Le Tuang Inosensius Sutam
Réis (Salam)
Endé-ema, asé-ka’é, anak koé, ata uwa, sanggén taung ro’éng serani ata momang le Mori Yesus agu ata momang Hia. Leso ho’o Minggu Palma. Leso Minggu Saung Cigir taé data iwon oné curup Manggarai. Randang cama lité Mori Yesus ngo nggéré oné Béndar Yerusalem. Ité wanta raja agu nggewit wekid kudut lako cama agu Mori Yesus nggéré oné Bendar Yerusalem agu kudut cama-cama ciri ata Yerusalem te tiba Mori Yesus.
Kéot, nendep, mendo oné mosé dité (Masalah)
Manté lite oné mosé ca leso-leso naring, kepok, agu raés tiba data. Maik oné bari ca bana, ata situ téing tonid kamping ité. Isé situ ngoéng te pandé mata ités. Ité kolé dong kalid pandé ného nggitu naring ata ca leso, maik leso ca bana tombo da’at ngasang data. Séngét cama lité reweng newes de Morin leso ho’o.
Salang gérak oné reweng de Morin (Jalan Terang Tuhan lewat SabdaNya)
Mori Yesus léti keledai ngo oné Bendar Yerusalem. Landing be-bolon Hia wuat sua ata tuntin ngo oné ca béo. Te emi keledai hitu. Ai sékék le Morin. Na’a baju disé oné wekur de keledai kudut di’a lonton Mori Yesus. Raos nisang agu raos sanggéd ata Yerusalem naka agu tiba Hia. Canggu taéd, “Hosana, Anak Ata Rona de Raja Daud”. Hitu bao poli séngétn lité oné mai Injil de Markus du berkak saung cigir. Maik toé béhéng wa. Isét naring agu raos te kepok Hias, téing tonid agu wéntong rangad. Célung naid. Kodo Hias. Oké Hias. Hitu bao ata séngét lite oné mai tombo sengsara de Mori Yesus oné mai Injil de Markus.
Maik sengsara hitut manté le Mori Yesus poli pangongn le Nabi Yesaya be-bolon. Nabi Yesaya tombo ngasang de Mendi de Yahwe. Hia hitu poli téing tilu agu lema weru le Morin te tombo molor agu te séngét Mori Dédék, kudut mangan mosé réngkéng. Maik Hia toé tiba latay. Pola mendo. Randang oné sengsara. Tiba sanggén taung situ Liha. Toé manga léwangd. Ongga latay. Téing pacun te pak agu te kebut jagén lata. Téing rangan te iso lata. Mendid Yahwe hitu ngong Mori Yesus. Hia na’a nggéré wa rangN. Ciri radakY. Ngkonos oné mai bongn (dilucuti dari kemuliaan). Wéar oné mai néran (dijauhkan dari kecermalangannya). Hia lacoy (telanjang, kénos) oné mai rang de Morin (dari martabat Tuhan).
Maik Morin campé HiaY, agu manga agu Hiay. Ai Hia toé manga celan mosén oné ranga de Morin. Merep agu metek nain ného golo watu oné adak ata molorn, ata di’an, agu ata naun. Toé manga ritak laingn. Ai sengsara Diha, agu sanggéd kéta taung adak da’at ata manté Liha kudut célung agu caling mosé de manusia agu mosé de tana lino.
Pedé de Morin oné mai rewengN (Pesan dari Sabda Tuhan)
Pedé de Morin kamping ité oné lorong rewengN oné randang minggu saung cigir ho’o:
Te can, Mori Yesus ngo oné Yerusalem kudut pandé célung agu caling adak de Yerusalem. Hitu béndar mosé data do. Manga raés, manga adak di’a, agu randang. Manga manga kolé kosé agu ndékok. Ngoéng data do situt raos agu nisang tiba Hi ate Hia ciri adak laingY latang te isé. Mori Yesus baé ngoéng agu bengkes disé. Hia ciri adakY maik toé latang te weki de manusia. Sriga Diha toé oné Mbaru Adak (istana) de tana lino ho’o. Maik sriga de Morin oné wakar agu nai de manusia. Le hitu weki de manusia ciri Mbaru Nggeluk de Morin.
Te suan, Mori Yesus ngo nggéré oné Yerusalem léti keledai. Keledai hitu tanda hambor latang te mosé de manusia. Hia hitu lorong ata molor, junggu oné apa tu’ungn. Ité paka ciri keledai de Morin. Ngong campé haé ata, éko ata, kudut isé ngancéng cumang Morin agu dumpu mosé di’as. No’o ite ciri keledai te lonto agu dadé cama haé te lako nggéré oné mosé raés agu randang (hidup yang baik dan bahagia). Yerusalem hitu ngong utesn (pusat) sanggén raés, di’a, agu randang. Nitu manga mbaru de Morin. Nitu manga adak di’a. Landing Yersualem mosé dité paka condo agu Morin boto pa’u oné ngampangY.
Te telun, isét Yerusalem poli naring agu raos tiba agu naka Mori Yesus. Maik isé kolé ata ciék te pangkot oné panggol Hia. Oné mosé dité néka manga ba weki nai rambang bali agu tuka rambang sua.
Te patn, isét Yerusalem nisang naid agu raos naka Mori Yesus oné saung cigir (palma). Oné ntaung osang mosé ongko taung (Tahun Ekologi Integral) ntaung ho’o, ité naka agu raos naka Mori Yesus oné saung ata weri dité agu seménan ata manga oné baling ité. Sanggéd saung agu haju ciri salang ten aka Morin agu Ngaran.
Cemol agu rekok (penutup)
Asé-ka’én, néka rantang ciri radak mosé te pandé di’a mosé nggéré olon. Te pandé di’a mosé data do. Hitu bao ata ita lite oné salang ata poli pili agu pilé le Mori Yesus. Néka nanang sriga (tahta) oné tana lino ho’o. Maik te pandé rempé ata. Raos agu naring data néka pandé hémong ndékok. Pandé rindang sriga di’a te bincar ata ciarn oné mai Mori Bija. Kudut ciri manusia ata penong li’ang (subur) agu linga (kebebasan).
Ruténg, 24 Maret 2024