Tombo rinteng ulu wae toe tombo weru. Maik mede main keta ga, pu’ung mose dise empo. Wa wa tombo, wa wa na’a. Toeg manga baen one ntaung pisa wangkan tombo ho’o. Liong wangkan kole tombon, ko empo diong ata wangka laingn tombo ho’o.
Dakun kali ga … tara manga tombo laingn laku one natas Krebadi’a ho’o, ai donde rei one nai de ru gaku, apa peng rajan agu betuan tara widang tombo rinteng ulu wae ho’o lise empo danong. Ai lorong ita one nai daku … toe rodo lego kaut tombo ho’o danong lise empo.
Manga tombo one ca beo. Ngasangn beo hitu Beo Keot. Ngasang wae tekun gah Wae Cincer.
One beo hitu manga sua tau ketas ata tu’a, atat lobo mu’u ketas caro ngasangd le hae beod. Ce ngata ngasang tu’ungn hi Lopo Nggor. Maik, ai donde deming laing kudut wintas caca mbolot lonto golo, tara hi Lopo Jenor de bentan lete leso.
Ca kole ga hi Lopo Sot. Ata nganceng rimba laing tombo di Lopo Jenor. Di’an kole ga, ka’eng ruis taud iset sua. Mbaru le agu mbaru lau kaut. Hia kole ga “ata mata gerak” ko “ata pecing”.
Hi Lopo Jenor manga sua tau empon. Hi Soang agu hi Soleng ngasangd. Hi Soang lonto one kelas enem SD. Asen ga hi Soleng kelas limay. Hi Lopo Sot kali ka’eng agu hae kilon kaut, ai wai tadang taungs anakn.
Wae dise hio bo ga do keta todo haju le ulun. Mangas ata mesed agu langkas ketas. Rembong ketas saungd. Do kole todo haju koe wa mai haju mese. Manga koles nambangd lor wase ajo. Mpogem koles lontod telud watu ici agu ca watu, atat bea hijab ketay, nehot keta padiry lelon.
One ca leso ge … dugu kole sekolan hi Soleng. Toe rempe-rempe rei ema lopon.
Soleng: “Oe Jenor … co’o de tara Wae Cincer ngasangn wae dite ho’o lau ta.”
Lopo Jenor: “Ai eme du cekeng walis ta … toe de don one sosor lakon wae hitu gah … neho iko lawo kali mesen gah. Toeg manga mboas keta tenggakn one mai sosor ga. Di’an kali ge Nana … konem neho nia kaut walis danong main dengkir te ho’on, toe keta manga metin wae hitu lau.”
Soleng: “Co’o tara nggitun ge Jenor .…”
Lopo Jenor: “Ai cekeng walis ta, holap taung tana lino le toe manga cai usang gah. Poli hitu, weki dite one beo gah deming haju dedek de Mori Kraeng kanang lau wae hitu ta. Toe manga tambang werid le weki beo dite ho’o. Itap le meu ta … ca de ata doaln haju ngancar mese hitu lau gah. Maik tekes kid cingn wa mai.”
Soleng: “Ai co’o neng tara paka tambang weri haju ta Jenor.”
Lopo Jenor: “Lorong denge tombo data so’o laku e … eme do weri haju, lorong hitu kole do meser wae usang ngger one mata wae.”
Reme nggitun cain hi Soang. Pencar kauts kayen one lupi hi Lopo Jenor. Taen kali gah .…
Soang: “Ole Jenor toe nganceng ngo sekola kaku diang e eme toe kaut molor le hau walen rei daku to’ong.”
Lopo Jenor: “Apa kole de haun rei hitu ta.”
Soang: “Lorong susung de Tanta Ibu e … hi Ibu Rihung hiop ta.”
Jenor: “Co’o taen e.”
Soang: “Tae diha bo … ai tematik diang, paka nganceng tombo bolo mai kelas, co’o tara okot keta tombo rintengn Wae Cincer dite ho’o lau.”
Lopo Jenor: “Ole … nggitun bo ko. Ole … tu’ung ko toe kali ta … ai le denge tombo lobo mu’u kole laku. Le tae hitu, lorong ita data mata gerak. Eme leso tiling Jema’ak, rodo ita kaut kode lama, mbot domongn … bembot ikon … neni kejir taung wekin … ngger eta ngger way nggipi-nggapaln one wase ajo … poli hitu jo’ak lobo watu situ lau.”
