Le Inosensius Sutam
Hi Stefanus poli mbelén lisét Yahudi. Hi Saulus kolé ranga onéy oné wintuk da’at hitu. Maik sanggén rasul situ cama ného wasé agu tété wasé poli ri’o agu pandé beté maik isé ludung agu dangka do, raés kolé waked. Nitu main isé ciri pu’u agu haju mésé oné imbi, oné rai ati, agu racang rak. Dara de Stefanus ciri waé te waéng waké agu worang tonas. Og waké calér nggéré wa, saung bémbang nggéré éta; ntewar wua, wécak wéla. Hitu bao pandé agu wintuk de rasul, ného hi Filipus, oné bacang te can.
Sanggén wintuk rasul de rasul manga waké agu wuan, ai isé wuat le Mori Yesus. Hia poli wuat le Ema, kudut ba roti mosé tédéng lén kamping manusia. Cir wini imbi oné Mori Yesus agu EmaN ngong haéng wakén mosé, cau mbaun, ipit oné cingn, londa oné tonasn.
Émé cir wini imbi, haéng wakén, koném tepo pu’un agu dangkan, héur saungn agu wuan, maik manga todang kin tonas, ludung kin pu’un, raés wakén, bémbang saung, lender kin rengkan, repas kin wuan.