Asa tingeng dite, co’o eme naring molas de ine wai le ata tu’a danong?
Ata nuk dakun ne nggo’o, neho rapang, molas anak de kraeng kepala ata cumang dungka lau natas one meseng laku e … ae. Molas tu’ung keta.
Eme neho tae, ranga’n lasar pandang. Pacu’n lasar pau.
Isung mongko. Tonggong neho moncok de golo Worok.
Wiwir mipis. Toe keta manga kimpur giguk’n. Toe wongos loncok mbako po … hehehehe ….
Eme lelo wuk’n lite ae … asi kaut ga. Ndois keta. Huwis neho lawe lenggong. Toe nganceng repa mata dite e … lewe tu’ung wuk’n. Haeng wa ritis nek’n.
Lerem eme pelet wengke wuk lewe. Toe nganceng holes kole du lelo ombeng kondeng wuk dole.
Co’ob molas hot jepek keta ta de.
“Tombo tu’ung ko Amang?” Rei de cengata ata koe reba.
“Hae, kut co’o betuan rei di Nana bo ga? Kut ngo kawe hi enu molas hitu ko?” Wale di amang hitut tombo.
“Eng ta Amang. Nggitu eme tombo tu’ung dite hitu bo. Dasor ite koe ata karong salang.” Wale di nana reba.
Mai tae di Amang, “Oe … Nana, ata tombo naring molas ho’o bao e. Ne nggitu eme naring molas ata tu’a danong.”
Danung kole li Amang, “Nana, eme mai wa mai nai dite nanang kawe kilo ga, co’o tara simpung ite. Ho’op ami tu’a ta de. Wajo ga. Bantang cama kali sangge dite ca natas labar. Reje lele renceng pesek lonto pedek.”
Mai taed cengata hae lonto nitu, “Manga ata cumang dungka daku meseng e Nana. Molas tu’ung keta. Neho keta molas di enu hot naring di Amang bo. Seber kole manga one hia.”
“Delek eme nggitu ta ite. Ngo lejong one beo hitut minggu musi. Maik olong bantang agu ise ema agu hi ende aku di. Manga walin laku agu ite ce pisa.” Nggitu wale di nana reba.
Itu kali danung tombo naring molas hio di amang bo ga. Ai toe kong danung bo wajol rampo li nana reba.
Uwa te ho’on ga lanar ketas ata molas di’a so. Balan kole mata data reba e.
Nggitu kole ata koe reba di’a. Lanar ketas. Am wajol hang di’a pe.
Poli hitu toe maleng kawed sabung. Nggitu kole bedak. Eme manga seng manga’g de bedak ko sabung.
Apan dami danong. Toe manga weang sabung. Roco mole le watu mongko eme kut pande nggelok, hehehe …. Mose da’at kaut ta …
Manga kole uwa te ho’on ga dedek mole pande reba di’a. Nggitu kole pande molas. Dedek ombeng cekoen kut eme pota lata rona ga molas … hehehe ….
Eme manga seng manga reba di’a. Nggitu kole eme manga seng manga molas di’a.
Itu de campit tara mangad apa ngasang sio ga. Siop ta nana. Mbaru siot pande ombeng wuk kud pande ciri molas di’a sio pe?
Mai wale de cengata ata koe reba, “Salon e Ema.”
“Eng pe Nana. Apa hitu. Ai bo dami danong eme caro salon ngong apa siot pende mese runing dere ko curup. Kali manga kole salon pande molas.” Nggitu wantil di Amang.
Le hitu de tara manga’d do ngoeng diset ine wai. Toe hanang ata molas. Ata tu’a ende kole nanang taung.
Wiga wuk rigit ndola pande ciri lembis. Nganceng kole wuk lembis pande ciri neket, eh, ngong rigit e.
Wuk neni ciri neho rembu latung’s pande’d lise.
Di’an kali ga toe manga benggat lata, ole … latung coko so wa laut nganceng ngo la’at taud … hehehe.
Bo bo di’an kole ai dedek gori weru latang’t ata uwa sot pecing pande nenggitu. Nitu disen kawe mose agu kut pande ombeng weki rud.
Itu tara nggo’on, uwa weru ho’o ga eme ngo duat data, pala kawe seng, toe hanang latang te weli mose kanang. Kut weli ombeng mose kole iwo.
