PIKA UTE TE HO’ON — Dion keta de ce’e Manggarai dite mede. Te ho’on ga ise ende one tana maju ngo pika ute lako leok beo leti motor. Ho’o foto data tua ende lau Gorontalo, Sulawesi.
Foto: Gina/https://infopublik.id/galeri/foto/detail/86294?show=
Danong, du toe di rame neho leso ho’o ketas oto agu motor, sangge’d ata ngo one Ruteng lako wa’i. Ata mai weli ca o ca, ko ata ngo pika ca o ca mole, lako wa’i taung.
Manga ca leso ge, cengata ata tu’a ende ngo pika saung daeng. Cai one Ruteng lako ngo neteng mbaru. Eme toe manga denge ngaok ata ngara mbaru para olo, ngo be musi.
Rei le ende hitu. “U… Ibu, asa weli ute ite?”
Eme denge liset ngara mbaru ga manga de wale. “Ute apa situ ende?”
Wale data pika ga, “Saung daeng ite.”
Eme nanang weli de iset ngara mbaru ge, senang nai. Itu kali na’a wa di’a roto. Nggale ute ga.
Eme poli bajar ga itu kali tesi. “Asa ite inggos aku ga.”
Lako olo-olo kole hi ende pika ute ga.
Cai one ca mbaru de baba ge, mentuk keta mbaru hitu. Nehot toe manga ka’eng atan.
Itu kali curup hanang koen hi ende pika ute ga. Am ka’eng be musi dapur iset ngara mbaru o, co’om lampuk be musi kaut aku ga.
Reme keta di’an lakon hia, cewur ketas acu lima mongko mai sili mai be musi mai dapur. Dengang ho’o re’uk ketas.
Reme nggitun ga ita liha nona hese one para dapur. Gelang-gelang tegi campe hi ende pika ute. Ciek, melaju mole. Ai nuk diha toe bae curup Manggarai nona hitu.
“Nona, tolooong. Tolong saya! Anjing menangis saya.”
Imus muing nona hitu. Gelang-gelang weling’s liha acu situ. Peke le watu koes liha. Itu po losis acu situ. Itu kali nisang keta nain hi ende pika ute ga.
“Ende apa situt ba dite?” rei de mona.
De nai kali pecing curup Manggarai nona ho’o. Copel ho ga. Poli denge liha melaju daku bo ga. Am calang keta’y bo. Nggitu nuk wa nain hi ende pika ute.
Wale li ende rei de Nona, “De… Nona, neka rabo ite. Ata mai pika ute aku. Cala weli koe tite.”
Wale le nona, “Eng ga. Bo bo manga kid ute dami. Kong ga boto mai bod ite. Weli sua pongon dami.”
Canggu agu nggale ute nona, mai rein, “Ende ngong co’o de melaju dite bo. Hot anjing menangis saya pa?”
Tawa hi ende. “Hahahaha….e to. Ta… Nona, melaju damit kampong pe. Ai calang’y ko Nona?” rei di ende.
“Eng pe ngong co’o?” rei kole li nona.
Tawa kole hi ende. Holes hi ende cekoen, asa manga atan be musi. Kali toe manga.
Itu kali toi li ende ga. “Ngong lolo’p ta Nona. Ko dengang. Tegi campe dite aku bo ai ita laku ite hese one para dapur. Itu tara ciek aku. Wajol rantang keta kaku du hitu bo. Nona tolong saya. Anjing menangis saya. Ngong, Nona campe aku, acu lolo aku. Nggitu.”
“Hahahaha …,” tawa Nona. “Toe menangis Ende. Gonggong. Ko ata cewe di’an ga salak. Maik kong ga. Bae laku betuan bo Ende. Itu tara weling laku acu situ.”
Wantil li Ende demeng imus cekoen, ” De … Nona, sohod toe sekola ho’o danong. Toe pecing melaju. Neka rabo ite bo ga.”
“Di’a-di’a ite tong ge Ende. Nahe nau taung koes ute’m tong.”
Itu kali tesi kole hi ende ga. Lako olo-olo.
Editor: Redaksi Kreba Di’a
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.