BA KOR ONE KAPEL BIARA SSpS AP — Anak TK Santa Maria Fatima Cewonikit ba kor one misa du misa Leso Minggu 21 Mei 2023 one Kapel Biara SSpS AP, Ruteng, Kabupaten Manggarai. Roeng koe ata dirigen laing hi Enjel ngasang’n.
FOTO: De TK Maria Fatima Cewonokit
KrebaDi’a.Com — Taman Kanak-Kanak (TK) Santa Maria Fatima Cewonikit, Ruteng, Kabupaten Manggarai, nungku canggu gega. Hitu de ca salang kudut pande beka agu mese icin gejur toing agu titong, lorong ici nai data hesen Kongregasi Putri Reinha Rosari (PRR), Ema Uskup Mgr. Gabriel Manek SVD.
Nggitu reweng run Kepala TK St. Maria Fatima Sr. M. Zita PRR, S.Pd. ngger one KrebaDi’a.com, du leso Minggu, 21 Mei 2023.
Tombo liha, tu’ung keta de, du labar sangged anak toe hanang gega kanang. Kunjung ketas de toing agu titong le guru kut di’a nganceng nungku ca o ca sise du reme gega hitu.
“Ne nggo’o mole’y toing agu titong le suster agu guru, kudut tambang beka icin gejur de sekolah lorong ici nai data hesen Mgr. Gabriel Manek ata letang le kongregasi (PRR).” Nggitu reweng de Sr. Zita.
Ngong ici nain Mgr. Gabriel Manek SVD, og de tombo le Sr. Zita, ”Toe manga cebanan ici nai’n hitu: momang tau, campe ata merik weki – koe mose le senang nai, di’a nuk, neka pande lonto woleng ata bora agu ata lengge.”
Danung kole le Sr. Zita, wajol ici nai data hesen biara dise hitu keta de, anak TK St. Maria Fatima nungku muing boto ngonde holes mejeng hese latang’t mose wakar’d.
“Imbi de ro’eng so’o kamping Morin, neka keta kembang’s, weri muing pu’ung du reme koe maid,” taed Sr. Zita.
Ata poli kenanu muing’d sangged gori lete ntaung, nggitu tombo de Sr Zita. Lete cemol ntaung sekolah, du wulang lima, TK Santa Maria Fatima ba kor one Gereja Paroki Santu Vitalis Cewonikit.
“Nggitu kole one sangged paroki bana sot ruis koed, agu one Biara SSpS AP,” taed Sr. Zita.
Manik One Nai Majak One Mata
Du randang misa tenang kole Leso Komunikasi Sosial Sedunia Te-57 one Kapel Biara Suster SSpS AP Ruteng, du leso Minggu 21 Mei 2023, TK Santa Maria Fatima Cewonikit toto loke dise manik one nai majak one mata. Misa teti le tuang uwa, Pater Ius Boruk SVD.
Ita le KrebaDi’a.com, ro’eng koe situ rengguk rame raes ketas dere’d one misa nggeluk hitu cama laing agu guru agu suster.
Toe manga sihing ko rantang’d. Dere curup melaju mole, dere curup Manggarai, nggitu kole dere curup Latin, pecing taung’s lise.
Du bacang te can agu te suan, anak TK St. Maria Fatima situ, toe manga cadel agu sapet. Mosok toe lelo one surak. Di’a tu’ung keta.
Anak ata rona, nggitu kole anak inewai situt ciri lektor agu lektris, temer ketas hese’d lobo krosi, ata kut pande tambang langkas koe’d bolo mai meja bacang.
Toe keta manga sihing’d agu cepek tu’ung keta du bacang’d lise epistola. Mata data Serani ata manga nitu lepot ketas porong agu mentuk taung. Di’a tu’ung keta.
Toe hanang hitu kanang. Du lako podo kut condo sangge’d wua lime ngger le compang altar, sangge’d ro’eng koe situ lako demeng mentuk ketas. Nisang keta nai senget torok tae de cengata ata koe rona bolo mai ranga’d tuang pastor.
