Asa mante de’it lite porong one Youtube. Manga cengata dedek video. Toe lewe koen.
Eme tenang tu’ung keta lite betuan video hitu manga icin latangt ite. Co neng icin latangt ite? Aku damang tomboy. Nuk le rud kaut ite.
Cengata ata rona manga kilon ga. Caro kaut lite ngasangn hi Nikus. Toe ita laku hi Nikus one video hitu. Bo winan kali ita laku.
Bo eme lelo daku hi enu hitu nehot manga mantarn ga. Maik mantarn toe manga itan kole one video hitu. Am ngo sekola ko ngo labar one natas data banas.
Hi Nikus ga am ngo lejong ko ngo lako-lako. Hemong one mbaru HP de kraeng hitu. Tara baen le kilon ga denge runing liha, manga ata telepon.
Denge kaut runing one mai HP de ronan hitu, gelang-gelang kawe agu teti li enu, na’a ruis tilu leo, poli hitu benggat liha, pio-pio, taen, “Halooooo ….”
“Haloooo …,” wale data cupu mai. Reweng de inewai. Mai rei de inewai hitut cupu mai, “Ceing ite?”
Tara rei nggitun li enu hitu, ai toeg reweng data rona hot tombo sina mai, maik reweng data inewai.
Itu kali wale le hae kilod Nikus, “Aku hae kilod kraeng ho’o ce’e mbaru. Ite ga, ceing?”
“Hae, nggitun a?” Nggitu wantil de enu hitu sina mai.
Wale le hae kilod Nikus, canggu rei, “Eng tu’ung, hae kilo dihak aku.” Malek kole rei liha, “Ite ga ceing?”
“Oh … delek eme nggitu ga. Aku naca diha.” Nggitu wale di enu hitu sina mai.
Ole … denge kaut caro naca hitu hae kilod kraeng, rengit ranga. Rabo da’at ketay.
“Halooo … Enu, co’o bo tae de hau ga, naca di kraeng ho’o ce’e mbaru tite?” Nggitu rei kole le hae kilod kraeng.
“Eng hae, tu’ung naca diha aku. Nia hia, aku kut tombo dungka agu hia.” Nggitu tae di enu hitu sina mai.
“Toe manga no’on hae. Kawe le rum ronam hitu. Agut naca de hau hia. Co’o tara rei one akun le hau.” Nggitu waled hae kilod Nikus demeng rangi-rengus keta rangan ga.
Poli hitu demeng cumpeng mese keta hae kilod Nikus ga canggu rei, “Nia wan mbarum hae, aku kut cumang dungkah. Gereng hau sina, kut rei dungka keta laku hau, co’o keta tara ne nggitu wintukm agu ronam hitu. Ngoeng keta pande toe temer ka’eng kilo data.”
“Asi rodo mai tite. Besung olong tombo lite agu hi Nikus hitu to’ong, oto hot laseng ba diha lawang ho’o gelang podo kole ce’ey. Mbaru hitut ka’eng diha ga gelang bajar. Paka bajar leso Minggu musi. Eme toe nganceng, gelang teti hia nitu main.” Nggitu wale di enu hitu sina mai.
Denge kaut pede hitu winan kraeng ga, mesot muing dara wekin. Bae liha ga, kali toe paeng run Nikus sot pake dise lawang ho’o.
Itu kali lece hia ga. Inggos pio koe rewengn ga, nggo’o taen, “Hehehe … Ibu … hehe … Ibu, neka rabo ite Ibu. Ata adong daku hio bao.
Ata tu’ungn ga, toe wina di kraeng Nikus aku. Aku ata ka’eng agu hia. Aku campe teneng agu roi weang diha ce’e mbaru.”
Wale li Naca sina mai, “Oh … nggitun a? Enu, kali remo kole lewe ngarek dite e Enu. Sabi nggopet keta agu akuh. Asa, ngoeng tombo
laku agu kraeng hitu ko? Kut weling liha nitu maim?”
Gelang-gelang tegi ampong.
Pesot-pesot.
Woko nggitu hia tegi ampongn ga, itu kali nggo’on reweng de enu hitu sina mai, “Eng ga. Asi tombo lite eme nggitu ga.” Poli hitu ga, tadu liha telepon hitu canggu imus nisang nai.
Nisang keta nain winad kraeng ga. Tawa rangan. Toeg manga rangi-rengit neho du laring cain tiba telepon.
Toe baen ga, co’o ko co’o nuk wa nain. Am nggo’o taen, de … Nana com kong ciri rona di enu hitu kole ca hau, tama neka mora oto agu mbaru bate ka’eng daku ho’o. Agu ca kole, tama neka keta hemong mai la’at aku. Neka cewe do diha … hehehe …. Nggitus di.
Ko co’o nuk dite?
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.