Ase ka’en, nggitu kole sangged weta daku, neka hemongs tura ndekok, asis embongd boto rudas lemod.
Nggitu sala wewa de tuang pastor paroki ata tadang ketay one mai kota. Lorong tombod hae reba daku ata katu liha one WA daku minggu olo.
Tombo nia main ko nia main diha, toe manga rein laku.
Lorong tombo diha, tuang pastor hitu tu’a gi. Pitu mpulu ntaung umurn ga.
Wajol poso mole domong te tombo, mael mole cangkem. Itu tara nggo’on wewa diha du ca leso, “Aku ga kut hedongk no’o maig. Toe nganceng laku titongs meu ga. Do’ong olo aku ga, dungket musi. Olo toe todong aku. Musi toe uting.”
Tara nggitun reweng de tuang, ai pat mpulu ntaung mole hia ciri tuang pastor one paroki hitu ga.
Pecing le tuang sangged weki serani one paroki diha toe hemong lise tura ndekok. Maik hitu kin ba wekid toe nepi, wintuk toe nipu. Toe caling nai.
Ndekok hitum taung ata tura dise. Ndekok loma tau. Ngoeng agu wina data. Ngoeng agu rona data.
Woko nggitu tombo de tuang ga, weong laing le sangged weki serani. Momang keta lise woko nggitu reweng de tuang. Cait naisn kaeng cama laing one paroki dise ga.
Itu kali bantang sangged weki serani nitu ga. Toe denge le tuang.
Ngger olon eme mai tura ndekok, asi tura loma tau, ko ngoeng wina ko rona data. Sangged weki paka celung tura ndekok ga. Tura kaut “pa’u one ngali”.
Toe manga ata lewang bantang hitu.
Rapak du leso remong tura ndekok ga, itu ngo gici ca weki hitu one lo’ang tura ndekok.
Cai cengata tura ndekokn. “Ema, ampong koe aku ata ndekok mese. Aku one meseng pa’u one ngali.”
Senget le tuang, nehot sangged weki serani situ cewe do ata tura ndekok pa’u one ngali. Manga ata one meseng. Manga ata minggu olo. Manga kole ata neho baon di. Manga ata cengkalin. Manga kole ata lima ngkalin ga.
Co’o tara ne nggo’o tura ndekok dise so’o ga? Nggitu curup hanang koen tuang.
O ge, du ca leso benta liha kraeng kepala desa.
Rei le tuang, “Kraeng Kepala, ba nia ketas lite seng de negara sot poli tiba lite lawang ho’o?”
Wale le kepala, “Ai co’o leng tara nggitun rei dite ta Tuang?”
“Co’o tara toe pande di’ad lite sangged salang one desa dite ho’o. Denge daku, lawang ho’o do ketas weki serani ata pa’u one ngali. Maik co’o tara ndekok laing hitu lise. Do ketas weki serani, ata tura ndekok, pa’u one ngali. Nuk daku ga, am wajol pa’u sise, itu kali jauk caro ngasang dite. Itu tara nggo’on nuk daku, ite ata sala. Ai toe pande di’as lite salang.”
Woko nggitu tombo de tuang, tawa de kraeng kepala ko, leget keta. Nais tu’ung tawan. Ai pecing liha, co’o betuan “pa’u one ngali” hitu.
Rabo tuang, “Nganceng na tawa tite rei daku e Kraeng Kepala. Toe momangs lite ro’engm ko?”
Meseng toe tara wale le kraeng kepala, ai ruda kin tawan hia, mai tuang tombo kole, “Oe Kraeng, kut pecing lite e, hae kilo dite, one meseng mai tura ndekok. Hia lima ngkalin pa’u one ngali minggu olo ga.” Hehehe ….
Denge tombo hitu kraeng kepala ga, rembitn pa’u wan. Neho weter tuang. Lelo nggo’o le tuang ga kali ata boaty. Gelang campe le tuang. Benta agu anak ata ka’eng agu hia one pastoran.
Mai wantil daku kamping hae reba hitut katu tombo hitu, “Kesa, tombo ne nggo’o, ngasang, ata cir one wiwir. Teka lobo lema.”
Tara nggitun wantil daku, ai ma’ut gejur tombo koles le tuang pastor ndekok ata tura de umat ko.
Toe keta lasengn hitu. Toe kopn. Sangged ndekok ata tura de umat toe kut toto tombo olo-olos le tuang pastor. Apan kole tombo kamping rona ndekok ata tura de wina, ko tombo kamping wina ndekok ata tura de rona.
Meseng nggitu wantil daku ga, tawa hae reba hitu. Mai taen ga, “Tara tombo le tuang agu kraeng kepala, ai nggo’o nuk de tuang, co’o tara tura taung pa’u one ngali data so’o? Ai bom ndekok koe eme pa’u ko roba ga.”
Dengkir agu wekar kraeng kepala toe kin pecing le tuang ngong apa pa’u one ngali hitu. Maik kraeng kepala toe manga ngaok agu hae kilon, ai pecing one pening hi nana, weki run kole laseng seber pa’u one ngali … hehehehe.
Hitu ngasang, tombo data tu’a, cama-cama ngasar one ngampang, cama laing pa’u one ngali.
Poli hitu ga, mai taed hae reba daku hitu, manga tombo weru daku kesa. Manga cengata ata tu’a ema ngo tura ndekok one tuang pastor. Ai tiong Natal ga.
Laseng seber ketay ata tu’a ema hitu ngo tura ndekok. Toe hanang du cekeng Natal kanang.
Itu kali tura ndekokn one tuang ga. “Tuang, ndekok daku do da’at keta. Ata cewe mesen keta, minggu olo aku ngoeng wina datak.”
Denge kaut tura nggitu data tu’a eme hitu ko, toe rempe-rempe, sinan baka. Liut keta limen tuang pastor. Toe sokor cipa lata tu’a ema hitu. Calak noing liha koleg sua ngkalin repek le baka le lime mesed tuang pastor ga. Le main, lau main.
Poli hitu rabo tuang, taen, “Hau nukung keta ngoeng wina data. Ngoeng. Ngoeng terus. Toe tara posoh ko. Tu’a mole mosem ga.”
Hahahahahaha … lanar keta tawan hae reba hitut tombon.
Mai wantil daku, “Poli hitu ge. Co’o wale data tu’a ema?”
Toe manga walen ta Kesa. Pesot hese ga. Omar mohas pacu sua. Hehehe ….
Mai tae daku, “Ho’o haen tombo hio bao. Bae nia main lite tombo ho’o? Ma’ut tombo le tuang pastor ko? Hitu haen tombo hio bao. Teka lobo lema, cir lobo wiwir.”
Mai taed kesa hitu ga, “Eng e Kesa bo hitun. Maik ata mesen kali ta Kesa, neka pande bolek loke kut palang ngoeng le hae lomes. Pande woreng de hitu go’et na. Neka gengkes keta selek ceca mese kut palang lerem ata nio len, boto tungkal cala pere mese nitu len.”
Nggitu cemoln tombo de hae reba hitu, canggu tesi tombo bana ga. Tombo ngo pala tana tadang kut mose wina agu anak.
Maik eme ngo pala, neka kanang ata majak mata eme ita anak molas data, boto pa’u one ngali naim.
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.