Eme denge pecu, manga de ata roce laing. Apan kole eme pecu lempok.
Pecu hot kepet le morin pe, maik temo kaut cekoe hia lempok kin peang. Calak kepet kole liha ritin ga, toe ga. Peang’n ga. Itu tara toe danga lewe keta runing koen. Hehehe ….
Manga pecu sulut. Toe ngaok. Hentit kaut ata ngaran. Solol peang’n pecun. Toe denge lata hae lonton.
Tara baen lata ga ali noing waun. Apan kole eme noret keta’y pecu hitu tadu taung isung data. Nganceng kut roa muing.
Eme manga pecu ne nggitu, itu kali babang lata hae lonton, “Ceing hot pecu ta?”
De.. adi mose eme nggo’o tae dihat ngaran, canggu teti lime toso ngger eta, “Aku ite. Neka rabo. Ai waun a?” Hehehe ….
Rei kole. Ina itu bo tara babang’n lata wajol noret. Eme bengen bo, com nesut kaut … hehehe.
Eme ata jomel toe kepet pecun. Konem manga atan baling hia. Lego kaut nekn. Pande mpirang kole neng’n. Apan kole eme hanang koen.
Manga cengata ata tua ema du lari koe dami danong. Jomel mese keta’y. Eme pecu hia pande runing. Lego nek’n gici koe. Lego kepet. Lego kole kepet kole. Gejur keta bilang. Mpuk ca. Mpuk sua. Mpuk telu. Ngaceng haeng cepulu hehehe ….
Raos keta tawa hae lonton. Manga ata tawa demeng kepet isung le lime. Nuk kaut lite, co’o eme tawa demeng kepet isung. Tawa kungkeng.
Manga kole cengata guru one ca sekolah mede. Pecing toing ata kut dere. Dere kor.
Ca leso nungku dere kor hia agu sangged murid’n one gereja.
Laseng’n hi tuang guru eme kut pu’ung dere itu kali emi ca perkakas one mai cikang dekon. Garpu tala ngasang’n. Ongga one sa’i run. Manga denge runing liha. Poli hitu ga itu kali teti liha dere lut runing garpu tala hitu.
Du ca leso ge. Neho diang leso Minggu. Benta taungs murid de tuang guru. Kut ngo nungku dere one gereja.
Cai one gereja ga. Mentuk taungs murid situ. Toe cengatan ata husi hasit. Co rantang nggulak le tuang guru. Be le mai nggulak tong ngga’ut. Eme toe tara pinga ngga’ut ga itu de mangan nggetok. Itu tara lik ketas murid situ.
Reme nggitun ga itu kali werus le tuang guru garpu tala one mai cikang dekon. Poli hitu ponggal one sa’i run. Teti di’a na’a ruis tilu kut senget runingn.
Reme di’an senget runing karpu tala hitun tuang guru, tuan kaut runing pecu de cengata ata koe sekola, uuuuuuukkk … hehehe.
Tawa data koe situ ko. Raos keta. Toeg tawa guru ga nggulak lelo ata koe situ, canggut rei, “Ceing pecu, ceing pecu, ceing pecu?”
De … ceing ata walen. Tambang moles tawad ata koe situ ita ranga mbulak de guru … hehehe ….
Ngong pecu hitu bo. Ceing weli lite ata nanang ko bengkes keta cai pecu. Asa nggo’o taen, de nai nahe manga koe ata pecun one lonto dite ho’o tong.
Ko asa manga ata ngaji, Mori Kraeng Ema senget koe tegi daku lite. Nahe cumang koe ata reme pecu aku leso ho’o. Hehehe ….
Eme manga ata ngaji ne nggitun am loer wedol lata. Ko benta bapa lata. Am toe bapa kaut. Bapa bengot keta.
Aku cengkali mante deit senget tombo data. Kali ca o ca sot ogo dite ko rangkat ketas lite ngaceng du ca leso ga nuk laings lite. Bengkes agu nanang ketas lite.
Apa sot laseng pande ritak ranga dite laing, kali nganceng pande mose ite laing.
Apa hitu ga? Hitu bo ngong pecu hio. Simpung eme toe cai’y. Soang keta eme toe tara losa’y. Ai nganceng pande beti laing de. Cemol’n ga mamur nawa.
Eme cai gi. Itu kali conga ngger eta canggu ngaji, Mori wali di’a lami kamping ite ai cai pecu ga.
