Le Tuang Inosensius Sutam
Réis (Salam)
Endé-ema, asé-ka’é, anak koé, ata uwa, sanggén taung ro’éng de Morin ata ca nai agu cak nuk one Mori Yesus, agu ata momang Mori Yesus agu ata momang Liha. Leso ho’o, ité randang leso Minggu te patn cekeng prapaskah. Cekeng te ité mengkek agu jengkek gauk, ba-weki, agu wintukd te randang sengsara, mata, agu to’o kolén Mori Yesus.
Kéot, nendep, mendo oné mosé dité (Masalah)
Mori agu Ngaran junggu (setia) tédéng kamping ité, maik ité wéntong oné mai ranga Diha. Wéléng moséd. Ngo oné pong dopo agu ngalor meti. Le hitu mangan rempé agu mendo (penjajahan) ata manté oné mosé. Sanggéd situ wajo le ndékok agu sala dité. Mata ngong hituy wuan ndékok de manusia. Maik Morin toé goriN te manusia mata le ndékok. Co’o salang slamak de Morin latang te manusia ata ndékok? Séngét lite reweng de Morin oné bacang nggeluk leso ho’o ata ciri salang gérak latang te mosé de manusia.
Salang gérak oné reweng de Morin (Jalan Terang Tuhan lewat Sabda-Nya)
Ata Israel lagé saké, wedi repi, lagéng taé, agu pandé beté reké de Morin. Mangan rugi agu rabon Morin. Og pandé gégo agu wuli nai agu weki de adak tana oné baling banca Israel te deko isé agu dadé isé te ciri mendis oné bali tana. Hitu ata séngét lite bao oné bacang te can ata emi oné mai Kitab Te Suan Tawarikh. Jari, mendo ata rempé (penjajahan) ata manté lisét Israél ciri salang de Morin kudut isé teser agu olé kolé moséd. Kalus agu wua ongga de Morin mangay oné tara banca bali tana ata deko isé oné mai kuni agu kalod, te okés oné tana tadang ata toé pecing lisé.
Wuan agu cemoln ndékok de manusia hitu mata. Betuan mata hitu toé ngong mata weki kanang, maik ngong mata wakar, nai ciri ngali. Hitu bao taé de Santo Paulus oné surakn latang te Ro’éng Serani oné Efesus. Séngét hitu lité bao oné bacang te suan. Maik Morin toé kodo manusiay, ata kodo Liha ndékok. Paka wégo ndékok hitut pandé wédol. Kudut po’é mosé loléng de manusia.
Landing hitu Mori Keraéng wuat Anak Lécan, Yesus Kristus te mata ciri takung laing latang olé kolé mosé de manusia. Hitu ata séngét lite oné bacang Injil Nggeluk leso ho’o. Mori Yesus koso jogot, wégo ndékok, tapa rangkat de manusia. Le hitu manusia haéng mosé tédéng lén. Yesus Kristus hitu ngong gérak latang te mosé de manusia. Maik manusia céwé ngoéng nendep. Pandé di’a, ba-weki di’a ngong gérak latang te mosé. Maik gauk da’at, wintuk da’at ngong nendep. Ité paka pandé redek (kerdilkan) nendep, pandé bébak agu mbéang gérak.
Pedé de Morin oné mai rewengN (Pesan dari Sabda Tuhan)
Te can, sanggén taung apa ata manté lité oné mosé ngancéng ciri salang de Morin te pandé slamak wakar agu po’é mosé dité. Émé ndékok penong béo, jogot penong golo, sala penong banca, nitu main manga mendo oné cenggong, manga nentid oné weki, manga saki oné nai, Morin ngoéng te ledong itu nitu mai. Hia toto toing agu titongN, wintuk agu adakN ata dong-kalin pa’it agu mendon noingn lité. Maik émé lut agu lorong lité, sanggéd situ ngancéng pandé lor agu bombong mosé dité.
Te suan, sanggéd ata siot pandé mendo mosé dité, isét lamba salang lako dité, néka walé le da’ats ata situ. Ai oné imbi kamping Morin, isé situ aik salang de Morin te pandé mésé agu léwé mosé dité. Hitus wintuk de Morin te pandé olé mosé agu nggéreng kolé nai dité.
Te telun, Mori Yesus matay latang te mosé dité, ité kolé paka pola mendo agu noing ného te matat latang te mosé d’ata do. Mata kudut mosé d’ata do ngong pélét léwé tédéng lén.
Cemol agu rekok (Penutup)
Mai ga ité lorong molor, pinga ata di’an, kapu ata naun, haéng saké, pandé leré reké, kudut cing imbi, helek bengkes, bobak momang kamping Mori Sombang. Amén.
Ruténg, 9 Maret 2024
RD. Dr. Inosensius Sutam adalah imam Keuskupan Ruteng, budayawan Manggarai, dan dosen pada Unika St. Paulus Ruteng.