Du ca mane, kole duat, poli taung cebong ga. Reme lonto one sekang taungs sangged iset kerja proyek salang.
Manga ata cebo ruti gipin. Ata iwon ga lonto bo kaut, porong gori dihat teneng hang wie.
Hiat teneng laing tombo toe manga pareng hang wie. Taungs ikang ata pedeng dihat ngara proyek.
Wantil li Nabas, “Co’o tara simpung ite ta de. Ta’ong kaut wie ho’o di. Diang gula manga nuru dite.”
“Nuru nia mai Tu’a?” Nggitu rei dihat teneng.
“Ta Nana, labang kaut laku campat sale wae, lanar tua tuna diang gula.”
“Delek eme nggitu ta Tu’a. Asa ta Tu’a, co’om ngo ta’ang campat hitu ga.” Nggitu tegi dihat teneng laing.
“Gereng Nana. Gereng kaut ite. Toe mara-mara laku tombon bo ko.” Nggitu wale di Nabas canggu ngela keta rangan ai bengkes hang nuru tuna diang gula.
Toe manga ata bana ata wantil tombo diset cua.
Hi Thomas reme halas kin one loce ruis tau agu hi Nadus.
Tua-tua kaut wantil di Thomas, “Ta Nabas, kali nggitun pande dite. Daku emong koen eme belek hang nuru. Tonggang kaut wokang, jonggal taungs tuna. Diang gula ga kebut kaut kali ga, tapa, ai polis tudukd ga. Cama neho tuduk le tidek.”
“Ae, tombo nggopet-nggapet taung situ. Joak. Toe laseng ta’ang le wokang tuna e. Motang kali.” Wantil di Nabas.
“Hae, toe imbi lite ko Nabas?” Rei di Thomas.
“Eng e, toe keta manga imbi cekoen laku. Bom co’o gega lema dite. Dumuk manga kauts tombom.” Nggitu wale di Nabas.
Tawa taungs sangged hae lonto one sekang hitu.
Meseng reges ketas tawad hae lonton hi Thomas, mai taen, “Boto lewe tombo ta, damang rie kaut ge. Ceing ata cewe do hena tuna diang gula. Hi Nabas hot ta’ang le campat ko aku ata ta’ang le wokang?”
Tambang mole tawad hae lonton hi Thomas. Poli hitun itu kali wantil le cengata nitu. “Tu’ung keta dite ko Thomas?”
Poli hitu rei liha hi Nabas, “Asa Nabas, denge lite kaci di Thomas ko?”
Wale li Nabas, “Denge laku. Bo eme tombo tu’ung diha, eng laku. Maram gici 20 kilo dea kaut. Ai teme hitu koe dakun retang dea hang.”
Rei hi Thomas lise. “Asa Thomas, hitup reweng di Nabas?”
Toe lewang li Thomas, maik paka cau lata banas dea.
Og de pu’ung rie. Sangged ase ka’e dise nitu ciri sakasi laings. Ngo cama sale ngalor. Hi Nabas ba campat. Hi Thomas pola wokang. Limad. Poli taungs pande lolod liha ga.
Cai sale wae, ta’ang campat hi Nabas pali le. One ruis cunca koe. Hi Thomas ta’ang wokang be lau. One tiwu koe.
Poli pacek wa wae wokang di Thomas, itu kali hese lelo ngger lau, le, awo agu sale, canggu humi-hamit mu’un. Poli hitu teku liha wae tiwu hitu 5 ngkalin wecar one wokang situ. Poli hitu imus.
Porong kaut le ase ka’e situ canggu imus taung.
Poli hitu ga kole taung. Cai one sekang toko ga, ai wie tana ga. Mai taed cengata iset sakasi laing, “Toko taung ga. Neka ngaok. Diang gula paka ngo cama sale wae, la’at campat Nabas agu pota Wokang Thomas.” Hehehe ….
Senget li Thomas, toko hi Nabas ga. Nggitu kole sangged iset hae tokon one sekang hitu. Manga ata mareng. Denge koles liha manga ata pecu toe noing. Nehot ata wale taud pecud. Hehehe ….
Demeng imus canggu kepet isung wajol wau pecu situ, inggos pio hi Thomas. To’o, ngo sale wae.
Cai sale wae itas liha tuna one campat di Nabas 5 bongkod. Diki dakang ketas camped liha tuna situ. Gelang-gelang ngo tuduk one wokang diha. Poli hitu ga kole awo sekang.
Toko kole hi Thomas one loce run. Menggi wa, menggi eta. Woko denge liha manga ata husi-hasit weki situ, pisik mareng hia agu wan pecu, mpirang keta.
Rapak du gula tana ga kengko le ce ngata iset sakasi laing. Olong kengko hi Nabas. Gelang noing hi Nabas.
Poli hitu kengko hi Thomas. Deee … pisik toe noing hi Thomas. Kengko kole lise. Pisik holes kaut wekin hi Thomas. Toko kole, wan mareng.
Mai curup dise situ, “Thomas, gelang to’o ga. Gerak tana ho’o pe’ang ga. Ngo cama sale wae. Bao to’on hi Nabas ga.”
Woko toe walen hi Thomas, kengko kole lise. Kengkung keta lise wekin ga. Itu po noing hi Thomas. Pisik lot wekin hi Thomas canggu bareng.
Mai tae dise nitu, “Thomas, to’o ga. Neka rapat lot agu bareng wa itu.”
Denge hitu hi Thomas, ceregagatn wa mai to’on canggu taen, “Neka rabo, bao meu to’os ko. Neka rabo ge mandeng aku to’og. Am wajol nais po toko ite ho’o one wie e.”
Londang ketas lakod ga. Ngo sale wae. Remo gerak tana ga.
Olong hi Nabas cai sale. Lampuk ngo be le hia. Ngo lelo campatn. Dee … co’om tamat can koe pake nitu. Sango ranga di Nabas.
Sangged iset lako cama agu hi Thomas lampuk be lau. Ngo lelo wokang di Thomas. Itas lise, haed ata baris limad tuna. Ngger lau taungs ikod lorong wa’ad wae. Do’ong one wokang taung sa’id tuna situ.
Kut tetis le sakasi situ, maik benangs li Thomas, “Asi hidi-hada Kesa.”
Poli hitu, itu kali hese nitu hi Thomas. Lelo ngger le, ngger lau, ngger sale agu ngger awo. Emi liha wae, wecar lima ngkalin one wokang situt hena tuna. Poli hitu ga, jera liha, “Ya, tetis le meu ga.”
Reme nggitun ga cai nitu kole hi Nabas ga. Itas liha tuna situ. Ngengur sa’in canggu taen, “Ole laing keta taen hi Thomas ho’o e. Naring tu’ung laku ite e Kesa. Maik leso ho’o keta di itan laku nganceng ta’ang le wokang tuna.”
“Alim po ami e Kesa, ho’o keta di itan lami. Asa ta Thomas, asa manga kempeng dite e. Cait ita lami one wie, nggitu kole gula ho’o bo pandem.” Nggitu wantil de ase ka’e situ.
Wale li Thomas, “Toe manga, Kesa. Manga nia main daku apa situ.”
Maik toe imbil le weki situ wale di Thomas. Poli hitu ga, toe manga tombo bana kole.
Teneng agu manga ata tapa moled tuna situ. Hang cama-cama. Teing one hi Thomas taungs dea 40 kilo.
Dengkir ho’on toe bae li Nabas, ata cela one mai campat dihat de tuna situt tuduk
one wokang di Thomas. Aku kanang ata baen. Itu tara nganceng tombon laku agu ite … hehehehe ….
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com