Neteng kaut cekeng walis, do keta kreba mata ko meti mata wae. Wae bate teku lete leso. Matan kali ata mangan ga. Toeg manga waen.
Le hitu gah mangan de hindi haes kawe wae kudut inung, cebong agu waca kakus. Ai neteng mbaru te ho’on ga manga taung kilo latang te oke jambang agu te cebong bonen mbaru.
Konem kolang neho nia kaut leso, paka nganceng haeng wae. Ai bom nganceng po’en masa wae. Bom nganceng caling le inung tuak kudut mora masa wae. Bom nganceng le tuak teneng hang agu reok ute. Nenggo’o terus kaut lete ntaung dugu cekeng walis.
Bo elang nggerone pemerenta toe beteng. Mangas ata nganceng waled le pemerenta. Mangas ata toe di ngancengd. Maik mangas ata waled toe kin nganceng haeng paten kudut nganceng cela one mai baeng wae ho’o.
Hitup kali go, rodo tewurs jauk neteng weki. Neho one cekeng walis ntaung olo lau natas Nampar peh. Woko lonto cama wa natas, towol rongko dise Ndondong, hi Ndandu agu hi Ndanda, hi Totu agu hi Rondu.
HI Rondu ata pu’ung tombo. Tae diha gah, ”Ole … copeln daku weli lima cerigen wae so’o bao e. Cadot cang ngo musi dapur ended Ndaung, mbetar woro waes kaut wae sua cerigen.”
Ca’op kaut li Totu, ”Hitu kaut gaukn baeng wae walis, tombo laing ketas bowo wae. Dakun kanang gesar hanang koeg e … de Mori ce pisa keta nganceng campe le pemerenta baeng wae ho’o ge. Ai neteng kaut walis dite ho,’o, toe manga tombo bana, tombo kreba meti wae kanang.”
Mai tae di Ndondong, “Donde laku denge tombo de pemerenta nenggo’oy: tama keta manga wae pu’u. Maram tadang one mai beo hot baeng wae, nganceng campe le pemerenta ba loleng beci ngaiy nggerone beo hitu.”
Mai ca’op di Rondu, ”Bo hitun e Ndondong. Maik manga kole tombo mbuku mbeket hamol kole pelitik. Denge kole laku tombo nenggo’oy: hitup molor koe pelitik beo de meu hitu ta … hitu wa ga, konem ciek neho nia meu, woko toe one beheng tukengn ema bupati agu wakil bupati, remon di kudut dengey tai ciek de meu hitu.”
Mai celot di Ndanda, ”Bo ita dakun ite … eme tu’a ko ngasang ema muing ema bupati agu wakil bupati situ, neka koe ba one pelitik eme kudut mo’eng mose sanggen taung ro’eng. Ai bom bae apa gami pelitik. Maik woko arong lata pelitik so’o kole gah, lorong kole lami. Bom bae apa gami, kaling nenggo’oy rencun.”
Mai tae di Ndandu gah, ”Bo dakun ite … ai lewen saep wae ho’o gah, lewen kole elang agu pemerenta gah. Odang ge, toe tara ita nentin. Aram keta nenteng selek pemerenta dite so’o gah.”
Dion kole di Ndondu. “Dakun ta … toe toen elang agu pemerenta e, toe toen wuli weki de rud dite. Damang de ye, bo barong wae tite ho’o toe ke’et, maik toe keta manga wuli weki kudu mo’eng mosen mata wae, kudut mo’eng mose dite koley mata wae.”
“Tu’ung hitu e Ndondu,” tae di Totu. “Kudut tungku taud agu nuk di Ndondu gah, damang de teti ata werun koe ba weki dite ho’o one barong wae ntaung musi ge.”
Mai tae di Ndondong, ”Eme nggitu ge, neka dopo one lonto ho’oy tombo ho’o. Damang de ba lau Mbaru Gendang kudut menteng nuk nggerolon tombo dite ho’o.”
Mai tae di Ndanda gah, ”Ma’u e … hitu ata di’an rimba hitu. Kudut wewa sanggen ska’e beo le Tu’a Gendang ce pisa. Kudut nganceng bantang cama keta dite hitu. Ai neteng kaut cekeng walis dite ho’o, toe kaut manga tombo bana, tombo denge kreba matas mata wae neteng beo. Nenggitu kole mata wae de ru dite.”
Mai kole tae di Ndondong gah, “Eme nggitu ge, neka rempe kole dite ho’o gah. Ce sua wie Minggu ngo lau Tu’a Gendang tite ho’o, kudut ruda olod ce pisa tombo dite so’o gah. Toe manga gereng tau dite hitu. Ra’up lau Mbaru Gendang ce sua le wie hitu.”
Betuan tombo de Kraeng Nampar so’o bo gah, toe poli laing nggut agu ngga’ut agu pemerenta neteng kaut cekeng walis, cekeng meti mata wae. Tombo meti mata wae dite ntaung ho’o gah paka kengko ata werun koe wintuk agu ba weki.
Icin ga, neka poli le tomboy kreba matan mata wae. Paka mo’eng mosen lite mata wae le gempur agu gejur.
Ngong rencun gah … selek kope, pola bancik, tiwit belak haju. Weris lite ga kudut meser tai wae usang nggerone mata wae loleng haju situ.
Cala le hitu kole gah cengka nuk agu nai de pemerenta kudut lelo tu’u tu’ung tombo meti mata wae so’o nggerolon gah.
Baca juga artikel terkait KAMBE MATA WAE atau tulisan menarik Hubert Bogos lainnya.
EDITOR: Redaksi Krebadia.com
Hubertus Bogos, pencinta Mata Air dan perintis gerakan Sabuk Hijau Manggarai.