Le Tuang Inosensius Sutam
Réis (Salam)
Endé-ema, asé-ka’é, wan koé étan tu’a ata momang Mori Yesus. Leso ho’o cama-cama tité randang takung misa nggeluk minggu paska te telun. Reweng de Morin poli séngétd lité oné telu bacang leso ho’o. Hitus papé, taé, agu wahéng de de Mori Keraéng te waéng waken mosé dité. Hitus curup, kudut ité kukut ata tu’ungn oné pucu, kudut itan lité luju oné mu’u. Pu’u luju mu’u agu lema emas dité Mori Keraéng.
Kéot, nendep, mendo oné mosé dité (Masalah)
Toé pecing agu toé baé hitu ca ba-weki agu wintuk de manusia, ata toé naun. Be-lé mai hitun, poli toé baé agu toé pecing toé kolé ngoéng kawé baé, pepil pecing. Toé ndorik oné toing, toé dindor agu rindo oné titong, Tambang da’at. Wajo le toé pecing agu toé baé mangan capu ata naun agu patun, capu kolé cama tau, toé ongko molor agu ata molor, toé rindang ata di’an agu isét di’a.
Salang gérak oné reweng de Morin
Sanggéd rasul wéwa ngasang de Mori Yesus. Hitu gori disé du poli to’o de Mori Yesus wa mai boa, oné mai ata mata. Hitu ata séngét lité bao oné mai bacang te can ata emi oné mai kitab pété gori de rasul-rasul. Isé ngancéng loréng apa ata poli pandé de Mori Yesus; pandé ina ata péko. Isé wéwa kamping lawa Israél te hi Kristus hitu Morin ata poli séndéng agu bong le Mori Keraéng. Maik isét Israél toé baé agu toé pecing Mori Yesus. Landing hitu isé toé tiba Hias. Capu lisé Hia. CondoY lisé on´hi Pilatus. Wiga Hia pangkot oné panggolY. Isé toé tiba Hia landing le toé baé agu pecing nuk agu wintuk de Morin. Wintuk te slamak de Morin toé danga tiba di’a le manusia. Oné weki de Mori Yesus rapak apa ata poli pangong agu taé le sanggén nabi. Taé disé, hi Mesias susa moséN. Landing hitu manusia paka teser. Te rapak salang adak de Mori Ngaran.
Maik do ata toé baé agu toé pecing wéwa agu pedé de nabi. Toé rapak salang de Mori Ngaran. Wintuk, gaukd, agu ba-wekid toé di’ad. Kudut rapak salang adak de Mori Ngaran, manusia paka wégo ndékok. Tapa sala. Hitu taé di Santo Yohanes oné bacang te suan. Maik émé pandé ndékok, Mori Yesus campé ité. Hia ngoéng te waci saki oné nai dité, te nul sanggéd kunu dité. Hia pandé olé mosé dité. Landing hitu ité paka pecing agu baé mbaté agu saké de Mori Kraéng. Pecing agu baé Mori Keraéng le imbi dité, hituy salang kudut ité slamak. Émé baé Mori Keraéng paka pandé agu raés sanggéd sakéN, agu pepil sanggéd cekiN. Lorong tombo de Mori Wowo hitu te pandé lor agu bombong ité oné mosé lino ho’o.
Pu’un bombong agu lorn mosé dité oné mai hi Yesus Kristus, hitut poli to’o wa mai boaN. Hia poli pandé radak mata, poli rongkas boa. Nitu main Hia toto wekin agu taraN kamping sanggen ata tunti (sanggén rasul), lut agu lorong Hia . Hitu bao ata séngét lité oné Injil nggeluk. Mori Yesus toto tara agu rangaN kamping sua ata tuntiN situt rémé lako nggéré sina Émaus. Hia toto réu liméN agu wa’iN situt poli tak agu pépék le pakud. Poli hitu tegi hang cama agu iséY. Mori Yesus toé baé agu toé pecing betuan Kitab Nggeluk. Mori Yesus cengka nuk disé te peci betuan apa icin wéwa agu tombo de sanggén nabi. Taé de nabi te hi Mesias hitu ba slamak maik hia susa moséN.
Pedé de Morin oné mai rewengN (Pesan dari Sabda Tuhan)
Icin reweng de Morin leso ho’o:
Te can, hi Petrus oné bacang te can, hi Yohanes oné bacang te suan, agu weki ruN Mori Yesus oné bacang Kréba Di’a (Injil) toing agu titong sanggén manusia kudut baé agu pecing salang slamak. Pu’un salang slamak hitu Mori Yesus.
Te suan, koném manusia toé tiba saké agu mai de Morin, wajo le toé baé agu toé pecing; maik wintuk slamak de Morin jiri kin latang te manusia. Koném manusia toé baé agu toé pecing Mori Yesus, hituy Anak Ata Rona de Mori Keraéng. Maik Morin pecing agu baé kin apa wintuk ata di’an latang te manusia. Kudut hia slamaky oné mai matan. Da’at de manusia koléng le di’ay le Mori Keraéng. Ndékok de manusia koléng le wintuk nggeluk le Morin.
Te telun, kudut ngancéng célung agu calingn mosé de manusia oné mai ndékok, paka manusia ta’ong susa. Hitu salang ata poli toton agu ité le Mésias ngong Mori Yesus. Émé kudut di’a olong lagé di ata da’at. Émé kudut molor, tapa di apa ata salan. Émé kudut nau agu patun olong wacis sanggéd saki, nul sanggéd kunu.
Cemol agu rekok (penutup)
Neho tombo sua minggu olo, paskah hitu ngong betuan taé de melajun ‘MELEWATI’ tombo Manggarain ngong LAGÉ. LAGÉ ATA DA’ATN, LAGÉ ATA SALAN, LAGÉ NDÉKOK. Betuan ngong ledong, ngong emo pandé ndékok, emo pandé da’at kamping haé ata. Teser, olé kolé mosé. Maik susa tu’ung agu toé émongn te lagé ata da’at. Susa tu’ung te holés agu teser oné mai ndékok. Mendon tu’ung te rapak salang slamak de Mori Ngaran. Maik le campé de Mori Keraéng ité toé toé te gancéng pandéd sanggéd situ. Mai ga ité raés saké de Mori Keraéng kudut ngancéng lagé sanggéd da’at ata lamba salang de Mori Ngaran.
Ruteng, 18 April 2021 (14 April 2024)
Te pecing laing: Emi oné mai toing agu titong ntaung 2021, maik ca-sua moso tombo célung agu caling.