Londang ketas weki ngo le rami. Selek kope one awakd. Manga ata tipa luni. Manga kole ata ba lewing. Lut agu ro’eng koed. Ngela keta rangad. Imus isung.
Apa rajan? Kali manga bantang de ase ka’e dise, ngo julu kaba ata mata meseng mane reb. Keba kaekn no… nai.
Kaba hitu rei de’it lata minggu olo. Nanang weli lise kut paki rame congko lokap mbaru gendang. Toe teing lihat ngaran ai kut laki anak ngason hia.
Co’o kong toe matan kaban hitu, egen mbolot one puary. Cait kolang leso mese walis tana.
Mantar ata laseng ngo caling kaba hitu hemong ngo caling agu tei wae liha leso hitu. Mantar hitu temo labar paki mangka lau natas mbaru gendang.
One natas mese hitu laseng labar dise agu hae reban haeng mane tana. Eme toed benta lata tu’a, toed kole. Ko eme toed nganceng ita lise mangka situt labar wajol nendep tana ga itu po kole mbaru.
Co’oy di panden? Bantang agu ase ka’e do one beo ga. Julu kaut gi. Pati gici koe nurun.
Di’an kali ga toe manga lewang le ase ka’e one beo hitu. Ai laseng nggitun muing rewok ka’eng beo. Renceng mose ka’eng ca golo mese.
Bo koe hitu ai julu kaba mata wajol mbolot. Co’o hot julu kaba mata hena le bambo lite ga. Wajo keta kali.
Danong eme julu, toe bajar muing. Laseng gereng poli ako po bajar.
Bo kali bajar tu’ung lise du hitu. Maik manga kole ata ku’ak. Toe gorin te bajar. Tama poli hang nuru.
Ata ceangn kaba hitu ga iset pecing. Laseng ceang kaba laing. Ise ata pecing co’o anor kudut pati nurun neteng weki. Ot pati pisay lorong bantang cama agu hiat ngara kaba.
Maik toe nia ngoeng kaut hiat ngara kaba. Paka bantang cama, reje lele ketay. Lelo taran kaba. Eme mese agu bece, lorong nggitu de do bilang atan.
Eme rapak bantangn ga, toe manga ata lewang kole ga, itu kali pu’ung ceang ga.
Reme ceang kaba ne nggitu manga de ata lipet ko gumeng te ceha nuru. Co’o mole lise cehan nuru du reme nggitun?
Lelo lise, eme ita nuru ata kopn, itu kali emi lise na’a one lengkak musin. Be musi mai tara bate lonto ngotok diha gereng kin ce ngata ata koe. Tipa kin luni koen.
Eme ita hentit riti di ema, agu mbelos nuru, gelang-gelang nggokok ro’eng hitu pili nuru hitu.
Maik manga kole ata toe manga hese ro’eng koe be musi. Nuk diha ga gereng cengkali to’ongs di po pilis na’a one luni ko tuduk mole kaut one rengka betong kauts.
Sot nenggitu de tara mangan moncok ketas nuru wa laca, ruis lengkak. Og de cabi one deko nuru situ. Itu mangan rapet dara one boto deko. Itu tara nggo’on caron lata tu’a danong ga, ole penong nuru ceha de kraeng hitu dara muing lengkak.
Mai nitu main ga, og de mangan tandik laing one cekeng curup raja pali bana.
Eme manga ata do keta tombo jogot, benggat lewang wajol toe do koed pati nuru. Ngga’ut jai jauk m’taung wajol nuk campit toe do koed nuru situt tiba diha.
Eme denge de lihat pati nuru situ, itu kali nggo’on wantil diha, “Ae … ai bom hanang hia bo atan ga. Co’om tiba le nisang nai kaut. Toe gereng keta neho dara lengkak po wedang le senang. Toe gereng pesek cecer mese po reges lima leke. Tawa lima gantang.”
Demeng bules le cumpeng de tombo situ ga.
Itu tara nggo’on, eme manga cimpa, paka tiba le nisang nai wali di’a. Ai bom cai le jajis bo. Bom reding le welis. Tiba kaut ata ita di. Naka ata mangad wa ranga.
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.