Le Tuang Inosensius Sutam
Don mongko lonto, do kolé ronggo pandé do’ong. Don mangkang lawa, manga kolé watang lamba oné salang. Don lérém lonto pédék léwén kolé sékék. Hitu bao ata séngét lité oné bacang te can. Manga rintuk tau oné gauk disét Yahudi ata imbi oné Mori Yesus. Rintuk hitu bibisy oné isét Yahudi ata curup Yunani agu isét curup Ibrani. Iné wai luang disét curup Yunani, toé haéngs le intur oné mosé ca leso-leso. Hitu ciri ca mendo latang te sanggén rasul. Og, sanggén rasul réjé lélé, bantang cama, pinga wintas kudut ita ata di’an, potok tombo kudut caca mbolot. Émbong lonto-léok sisé kudut lélo ata lérosn. Nau oné lancung, ongko tombo. Nitu main impung ata pitu situt tenung le Nai Nggeluk. Pilé sisé kudut ba cikéng, pili sisé kudut ba cing oné imbi.
Kudut cingn imbi, paka ngaji lété bari, tadang oné mai mosé waé wajang. Ité tara Mori Yesus hedong oné mai ramé raés. Ngo oné pocoy. Ampil oné ngaji, pandé meti wekin. Maik le wié, du nendep tana lino, ata tunti de Mori Yesus ngo oné sanos oné ca wangka. Du hitu manga warat éros. Og to’on bombang mésé paki wangka disé. Rantang sisé. Maik du hitu Mori Yesus maiY agu lako lobo waé sanoY. Rantangs ata tuntin. Maik taéN ngong isé “néka rantang”. Mori Yesus mangay oné salang mosé dité agu oné osang ka’éng ongko mosé dité (lingkungan hidup). Hia ambi kuni agu kalo ka’éng dité. Landing hitu pocon lé, tacikn lau, du usang ko lena, du warat ko buru sesol. Néka rantang. Ai Mori Yesus toé pencang oné wejang, toé ledong oné leso ata situt poli pilé te cikéng, poli pili te cing imbi.