Soang: “Ole Jenor … ngong hau gee … mata nendep … bo keta tu’a wekim … hehehe.” Cang agu nggepon liha ema lopon.
Lopo Jenor: “Hau ta … toe di taung daku tombo.”
Soang: “Eng e Jenor … neka rabo e … terus lhau gah.”
Soleng: “Agu hau ta Soang, neka rampo tombo data tu’a e … jaga kakal le nanga li Jenor to’ong.”
Soang: “Tombo kim hau ge Jenor.”
Lopo Jenor: “Hehehe … eme cai co’on kole lau hitu, rodo tontes kat ata wina molas ngodak … bambas tawan .. wuk rempang takang regot wa … porong ata teku wae. Eme le tombo hitu ga, hitu ngasang darat.”
Soleng: “Oleee eme nggitu ge Jenor, ngo hau kaut teku wae eme leso Jema’ak ngger olon gah. Pande keta rantang ngo wae tombo ho’o ge aeh.”
Soang: “Hau e Soleng toe di taung tombo di Jenor. Asa e Jenor, com emi koret kudut lecik cekoen kraeng ho’o ta. Kudut baen liha cirang agu hembetn to’ong lecik hitu e.”
Lopo Jenor: “Hehehe … ta senget kaut e. Ca tombo kole, manga ca ata rona weki langkas lau hitu. Donde berit wa pu’u haju ngancar hitu lau, agu cait weki mbolang koley.”
Soang: “Ole, toe senging kode lama. Manga kole darat. Ngai mangan kole ata rona mbolang. Menes muing weki daku le rantang e Jenor.”
Lopo Jenor: “Neka rantang laing ta … toe manga koket ite ko kateng ited lau hitu e. Ho’o tu’a gaku ga, toe keta manga tombo kateng lau wae hitu.”
Soang: “Ta Jenor, toe manga metek laingn daku nai le tombo de hau e Jenor. Co’om ngo lau gi Sot kaku gi ta.”
Lopo Jenor: “Toe manga lau mbarun hia le mane nenggo’o ge. Reme ngo pante wae manen tuak diha.”
Soang: “Kongm hau ge Sot. Oe Jenor, nggitu kaut laku tombon eta skola diang ge?”
Lopo Jenor: “Toe di cemoly e. Icin agu betuan tombo RINTENG ulu wae dite ga, kudut manga to’o RANTANG neteng weki. Kudu manga rantang paki haju one ulu wae. Kudu manga rantang wodar le ulu wae. Ciling keta gori nenggitu le ulu wae. Ngong paka hiang ulu wae, cama neho hiang ulu de manusia.”
“Ai le manga rembong haju tara kembus wae teku. Peden kali ga … tadang ketas gori niri narap agu rua rap one ulu wae. Kudut tedeng len tekun wae hitu lau. Tae ga … Wae Teku Tedeng. Maram cincer kaut main du cekeng walis.”
“Dopo no’o ata cumangn one nuk agu nai daku e. Nenggitu le hau tombon eta skola diang.”
Soang : “Eng ge Jenor.”
Tombo di Lopo Jenor latang te empon hi Soang ho’o cama neho tombo latangt ata Manggarai do.
Maik manga keta ata berut one nai daku ce ngatan. Ngong ata tu’a ditet Manggarai so’o danong, leng keta delem nukd ga. Co’o keta kudut lewe len mosen mata wae, kudut teku tedeng kin le anak wa. Maik toe re’ing dungka neka paki haju ko neka wadi wodar one ulu wae. Ban kali lise ga, ba one tombo rinteng.
Eme manga kid ase ka’e toe pinga tombo dise ema lopo kali ga, hot kembe leis, ko kembe leja, ko ba le kubang, hitu de ngasang toe haeng tae toe repeng pede.
Hitu rimba daku cengatan one tombo rinteng ulu wae Tombo atat reding mede main le empo tana momang Manggarai dite.
Baca juga artikel terkait KAMBE MATA WAE atau tulisan menarik lainnya Hubert BogosEDITOR: Redaksi Krebadia.com
Hubertus Bogos, pencinta Mata Air dan perintis gerakan Sabuk Hijau Manggarai.