“Uuu … cebong. Enuuu … manga ata cebong a.” Nggitu ciek data lako salang. Ai lage wae teku salang bate lako dise.
Danong eme regeng inewai ata reme cebong, mbotek one tu’a golo de le inewai hitu. Apan kole eme toe olong langi ata rona hitut regeng.
Eme salan hiat rona, nganceng denda laing. Denda le ela.
Itu tara nggo’o eme lako, ngo nia-nia kaut ce’e tana Manggarai, eme lage wae teku paka madis keta ka’eng di agu langi.
Mai rei de cengata ata koe reba, “Ngong apa langi hitu Amang?”
Wale li Amang, “Eng o, hemong te tombo laku langi hitu bo ga. Toeg nuk laku, kali toe neng manga langi de meut uwa weru ho’o ga. Ai cebong one lo’ang taung meu ho’o ga.”
“Eng Amang, itu tara rein laku. Du caro lite bo langi hitu, toe pecing laku, ngong apa hitu ga.” Nggitu wantil di nana reba.
“Aku kole amang toe pecing laku langi hitu. Bo eme langu kali pecing laku. Langu inung tuak ko langu leti oto.” Nggitu wantil de hae raba di nana reba.
Mai cedot koe de cengata hae reba dise, “Tu’ung hitu Amang. Ai laseng langu tuak kraeng hitu dami. Poli hitu ga itu kali dere langu go langu go … hehehe.”
Raos ketas tawad ga. Hi Amang kole lut tawa, canggu taen, “Nana, jerek koem e. Co’om neka koe do bail inung tuaks. Boto langu nenggitu. Cewen keta meu hitut laseng ba motor hitu. Cemoln ga sangge tungkal one salang.”
“Asi ruda tombo langu hitu bo ta Amang. Ata wange daku bo. Toe manga inung tuak ami Amang. Ruda tombo langi hio kali bo ga.” Nggitu rimbang data koe reba situ.
“Delek koe eme nggitum ta Nana. Simpung keta aku eme tombo tu’ung hitu bo.” Nggitu wale di Amang.
Itu kali ruda tombon di Amang. Tombo betuan langi hio bo ga.
Langi hitu, Nana, ngong ciek rei tadang main ngger one iset inewai ata reme teku wae one wae teku agu wae hitu laseng cebong laing koley.
Eme manga inewai ata reme teku wae one wae teku, reme nggitun ga cai koles ata rona nanang ngo teku wae ko ngo baki ranga ko ngo cebong nitu. Nggitu kole ata rona ata lako salang, ise situ paka olong langi.
Nggo’o langi hitu, “Uuu … cebong? Uuu … cebong?”
Eme toe tara wale le inewai, tambang koe mesen reweng dihat rein. Ciek keta, “Enuuu … manga ata cebong a?”
Eme denge de lise ga, manga de wale lise. Cengata ko cama-cama lise walen, “Eng Nanaaa … cebong ce’e.”
Eme remon wa ga, rei kole lata rona, “Uuu … cebong. Poli ga?”
Mai waled inewai, “Toe diii … Teme cekoen. Gereng teme cekoen.”
Rapak eme poli cebong ise ga, itu kali nggo’o benta diset inewai, “Nanaaa … maim ga. Poli kami cebong ga.”
Eme delek de data rona ge, rei kaut cengkalin liha, mai waled inewai, “Toe Nana. Toe manga ata cebong ce’e. Mai kis meu.”
“Hitu Nana. Hitu ngasang langi dami danong.” Nggitu cemoln tombo di Amang.
“Wali di’a Amang. Pecing lami betuan langi hitu ga.” Nggitu wantil di Nana Reba.
Cengata hae rema di Amang hema kin pu’ung bao main ga. Rapak du cemol tombo di Amang, itu kali wan ranga dihan tombo ga.
Ca leso manga ata lako salang. Salang hitu lage wae teku. Cai one ruis wae teku hitu, itu kali langi dise, “Uuu … cebong? Manga ata cebong a?”
Denge lise enu. Wale lise agu guap matad lelo iset lako salang, mai waled cengata enu, “Eng Nanaaa … cebong ce’e.”
Itu kali rentet taungs iset lako salang. Asi di cekoen.
Reme nggitun ga ita li Enu cengata ata rona ata pake mata tangke miteng. Woko nggitu ga mai tae di Enu, “Bo kraeng hiot pake mata tangke, maram lako kin.”
Denge kaut reweng hitu kraeng mata tangke, jintot ketay agu dikidakang keta lakon ga … hehehe ….
Toeg lelo wa salang matan kraeng mata tangke ruda li-lap matan lelo iset reme cebong. Timpok muing wa’in. Wajo, ganggel reu. Cingke wuku wa’i ponggo. Werewaes dara. Ae o nana, rengit ranga e wajol leng bail betin liha.
Mai taed hae lakon, “Itu ta. Icek dires. Minak kaut hi nana bo ga porong ise enu ata reme cebong.”
Maik cengata enu one wae teku, momang liha kraeng mata tangke, hese canggu nul wekin bonen towe wan, nggo’o taen, “Laing tae dakun bo hae… o, toe ita ata de kraeng hio. Hio pi timpok wa’in ga. Ba’eng no nai.”
De … kali du hitu kole ata di’an kraeng mata tangke porong hi enu. Senang nana, hemong cekoen beti wa’i ponggo … hehe.
Reme nggitun ga rodo manga kaut cai bet hi kraeng mata tangke, ai kut palang nais koe ka’eng porong ata reme cebong.
Itu kali pisik-pisik conga keta sa’in kraeng mata tangke, canggu rei, “Enu nia peng salang ngger lau Beo Belot e?”
Toe rempe-rempe di enu reme nul, wale canggu teti lime wanang pali be wa mai lindi towe etan kut toso salang, canggu taen, “Nitu tite laud Kraeng. Cai lau salang dangka tong, rei ata nitu.”
Porong keta kali de kraeng mata tangke ga, canggu wale, “Io Enu, aku lako di.”
De … mori, calak noing li enu reme nul ga, eta taung towen ga. Toe ga … laun ga.
Maik nuk liha wa nain, di’an kali hae o, tadu le mata tangke matan kraeng hio bo. Eme toe rowa ho’o ga … hehehe ….
Toe bae li enu, ata kut pande tambang jinok de mata tangke di nana … hehehe.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.