Lelo kali lite ga, dedek lise ombeng wuk situ. Manga ata pande moncok lor ngger olo mbulit ngger musi.
Manga kole ata pande hele neho salang lawo one lupi ngampang.
Iwod lise ga nganceng na tunti neho rangga de rangang wa tana.
Co’ob nia kaut bet agu ngoeng de nai hitu. Lut-lut taud woko manga ata pecing dedek ombeng agu manga seng.
Wajol ombeng hitu de nganceng hemong tau.
Eme neho tombo de hae bela daku.
Cengata ata rona ngo pala tana tadang. Nais toe tara kole beo. Bo seng donde katu liha. Lete wulang. Ai co’o cemol te weli mose de hae kilon agun mantar koen.
Laun ntaung ga sinan liwa. Itu kali bet kut kole boe deit hi Keraeng ga. Kreba ngger one hae kilon. Naka agu nisang keta naid hae kilon. Nggitu kole sangged mantar’n.
Ca leso lelo li enu remo do kid seng one nggepe koen. Mai nuk koen, co’om ngo ndola wuk koe’g di. Pande lembis koes wuk neket so’o.
Itu kali ngon one salon hia. Toe beheng poli leleng leso hitu kid. Celu taran sa’i di enu ga. Mai one mai jinggam lepet ketas wuk’n ga. Ndilep kole.
Eme lelo one sermeng nais keta pelet. Toe pelet kanang ho’o ga canggu imus kole.
Cengata ata tu’a ema reme andor kaban. Teing remang lebo one salang ruis uma latung data. Reme keta dalo’d latung situ.
Reme nggitun ga lako one salang hitu hi enu. Ita li ema tadang main. Nukung kawe liha one nain. Ceing kali hio len ga.
Itu kali holes hi ema. Letet lelo hi enu wuk lembis. Maik toe keta kin cumang one nain. Ceing ngasang hi enu. Hae kilo diong.
Nukung kawe liha one nain. Toe tara cumang. De … toe noing li ema neho baon kaban ga do’i latung dalo one uma data. Remo dod ata poli do’id le kaban ga.
Calak holes hi ema ga, de … asi go, rapak ca galong koes ata poli do’i le kabad latung dalo situ ga.
Itu kali ndola li ema kaba hitu. Aru olo-olo. Maik simpung nain ga. De … nai le pai ketas laku bajar’d latung data so’o ga o.
Liwing one pumpuk li ema kaba. Pepek delem koe ndotuk’n boto nggosul. Hia ga ngo cumang dungka hiat ngara uma. Baro sala. Poli hang le kaba di ema ca galong koe latung.
Di’an kali ga latung sio bao toe latung data bana. Toe manga rabon hiat ngara latung. Naring kali lihat ngara latung ai toe ceha sala di ema.
Og de mangan bantang cama. Tombo ata kop’n. Pantil nai ngalis. Cumang taud bantang’d ga. Itu kali bilang kauts pu’ud latung situ ga. Gereng du gok latung’s po bajar’s li ema.
Du kolen hi ema ga nggut wa nain. De … nai wajol kaut majak mata sili salang, ngoeng holes ita hi enu ndilep wuk miteng aku bao ga o. Wiga temo toe poto kaba ata calang ngo hang latung data.
Cai one mbaru po bae li ema. Kali toe ata bana. Wote keta de run.
Mai tae di Ema ga, “Eng’p ta Enu ite ho’o bo ko? Toe keta pecing laku bao.”
“Ai co’o Ema? Ba’ang ite Ema hemong keta wote de rum.” Nggitu wale de woten.
“De Enu … wajol lembis agu ndilep ketas wuk situ tara mamur laku tara dite bo ga. Toe keta manga pamot cekoen laku bao.”
“Wajol temo porong ite aku bao du andor kaba sili salang, toe noing kali neho baon kaba hang latung data.” Nggitu tombo di ema agu woten.
Tawa kaut woten canggu taen, “Ta Ema co’ob boto jinggam bails wuk so’o ga. Cait tiong cai anak’m ga.”
Mai wantil de Ema canggu imus, “Nggitun ko Enu. Kali mengkek jepek kut madis tiba anak dami ata mai pe’ang mai ite itu. Delek hitu go Wote.”♦
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.