Poli selek pakian adat ga. Bolek keta loken. Pesot di’a lakon ngger olo cekoen. Hese bolo mai tara hese’d tuang pastor. Itu kali cau mik liha. Poli hitu ga wan torok curup Manggarai. Tolos keta. Toe sapet-sapet.
Du rekok kut cemol’n torok tae de roeng hitu, nisang taung nai’d weki serani. Tuang Ius Boruk ata tiba’d sangge’d condo agu torok situ imus isung’n nisang nain.
Tombo le Sr. Zita kamping KrebaDi’a.com, kut di’a nganceng ngo ba kor one misa du leso tenang kole Leso Komunikasi Sosial Sedunia leso ho’o, ata ngoeng de weki rud ise, bantang cama laing agu Suster SSpS AP.
Curup le Nai
One khotbah, wewa le Tuang Ius Boruk kamping sangged weki Serani, lut reweng de Ema Paus Fransiskus. Toe manga cebanan, eme manga curup paka curup pande mut one pucu, wa mai nain. Eme pa’u reweng, paka pedeng cembes nai cama laing.
Maik eme lelo lite, dion de wintuk te ho’on ga, tae de Tuang Ius. Nehot donde keta tite cako curup ata pande wungku pucu, weong nai laing. Pande sersedep one nendep.
Poli hitu ga letang temba kole le Pater Ius pedeng reweng de Ema Paus. Awar bantang sangge’d ite le Ema Paus, dedek di’a ruku eme curup, paka tombo ata kop mai wan nain, minak kole tiban sina cai one nai cumang one tuka.
Landing le momang tau hitu de, pande nggoes kut ngaceng cumang tau’d nuk du reme curup. Wintuk ata nipun kali ga pesek keta senget ata mesen. Senget le nai ngalis.
Toto Taran TK Santa Maria Fatima
Ho’o de taran TK Santa Maria Fatima, neho tombo de weki run Sr. Zita kamping KrebaDia.com.
Pu’ung panden TK Santa Maria Fatima Cewonikit du ntaung 1987. Rapak telu mpulu pitu ntaung gi.
One sekolah hitu de ca salang de Suster PRR kut di’a ngaceng toto’d gori agu gejur campe weki ce’e Keuskupan Ruteng.
TK Santa Maria Fatima Cewonikit pepil le rud Suster PRR. Ngasang yayasan ga, Yayasan Mgr. Gabriel Manek SVD.
Te ho’on ga TK Santa Maria Fatima Cewonikit pepil le run Sr. M. Zita PRR. Hia de kepala sekolah canggu ata tu’a laing one Biara PRR Cewonikit.
Eme lut sekolah one TK Santa Maria Fatima manga ata pande di’a laing.
- Sangged weki ata ngoeng podo anak’d kut selolah one TK Santa Maria Fatima Cewonikit tiba di’as lami.
- Tombo muing lami, anak sot cemol sekolah one TK, di’a ba wekin ga, nggoes koen kut lut sekolah ata cewe mesen.
- Poli pande menteng muing imbi’d kamping Morin, pu’ung du koe main muing.
- Toing agu titong pu’ung koe main muing kudut pande tambang beka ata poli nesa’d, tambang besik ata poli pecing’d.
Ho’os sangge’d raja’d seng ata pinga’d latang’t bajar sekolah.
- Seng kut tulis ngasang du pu’ung sekolah cepulu sebu.
- Latang’t bajar seragam telu tara’d, telu ratus lima mpulu sebu.
- Seng sekolah ga sua ratus sebu lete wulang.
- Latang’t bajar oto kut curu agu podo du kole’d roeng, le Bemo Santa Maria Fatima.
- Eme curu kanang ceratus sebu ca wulang.
- Nggitu kole eme podo kanang ceratus sebu ca wulang.
- Maik eme curu agu podo du kole’d roeng situ, sua ratus sebu lete wulang.
Editor: Redaksi KrebaDi’a.com