Senget tombo hitu, tawa ata hae lonto daku. Mai tae daku maram tawa tite. Am roce lite tombo daku. Maik tombo tu’ung ho’o.
Hae bela daku hitut bengkes pecu bo, ca leso ka’eng one mbaru sakit. Lami hae kilon ata beti. Poli operasin ga.
Nais wa ga simpung keta hia. Nggitu kole sangge’d ase ka’en. Ai toe tara cai pecu dihat beti hitu.
Reme keta mentuk ise one baling mai wongka dihat beti hitu, itu kali saok liha, mai taen, “Cai pecu daku ga. Maik pes kaut.”
“Itu ta. Delek o Mori. Wali di’a lami.” Wale’d sanggen ase ka’en.
Toe rapat gereng kole de ronan hi enu hitut beti bo ga gelang ngo baro one dokter.
“Dokter, tabe. Cai pecu di ibu ga. Ho’o di.” Nggitu baro de ronan hiat beti.
“Ya, delek hitu ga. Ina hitu keta ata gereng dakun kole. Geal weki di ibu ga. Mose hia ga. Asi simpung ga.” Nggitu sala waled dokter.
Nggitu kole cengata ata koe sekolah one asrama. Wajol ritak hi enu. Cait ata koe molas. Kumet pecu. Le le hese hi enu le le kumet.
Nais wa ga itu kali hole hotes hia. Pasar beti tuka. Mai hae belan ga dade one mbaru sakit.
Cai one mbarus sakit mai perawat tebang tukan. Ling. Bae le perawat do buru one tuka di molas.
Mai tae de perawat hitu, “Enu, eme deket pecu ite tong lego kaut lite. Asi kumet. Toe manga co’on.”
Ngetuk kaut hi enu molas. Toe beheng wa ga itu kali ondang liha cai pecun. Nukung keta ga. Ole, noret hitu ko, nembur keta.
Toe benggat le perawat. Pisik-pisik toe bae kaut lise.
Nais wa ga rei le perawat, “Asa enu cai pecum bo ga?”
“Eng Ibu.” Wale de enu molas.
Mai tae de perawat, “Itu ta. Nisang woko nggitu. Ina beti dite tong ga.”
Di’an kali ga toe beheng wa itu kali kole hi enu molas ga ai ina beti tukan ga.
Am nggo’o toing le perawat hitu, ngger olon eme nanang pecu, pecu kaut. Neka kumet. Te co’on ligot lite pecu hitu. Emo seng ata ligot dite … hehehe ….
Mai wantil de cengata ata senget tombo hitu, “Tu’ung keta de toing data tu’a e ase ka’en. Eme pa’it neka gelang loa. Eme mecik neka gelang kodel.”
Ai toe sanggen taung apa sot pait pande copel mose dite. Nenggitu kole, toe sangge’d taung sot mecik pande nisang nai laing’s.
Mai tae de cengata ata reba ga, “Aku mante deit bacang tulis data one WAG. Nggo’o tulis’n, ba weki de cengata ko cengata nganceng baen lite one mai pecun.”
Canggu tawa sangged weki situt lonto cama nitu, mai rimbang de cengata, “Damang de tombo ruda lite e kesa. Ami senget.”
Mai kraeng reba hitu ga tombo. Nggo’o tulis nitu. Eme ata laseng pecu mpirang, ata hitu toe laseng ceha rewengn. Nggalu ade keta agu hae ata.
Eme ata sot pes kaut pecu’d, ae ata situ laseng toe ngaok. Hema kauts. Eme manga itan, pedeng one nai kaut latang te weki run kanang. Toe danga nggalu ade agu ase ka’e. Donde udeng one mbaru.
Mai cengata rei, “Eme ata sot laseng pecu lempok ge?”
Wale le kraeng hitu, “Eme laseng pecu lempok, ata hitu donde gelang rabo. Toe ngaceng kumet cumpeng. Jomel. Rapi-ropos keta tombon. Toe nganceng na’a tombo. Wad keta kali.”
Laseng pecu mpirang mai agu repang. Ata situ toe na’a reme mangan. Toe tinang reme itan. Toe maring reme cain. Wajo keta kali. Toe pecing ligot.
Laseng pecu pes agu noret. Ata situ laseng lobo mu’u kaut di’a agu hae ata. Wa nain ga kanang ata rangkat. Lanar babang ngasang data. Do tombo jogot hae golo.
Asa leng tu’ung a? Hehehehe ….
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.