Le Tuang Inosensius Sutam
Réis (Salam)
Endé-ema, asé-ka’é, sanggén taung ro’éng de Morin, iné-wai-ata rona, ata koé-ata uwa, wan koé-étan tu’a ata imbi Mori Yesus ata poli to’o wa mai boa. Ité randang cama leso minggu te suan. Yesus Kristus poli pandé radak mata, redek nendep.Hi Kristus, jimbal paskah poli koso jogot, éko ndékok, tapa rangkat néténg tana.
Kéot, nendep, mendo oné mosé dité (Masalah)
Ita oné mosé ca leso-leso dité ita lité woléngn mosé ditét manusia: manga ata mésé, manga ata koé, manga ata bora, manga ata lénggé, manga ata mberes manga ata niwi naés, manga ata imbi oné Morin-manga ata toén, manga ata mberes imbin-manga ata toén, manga ata ngancéng lagé mberes de tana lino ho’o-manga ata kukut le mberes de tana lino ho’o. Mai ga ité séngét reweng de Morin leso ho’o.
Salang gérak oné reweng de Morin
Sanggéd ata imbi Morin mosé ca oné nai ata ngalis agu ca oné wakar ata gawas. Hitu salang mosé de weki situt laring cain imbi Morin landing le wéwa kréba gérak de sanggén rasul. Hitu bao ata séngét lité oné bacang te can lorong Tombo pété Gori de Rasul (Kisah Para Rasul). Isé pika taung paéng te mosé cama laing oné momang kamping cama tau agu kamping Morin. Koném toé do paéng ceca, maik isé paéng widang de Morin hépak kéta.
Widang de Morin hitu tiba lité oné sakrameng: sakraméng cebong agu sakraméng ekaristi. Tiba sakraméng cebong ngong ité loas kolé te ciri weru oné mai Morin. Sanggéd ata loas oné mai Morin tiba mberes mésé ata ngancéng pandé koda tana lino. Mberes mésé hitu ngong imbi dité kamping Morin. Hitu bao ata séngét lité oné bacang te suan ata emi oné mai surak te can de Rasul Yohanes. Taé de Santo Yohanes, loas oné mai Morin ngong ité momang cama haé agu momang Morin. Momang agu imbi Morin ngong ité pandés sanggén prénta agu saké Diha agu tadang moséd oné mai apa ata ning Liha.
Morin hitut imbi agu momang lité ngong Hia hitut poli to’o wa mai boan. Mosé koléy. Mai cumang itéY. Hitu ata manté le sanggén rasul ného tombo de Kréba Di’a (Injil) de Santo Yohanes leso ho’o. Mori Yesus Kristus cumang sanggén rasul. Hia ba kamping isé momang agu widang surga. Maik Hi Thomas, ca rasul ata toé manga du mai de Mori Yesus oné osang ka’éng disé. Toé imbi le Thomas wajo le toé ita le mata run. Mai taén: “Émé toé di ita laku pakét paku oné liméN agu toé di puci mosog oné palang lewo paku hitu, agu toéd puci limég oné pucuN, toé kéta imbi cekoén laku.” Maik alo leso du poli hitu mai kolé Mori Yesus. Du hitu manga hi Thomas. Mai taé de Mori Yesus ngong hia, “Puci oné pucu Daku mosom, agu lélo limé Daku, agu puci onén limém oné pucu Daku! Hau néka toé imbi kolén, maik imbi kali ga.” Nggipos walé koén hi Thomas, “Yo Mori agu Mori Keraéng daku.” Mai taé de Mori Yésus agu hia: “Landing le poli ita Akum, tara imbim hau. Mosé di’a isét toé ita, maik imbis.” Imbi hitu ngong lélo le mata nai agu séngét le tilu de wakar. Toé hanang lélo le mata sa’i. Hitu ata toé mangan oné hi Thomas. Aik nggitu kolés rasul situt iwod.
Pedé de Morin oné mai rewengN (Pesan dari Sabda Tuhan)
Reweng de Morin oné telu bacang leso ho’o, rokot pedé latang te ité.
Te can, ité paka neki ca oné nai kudut manga ngalis ka’éng bari, neki-ca oné wakar kudut manga gawas ka’éng tana; neki-ca cing oné imbi kudut manga rinding ka’éng cimping. Ngalis nai, gawas wakar, cing imbi hitu betuan paskah.
Te suan, koném koé mosé dité, merik weki, pélét le lénggé, ka’éng oné niwi-naés, maik émé cing imbi, bobak momang kamping Mori Sombang, mangay mberes mésé oné mosé dité. Mberes hitu oné mai Morin. Imbi kamping Morin ngong loas oné mai Morin ata pongo agu potoky oné sakraméng. Mberes hitu ngancéng pandé koda tana linoy.
Te telun, imbi kamping Morin ngong lélo agu ita le mata nai, séngét le tilu de wakar. Le hitu ité gancéng imbi tombo agu reweng de Morin koném toé ita le mata sa’i.
Cemol agu rekok (Penutup)
Lorong reweng de morin oné telu bacang leso minggu paskah te suan leso ho’o, paskah hitu ca nai oné ngalis, ca gawas oné wakar, ca cing oné imbi te randang Ngaran. Randang Mori Ngaran ngong imbi Hia oné nai agu wakar koném toé ita dungkaY le mata sa’i. Ampil ga Mori Jari oné nai, randang Mori Ngaran oné wakar.
Ruteng, 7 April 2024