Rame raes keta lonto leok, ai manga nempung bantang kilo du wie Minggu. Kesep pu’ung le tu’a kilo tombo rajan nempung hitu. Itu kali wad tombo bana. Manga-manga kaut’s tombo de ase kae situ.
Du hitu reme keta iru nemba mese Covid 19. Maram putut taung’s mu’u. Toe pinga. Jembol keta kali. Tombo apa kaut ata itan.
Alim po poli bae taung le sanggen weki wewa data pepak laing. Neka ruis tau keta eme lonto. Maik co’o mole panden eme ke’ot lutur. Cait wa ranga koles kopi kolang agu tete daeng ga. Ae … wajo ga. Co’o kaut be le mai hitun. Hitu ngasang curup cuba … hehehe ….
Mai tae di Anton, “Ngong nemba ho’op ta ase kaen. Labok kaut lino. Rantang laing kole’y e. Ole, lanar cengkalis ata labang ga. Neteng-neteng tana manga taung kreba mata. Lete leso. Ce’e ite kole nenggitu.”
Toe di wantil lata bana. Sut kin hia, “Bo koe itet uwa. Toe manga simpung.”
Mai wantil di Rikus, “Ai co’o tara toe simpung?”
Wale li Anton, “Lorong tae data pecing so’o pe. Ata tu’a keta ata mesen lami di’a lite. Neka lego masker. Ai toe danga mberes ise kut ta’ang kaka covid hitu.”
Mentuk weki hitu. Toe manga ata wantil. Am denge kole lise tombo nenggitu one mai tivi.
Reme nggitun ga mai tae de cengata ata dai tuan koe. Hi Nadus ngasang’n. “Oe Nana, bae le meu go’et data tu’a ko?”
Lelo ngger one hia taung’s weki situ. Manga ata holes keta.
“Danung tombo dite ge Amang Nadus, go’et apa hitut tae dite bo?” rei di Anton.
Ruda gereng dise reweng di amang Nadus. “Co’ob hot nggo’o ge, kanggang puka bowok worok. Pecing le meu betuan ko?”
Lik. Toe manga cengatan ata wale. Bo lelo tau kali canggu agu imus.
Woko lik taung’s ata uwa situ ga, itu kali rei kole ise li Amang Nadus.
“Nana, asa puka bae le meu ko? Puka muku pe. Nggitu kole worok. Haju worok pe.”
Mai wale di Anton, “Bo situ ta Amang, baes lami.”
Itu kali pu’ung tombo lewe di Amang Nadus. “Delek eme nggitu ga.”
“Puka muku hitup ta rapang ngong ata tu’a. Ciri merik weki dise ga. Mipis. Toe manga mina tara’d. Maik neka emong lelod lite. Nganceng de mose lewe kid ise situ. Kanggang neho puka dango hitus.”
“Maik haju worok, hiot laseng baen lite cirang keta’y, am bowok de bonen. Worok hitu ga rapang neho meut uwa. Itu tara nggo’on neka temo bail meu.”
“Toe le ru dite de papong’n mose one lino ho’o. Lewe ko wokok’n. Manga Ema Mori Mese ata anor’n.”
Toe di cemol tombo di Amang Nadus. “Bae le meu to, donde de lur le lur le ata uwa.”
“Ata tu’a so’o ga manga keta kid. Asa pecing le meu hi ende tu’a Mina e? Ende lopo dite’p ta Rikus. Alompulu ntaung mole gi. Ehos keta kin. Apan ata uwa ga do ata led ga.”
Denge tombo di amang Nadus hitu, sangge’d ata uwa situ toe ngaok.
Pisik-pisik ngo ceba hi Anton. Ita li Amang Nadus. Mai taen, “Asi di hese ta’a Toni. Toe di cemol tombo daku.”
Mai wantil di Lipus, “Hae, hi Toni kole iwo ngasang’n hi Anton ko Amang?”
“Agut nggitu benta le nacan hi Anton e,” tae di Amang Nadus.
Mai wange di Rikus ga, “Mai one mai benta Tonin ce pisa hi Anton, cemol’n ga benta bara gi ko tuka, kemok.”
“Hahahaha …,” raos ketas tawad ga. Rame.
“Turung cemol tombo daku,” itu kole danung di Amang Nadus.
“Kanggang puka bowok worok hio bao, ata toing agu titong kamping sangge’d ite ho’o.”
“Neka temo bail meseng uwa kin mose. Neka simpung ise ema tu’a agu ende tu’a tite. Nuk kin weki ru.”
“Asa mante de’it le meu dengen tombo de Mori Yesus one surak nggeluk pe: Neka temo agu wela koe matas! Ai toe pecing le meu du nia cain leso redun.” (Mrk.13:33)
Reme nggitun ga, denge’g lise benta de tu’a kilo, “Asa Nana, sanggen taung hitu wa pe’ang, mai be ce’e taung ga. Ai kudut pu’ung tombo dite.”
Itus kali inggos taung dise Rikus agu sangged hae belan. Ngo lonto one lutur mese. Nggitu kole hi Amang Nadus.
Editor: Redaksi KrebaDi’a