Lut li Ende len. Cai le, tesi meka li Ende, “Dee … Ite, neka rabo tite. Calang bo anakm ho’o ga. Teti ta’as liha mangko dite. Ho’os ba kole ce’ed liha sili mai. Am toe di emo ite bo.”

Mai wale de meka, canggu imus, “Ma’u Ende pas kin di Enu. Emo aku bo ga.”

Kali wa nain, tilir kin, de nai teti keta ta’as mangko so bo. Ina tara inung wae aku bo ga wajol cekes. De cekes pata de hau … hehehe.

Cemoln tombo di Ende ga, “Neka nggitu meu e. Eme poli keta hang meka ga. Tegep di’a sendokn. Inung wae. Gereng di cekoen. Lelo di ot danung kole ko toe hangn. Remon wa ga, nganceng rei di’a-di’a lite, nggo’o, asa Amang poli ga? Eme poli wale diha ga itu po tetis mangkon lite.”

Mai wantil di Ema, “Eng … bo hitun. Itu leng tara nggo’on eme toing ata koe jepek keta. Ai toe di manga nai rud ata koe. Boto calang lise panden.”

Neho ca tombo kole, tae di Ema. Jera le enden ata koe rona, Nana ngo bilang meka hau. Ata pisas. Ai kut hang ga.

Danong caok lampuk  na’a one mangkos de hang. Mangko diod ute.

Toe rempe-rempe di Nana ho’o ngo len. Cai le, bilang mese-mese keta canggu toso lime koen, “Ca, sua, telu, pat ….”

Wajol hitu ga, tawa cengata meka. Ita tawa hitu li Nana hot bilang, mai-mai taen, “Ncingism hau ta. Ko toe hang hau tong ko. Ina jera di Ende kut bilang meu ga.”

Renggas tawa sangged meka situ. Seroda kaut kepet mu’u de meka hitut tawa. Ndereng ranga wajol ritak.

Mai dihat ngara mbaru, “Ole Ite do-do rabo dite. Ata koe ta Ite. Toe pecing liha adak ata di’an e.”

Danung kole tombo di Ema, “Itu tara nggo’on eme jera ata koe, madis keta. Neho hitu bo. Jera bilang. Paka tombo di’a, Nana bilang wa nai kaut. Neka toso koles lite meka boto bae agu ita lise, ite reme bilang ise. Nggitu jera ata koe.”

Itu kali tambang kolen tombo di Ema. “Nggitu kole eme jera ata koe ngo siro asekae neteng mbaru. Paka toing di’a. Cai one mbaru nitu olon paka inggos keta lako one mbaru. Olong lonto po tombo, apa betuan lejong dite. Poli hitu ga, eme kut kole, olong tesi di. Toe seduk kaut kole.”

“Cai musi ga, neka hemong wali kamping hiat wuat. Toe lampuk ngo gega meu. Co’o kong baen lihat wuat bo ga, poli ko toe di cumang lite ata hitut siro dite.”

“Jari a, sangges meu, neka hemong situ. Ya, hang danungs tete situ wa ga.” Nggitu cemoln tombo di Ema.

 

Editor: Redaksi Krebadia.com


tombo-tomboMaksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah.