Le Tuang Inosensius Sutam
Loas kolé oné mai Nai Nggeluk kudut Mosé Ca Nai agu Ca Wakar
Selasa, 9.4.24; Bacaan Kis 4:32-37; Mzm 91; Yoh 3:7-15
Mosé ca nai agu ca wakar. Aku cama ného hia, aku manga oné hia, hia manga oné aku. Aku weki agu dara dihak, hia kolé weki agu dara dakuy. Ai Hia agu aku cama-cama hang weki agu inung dara de Kristus. Weki agu dara de Kristus manga oné aku agu oné hia. Landing hitu hia agu aku ca weki, ca-tuka, ca nai, agu ca wakar. Ai weki daku agu weki diha, wakar diha agu wakar daku, dara daku agu dara diha pongo le weki agu le dara de Kristus. Nitu main paéng daku agu paéng diha ciri paéng camas latang te hia agu aku ného nggitu latang te sanggén ata situt imbi oné hi Yesus Kristus.
Kudut neki-ca daku agu hia agu sanggén ata imbi oné hi Yesus Kristus mberesn agu toé rongkas le mberes de lino ho’o, sanggén ata imbi situ paka loas kolé oné mai Nai Nggeluk. Loas oné mai Nai Nggeluk ngong imbi te ngoéng agu mberes hitut gégo agu pandé wuli weki dité mai oné mai Neki-can Mori Keraéng Telu Léléng ca. Wasé Nggeluk ata pongo kudut neki-can weki, wakar, agu nai dité mai oné Mori Keraéng Telu léléng ca.
Mai ga ité mosé ca nai agu ca wakar agu oké taungs watang lamba agu ronggo do’ong oné mai salang mosé dité.
Ciri Gérak kudut ledo oné mai bui de ndékok hitut nendep
Rabu 10.4.24: Bacang CpTR /Kis: 5:17-26; Msm 33 ; Yoh 3:16-21
Hi Petrus agu rasul ca bana dekos le Tuang Mésé agu l’ata Saduki. Na’a oné buis le adak situ wajo le isé tombo agu wéwa hi Kristus hitut poli to’o wa mai boaN. Maik malaikat mai le wié agu ledos oné mai bui hitu. Isé wéwa tédéng Mori Yesus Kristus oné mbaru de Morin. Mberes de Morin toé ngancéng caka le manusiay. Manga ata oné bui, maik nai, nuk, agu wakard linga di’as, agu ngancéng lélap nia kaut wan. Ai moséd manga oné molor, di’a, agu naun. Maik do ata moséd linga, maik isé cama ného oné buis. Ai nuk, ngoéngd, agu wakard ciri bui latang te ata do.
Mori Yesus wuat le Mori Keraéng Ema nggéré oné lino te ba gérak kamping salang nendep manusia ata manga oné bui. Manga ata nisang nai agu mai ruis oné gérak hitu. Maik isét beti nai agu penong le ndékok, rantangs gérak hitu. Ai naid toé jari, ciri bui latang te ata.
Mai ga ité ruis gérak de Morin kudut ciri gérak kudut ledo oné mai bui de ndékok hitut nendep
Junggu nuk, rani nai, racang rak te wéwa kréba gérak mosé kolén hi Kristus
Kamis, 11.4.24: TpGR (Kis) 5:27-33; Msm 33; Yoh 3:31-36
Yesus Kristus pandé radak le manusia, maik pandé langkas le Mori Ngaran. Pandé mata le manusia. Maik pandé mosé kolé oné bong le Mori Wowo. Ai Hia mai éta main toé oné mai tana lino ho’o. Hia wuat le EmaN te widang Nai Nggeluk latang te manusia kudut loas ciri werus. Sanggéd ata tunti de Mori Yesus (sanggén rasul) pandé rantang agu réings lisét adak agama. Maik isé racang rak, kantis ati toé, junggu nukd te wéwa agu tombo hi Kristus hitut poli to’a wa boaN, mosé koléy. Isé toé manga rantangd, koném ré’ings le adak agama agu isét jaga mbaru de Morin. Isé céwé rantang agu junggu oné Morin po kamping manusia.
Céing ata molor émé mai oné mai Mori Wowo, hia bombong agu lory nggéré oloy, koném pandé ropo lata doy. Céing ata momang Mori Sombang hia bobak kin koném pandé rowa le poti loha. Mai ga junggu nuk, rani nai, racang rak, te wéwa kréba gérak mosé kolén hi Kristus.
Ca weras ciri beka, ca mongko ciri do latang te ata do néténg golo
Jumat, 12 April 2024; GpTR (Kis), 5:34-42; Msm 26; Yoh 6:1-15
Émé ca’o-ca ata toé henan oné nai dité mai oné mai manusia, sanggéd situ mora le rud. Maik émé mai oné mai Morin, toé ngancéng pandé mora de lite. Koléng sanggéd wintuk ata mai oné mai Morin cama ného koléng weki ruN Morin. Émé ité kolé toé pandés wintuk agu pedé de Morin wajo le rantang manusia, nitu tité cama ného koléng Morin kolé. Wéwa Mori Émba, tombo Mori Molor néka rantang kodo data do néténg golo. Hitu ata pandé le sanggén rasul (ata tunti) de Mori Yesus oné bacang te can leso ho’o.
Morin hitu gérak agu watu kota te sémbéng ité kamping céing tité te rantang. Hia pu’un slamak ata nanang lata. Hitu taé de Masmur leso ho’o.
Morin sémbeng agu titong ité. Hia kolé palong tombo molorN kamping ata do. Sanggéd situ cama ného mosé nai ata pandé mberes wakar agu nai de sanggén rasul agu ité. Maik Hia kolé téing mosé nai latang te weki dité. Hitu bao ata tombo de Injil Yohanes. Mori Yesus pandé beka lima roti agu sua mongko ikang. Oné berkak de Morin, ca weras ciri beka, ca mongko ciri do, kudut mosé data do néténg golo.