Uuuu… ase kaen. Nia ngaok. Bengkes daku geal taung mose dite. Bolek loke, baca tara. Neka ndong nembeng le nendep.
Mai ga, tombo-tombo kolet di.
Du ca leso rame raes ketas aseka’e one ca beo. Lonto leok one natas wa mbau haju lupi mbaru ngaung.
Di’a ketas tombod. Senget-senget taud.
Cengata, hi Lolu ngasangn, tombo kole ca tombo ata tombo data one feisbuk. Toe tombo decuk de run. Ata tombo olo-olo. Olo-olo tombo.
Manga sala cengata ata tua ema pedeng reweng du leso kawing anak ine wain. Am hitu kanang anak inewain ata tua ema hitu.
Pede hitu di Ema latangt koan ata lonto jojop baling racap de anak inewai diha.
Nggo’o taen: “Nana, senget di’a lite, ata laring cain nggao momang anak inewai daku, aku, toe hau. Ata laring caing omo anak hia, aku, toe hau. Ai du koe main muing ga. Nggitu kole ata piara agu jaga hia. Aku de laring cain. Toe hau Nana.”
Poli hitu ga, canggu nesut agu koso lu’u one matan, mai taen di Ema, “Nana, bengkes daku, ai ite kali koa momang daku, lite de ngger olon raes hae kaeng anak inewai daku, dengkir tedeng len.”
“Jaga di’ay lite. Paka neka ongga, agu neka pande beti nain lite. Maik, eme ca leson tai toeg manga kop one nai dite ba weki diha, ko toeg momang lite hia, tegi daku neka tombo dungka one hia lite. Tombo kaut agu akuy, kut dia curu laku, dade kole ce’e mbaruy.”
Wale le ngetuk kaut le koan csnggu koso lu’u matan le setangan.
Do keta ata wantil pedeng reweng data tua ema hitu one feisbuk. Nggitu tombo di Lolu.
Manga ata tenang, nuk eman, ata poli rowan ga. Nggo’o taen, “De…senget tombo ho’o, aku nuk keta hi Emak.”
Manga ata wantil nenggo’on, “Eme jera kole anak daku le hau, hau laku ga, podo ngger le Mori Wowoh. Toe retang toko, toe rapet wae.” Hehehe…
Ata iwon ga, nggo’o wantiln, “Dee…nai lampuk keta one pucu lolo laku, pedeng reweng data tu’a ema hitu e….”
Mai rei data hae lonton, “Di’a keta laku wantil data hitut turung cemoln e Lolu. Maik co’o keta betuan diha, tara lampuk one pucu lolon taen.”
Mai wale di Lolu, “Bo laku, am nuk weki run e, Kesa. Am hia manga anak inewai ata tiong kaeng kilo gi.”
Mai-mai tae di Ande, “Bo nuk daku, Kraeng hitu hena one pucu lolo taen, tenang wintuk de weki run. Ai hia laseng ongga winan.”
Mai kole tae di Ande, “Asa dengep le meu tombo lau mau golo lau beheng e….Cengata ata maeng mese, maeng onlain ko co’o ngasang liset uwa ho’o ga, mbaut le semambu winan. Meseng toe teing seng le winan kut maeng onlain. Boat kut mata muing winan hitu.”
Ole…Ema Ande, ma’u e, denge laku tombo hitu one pisa. Ole…. Nana, leng keta wintuk hitu e. Ta Nana, senging koe tiba semambu dehau winam hitu e, neka koe mbaut le semambu haju hitu le hau. Co’o kali cemoln ngger olon ga.” Nggitu wantil di Kani, canggu imus.
Renggas tawa sangged ase ka’e nitu, denge wantil di Kani. Caid hi Kani ho’o, laseng keta pande roce one lonto leok.
Dee….ruda keta bekan tombo semambu hitu ga. Toeg manga senget taud ga.
Wan de cengata, renggas tawa. Wan kole wantild cengata renggas kole tawa.
Tara cemoln kali wajol, pu’ung li Lolu, tesi kole ai mane tana ga. Itu kali lut hia taungs weki situ pesot gici ca. Jouk hanang koen hi Kani wa mbau haju, ai ruis nitu mbaru diha.
Mai jaukn canggu laku ngo one mbaru, “Bo eme tombo semambu ise Nana, wangas ketas tawad. Neka ndong sangge labang kali sembambus hitu wa laun.”
Denge ko co’o le weki hitu laun, jauh di Kani, toe bae laku. Hehehehe….