Neteng beo one Manggarai Raya manga wae barong. Wae barong hitu wae teku tedeng agu wae cebong de weki ca beo.
One wae hitu panden adak barong wae atat poli pede agu poli reding lise empo kamping anak agu empod atat lonton golo one leso ho’o agu leso nggerolon.
Reding kole tombo lise ema lopo, one wae barong hitu manga ata lamin latangt pangga sangged da’at ata ba kose agu woreng one mata wae. Le hitu gah, toe wae bon ngasang wae barong. Manga de naga wae atat jagan. Wiga mangan kole tae rintengn one mata wae barong.
Di’a tu’ung reding tombo agu wintuk dise ema lopo. Maik dion danong, dion leso ho’o. Danong main wae barong ho’o mboas keta main. Wiga tu’ung keta neho denge one torok caro kembus wae teku mboas wae woang. Toe keta manga tombo baeng wae. Toe manga ngambar keta kawe wae. Toe kole manga tombo pika agu weli wae.
Bae kaut gah, le gula tana kesep ngo duat, halu hak keta ata ngo teku wae. Mane tana kole, dugu we’e one mai uma, londang kole ngo teku wae agu ngo cebong. Am manga tombo roce, lorong hitus manga tawa cancak. Icin kaut gah, rame tedeng one mata wae toe dugu pande barong wae kanang.
One leso ho’o gah, tombo lenu agu lingop kali ata mangan gah. Ai toeg manga ata ngo teku wae agu ngo cebong one wae barong. Jeper kaut latangt tei wae de japi, mbe, agu kaba atat manga sawi weang. Hio bo gah, le mora kembusn wae teku, wae barong.
One mora kembusn wae barong ho’o keta ca toton agu toi rowin da’at ata ba de holap tana lino.
Maik toe landing nggitu gah, toe pande adak barong wae. Toe hitu. Ai paka nuk agu kukut tu’ung one nai masing weki. Wae barong hitu kin pu’ung agu wangkan mose agu beka weki ca beo dengkir nia kaut cemoln lino.
Wae barong wae inung dise ema lopo agu ende lopo, pande mose ise, wiga mose kole weki ca beo. Ngong wae ata poli inung dise danong gah lako-lako loreng kin neteng weki ditet mose leso ho’o.
Neka mesek nganceng weli wae gah, ledong kaut wae barong. Ledong kaut barong wae. Jaga langki le nangki de tai cemoln.
Toe neng emongn kudut pande kembus kole wae teku gah, ngong wae barong. Imbi dakun kali gah, eme gejur agu gempur tedeng pisa mpulu ntaung nggerolon, toet toe manga ita rekin one mata wae barong hitu.
Neho tae kali gah, ata nganceng diten one leso ho’o gah, neka sepo kaing kamping Jari agu tegi kamping ceki kudut manga widang le di’a kin wae barong hitu. Maik kaing agu tegi hitu gah, paka lako neki agu gori ko gempur. Emo de’it dopo one torok cekeng barong wae. Torok hitu paka loreng le gejur weri haju lupi mata wae barong.
Ata poli itan agu baen kaut lewen lonto sempel agu holap de lino one mose dite leso ho’o gah. Maik holap ho’o kole paka pande racang rak dite kudut rojo kid nuk molor latangt kambe mosen wae barong dite.
Hitu de tara mangan bantang adak Barong Wae Ekologis laku gah. Eme ciar itan one mata agu mata de nai ngong-ngong hang nggerolo de Barong Wae Ekologis ho’o tai. Toe ledo kole.
Tombo ho’o bo gah, tombo wae barong one beo de ru gaku, one beo Runtu, Desa Latung, Kecamatan Cibal Barat, Kabupaten Manggarai.
Delek eme tombo di’a kid wae barong one beo bana olon.
Baca juga artikel terkait KAMBE MATA WAE atau tulisan menarik Hubert Bogos lainnya.
EDITOR: Redaksi Krebadia.com
Hubert Bogos, Perintis Gerakan Sabuk Hijau Manggarai (The Pioneer of the Manggaraian Green Belt Movement)