Paskah Hitu Ngong LAGÉ te Paéng Saké de Mori Keraéng

 Le Tuang Inosensius Sutam

Réis (Salam)

Endé-ema, asé-ka’é, sanggén taung ro’éng de Morin, iné-wai-ata rona, ata koé-ata uwa, wan koé-étan tu’a. Tabé leso paskah. Leso ho’o tité cama-cama randang leso paskah. Leso, to’o kolén Mori Yesus wa mai boan. Hia to’o koléy, ngong koda agu kala mata hitut rantang laing litét manusia tédéng médé main dengkir te ho’on koday le Morin.

Kéot, nendep, mendo oné mosé dité (Masalah)

Oné mosé dité dong kali dité toé ngancéng to’o oné mai ba weki da’at dité. Toé ngancéng LAGÉ salang da’at, toé ngancéng LAGÉ salang canggun ba mendo. Ité toé ngancéng lagé hitu-ho’o te paéng agu te ita di’a. Ata copéln laingn, ité LAGÉ saké disé amé situt pandé raés. Landing hitu séngét cama-cama lité reweng de Morin oné randang paskah leso ho’o.

Salang gérak oné reweng de Morin

Paskah hitu oné mai curup Ibrani, pesah ko pesakh, curup Yunanin pascha/paskha, curup Inggrisn passover ngong betuan ga lewat ko melewati, ko melampaui taé de Melajun, LAGÉ taé ditet Manggarain. Pu’un agu wakén curup LAGÉ hitu oné mai Kitab Keluaran (12:23-27). Du hitu oné tana Mesir, Morin mai te ba nangki agu calang, te mai mbelé anak ngaso disét Mesir, maik woko ita dara jimbal ata palas oné para mbaru disét Israel LAGÉ kaut Liha. Émé manga di’a téing latang isét Israel, maik émé manga da’at lagé kaut isét Israel.  Isét Israel LAGÉ Tacik Ndéréng, isé LAGÉ satar mambak, LAGÉ Waé Yordan kudut ngo oné tana baté reké de Morin. Dod di’a agu da’at ata LAGÉd lisét Israél tédéng lakod oné mai Tanah Mesir nggéré oné tana reké hitu.

Telu bacang leso ho’o toto agu ité nuk agu ba weki te paska hitu ngong LAGÉ

Oné bacang te can séngét cama-cama lité, hi Petrus LAGÉ salang agu béo, kudut ngo cumang hi Kornelius, tentara Roma. Hia LAGÉ adak data Israel te néka cumang ata Roma. Ai isé ata pandé rempé (menjajah, menindas) ata Israel. Hi Patrus agu sanggén rasul  rantang LAGÉ disé, wuka agu LAGÉ para mbaru osang tepengd, ngo nggéré pé’ang cumang ata do, agu ciri waé nggéreng, ciri sakasi mosé kolén Mori Yesus. Hi Petrus agu sanggén rasul wuat le Mori Yesus kudut LAGÉ tana rud, LAGÉ watas tanad, te ngo néténg golo, te tua néténg nuca, te randang néténg banca te wéwa kréba di’a. Icin kréba di’a hitu te hi Kristus to’o kolé wa boan kudut pandé slamak sanggén ata néténg tana.

Oné bacang te suan, ata emi oné mai surak de Santo Paulus latang te ro’éng serani oné Kolose, séngét cama lité taé di Paulus: te ité paka LAGÉ nuk agu ngoéng de tana lino oné mosé dité. Ité paka kawé agu ngoéng apa ata rapa étad, nia wan mangan hi Kristus. Émé oné bacang te can, ité paka LAGÉ tana de rud te ngo oné temu tana lino, kudut  wéwa kréba di’a, oné bacang te suan, ité paka LAGÉ tana lino oné ngoéngd agu oné nukd kudut cumang agu Morin rinding toni.

Oné bacang Injil, séngét lité hi Maria Magdalena, hi Petrus agu hi Yohanes LAGÉ rantangd, LAGÉ salang ngo oné boa de Mori Yesus. Cai oné boa isé LAGÉ para boa, te ngo oné boa boné. Hi Yohanes LAGÉ watas nukn, agu ciri imbi te Mori Yesus to’o kolé oné mai ata matan. Sanggéd isé LAGÉ nuk de manusia, kudut nggéré oné nuk de Morin, te Morin to’o wa mai boan. Hituy imbi, imbi oné to’o de Morin oné mai ata mata.

Pedé de Morin oné mai rewengN (Pesan dari Sabda Tuhan)

Oné telu bacang leso ho’o, séngét lité te paskah hitu ngong Mori Yesus LAGÉ (melewati): Hia LAGÉ boa, ngong LAGÉ tana data mata, kudut  ngo oné tana data mosé, Hia LAGÉ nendep ngo oné gérak,  Hia LAGÉ mata  kudut mosé kolé.   Du hi Petrus agu hi Yohanes LAGÉ para boa de Mori Yesus, kudut cumang Hia oné osang baté loling rapuN, Mori Yesus LAGÉ para nuk, para wakar, agu para nai de Petrus agu Yohanes ného nggitu kolé de sanggén manusia. Le hitu Mori Yesus LAGÉ boa, kudut ngo ka’éng oné nuk, wakar, agu nai de manusia. Mori Yesus ngoéng te waci saki oné nai, nul kunu oné pucu agu óne nuk de manusia. Le hitu manusia ngancéng LAGÉ ndékok ngo oné mosé nggélok agu nggeluk. Le hitu sanggéd ité ngancéng LAGÉ ba weki da’at, caling nggéré oné ba weki ata nepid, LAGÉ wintuk toé nipu nggéré wintuk ata rindukd, LAGÉ gauk rasung, caling nggéré oné gauk ata naud. Ité ngancéng LAGÉ ata salad nggéré oné molor, LAGÉ da’at nggéré oné di’a, LAGÉ ata waud agu ata ning laingd nggéré oné apa ata bengé agu néndongd. Nitu main ité kolé ngancéng LAGÉ mendo, LAGÉ kéot agu nendep mosé dité, nggéré oné mosé ata geal agu gérak;  LAGÉ watang oné salang, LAGÉ ronggo ata pandé do’ong, nggéré salang rangkang agu korong bombong.

Cemol agu rekok (Penutup)

Betuan sanggéd LAGÉ kudut ité haéng saké de Mori Keraéng ata ba raés agu paéng. Émé ité ngancéng pandéd sanggéd LAGÉ so’o lorong salang paskah de Mori Yesus, hitu betuan ité ngancéng LAGÉ manusia manga dité ata penong le da’at, te ciri manusia werud, te loas werud oné Nai Nggeluk de Mori Yesus. Cemoln tai ga, ité ngancéng LAGÉ tana lino ho’o te mosé cama oné osang de Kristus ata mosé tédéng lén. Amén.

Tabé Paskah.

Kudut pecingn: Emi oné mai toing agu titong sua ntaung olo, oné Stasi Tado, Paroki Rekas, 16 April 2022. Maik manga ata lengasn ca-sua moso curup.