Le Tuang Inosensius Sutam
Réis (Salam)
Endé-ema, asé-ka’é, anak koé, ata uwa, sanggén taung ro’éng serani ata momang Mori Yesus agu ata momang Liha. Ité randang Minggu te liman cekeng prapaskah oné leso ho’o. Cama-cama pandé nggelis wekid, nggalas wakard, agu pandé ngalis naid te curu randang paskah ata pandé slamak wakar dité.
Kéot, nendep, mendo oné mosé dité (Masalah)
Oné mosén manusia dong kali lagé saké ata poli taéd. Wedi repi ata poli pepild. Lengga kena. Hong pongo ata poli potokd. Beté reké ata poli leréd. Toé ujung curup. Toé ambos jaong. Oké ata moséd, nanang ata matad. Toé junggu agu sundur oné ruku. Toé bong Mori Wowo. Toé séngét Mori Dédédk. Nitu main ga, mosén toé paéng waké. Toé lendar oné beka. Toé bémbang oné saung. Toé wécak wéla. Toé nunda oné wua. Co’o kudut waké caler, saung bémbang mosén manusia? Mai ité séngét reweng de Morin oné leso minggu ho’o. Hitu salang langkas. Gérak néran te po’é mosé dité.
Salang gérak oné reweng de Morin (Jalan Terang Tuhan lewat Sabda-Nya)
Koném poli lagén le Israél saké ata poli pandén agu Mori Keraéng. Maik Morin ngoéng te werus saké weru. Tadangy oné mai saké manga. Mori Keraéng poli ledo Israél oné mai mendi tana Mesir. Maik isé hémong émbong de Morin. Hitu bao ata séngét lité oné bacang te can. Morin te raés kolé saké agu isét Israél. Kudut hémongs Liha ndékok disé siot pandé wédol oné béo. Tapas sala ata pandé mata ka’éng tana. Saké weru hitu te pantil oné naiy. Kudut waci sanggéd saki, nuls kunu oné pucu.
Nitu main ludung junggu agu sundur oné ruku. Raés kolé saké kudut manga paéng ata maméd. Wantil oné ngaji kamping Jari. Pepil weki te tegi kamping Mori Ceki. Sanggéd wintuk rinduk situ nipus oné hi Kristus. Hia tenung mosé nggeluk. Og séngét le Mori Dédékn. Hitu bao taé de surak nggeluk latang te weki serani oné Ibrani. Oné bacang te suan. Hi Kristus toé hanang ngaji. Maik junggu agu sundur koléY. Lacang oné sengsaraY dengkir matan. Landing hitu Hia ciri waké agu pu’un te randang slamak latang ata oné temu tana.
Mata te randang slamak ngong pepil oné weri. Weri ceki agu ba weki ata nepid. Weri wini kudut manga cing oné haé diding. Manga todo oné haé lonto ka’éng golo. Manga beka oné weta. Manga haéng oné asé-ka’é. Hitu bao taé de Mori Yesus oné Injil Nggeluk. “Émé wini gandum, pa’u wa tanayd agu matay, hia te do wuan”. Ca mongko ciri do, ca weras ciri beka. Ca dako ciri ca langkok. Ca léké ciri ca cécér. Bong mosé ngong paka ngoéng pa’u wa tana, agu mata. Poli hitu po todo. Repas wua do. Nitu main porong lata do néténg golo. (Memuliakan hidup berarti jatuh ke tanah. Mati. Lalu tumbuh. Berbuah banyak. Baru dilihat banyak orang di dunia). Mori Keraéng bong AnakN. Maik wuat Hia oné tana lino. Ciri wini gandumY. MataY. Ai weri wa tana. Todo. Wua do. Te mosé ata do. Nitu main slamak ata oné tana oné mai darém. Darem de weki. Darem de wakar agu nai. Bong de Morin ngong ngo nggéré wa. Wa’u wa tana. Saki wa’i agu weki. Dempul wuku tela toni. Poli hitu po ngo nggéré éta. Saung bémbang nggéré éta. Uwa agu wua.
Pedé de Morin oné mai rewengN (Pesan dari Sabda Tuhan)
Asé-ka’én apa pedé de Morin kamping ité oné mai rewengN ata poli séngét lité oné leso Minggu ho’o.
Te can, ité paka noing agu pecing sala oné rangad, jogot oné golo, ndékong ka’éng béo. Émé lanar sala, émbong ndékok, ongko jogot. Betuan hitu ga, ngong mosé disé dong kalid lagé saké de Mori Keraéng, wedi repi de Mori Ceki. Landing hitu ité paka teser kudut helek. Mori Dédék géréng itéy. Kudut lorong saké molorN. Ité paka wéntong oné mai ndékok. Kudut manga kolé émbong agu réwo ka’éng béo. Teser ngong raés saké de Mori Kraéng. Junggu agu sundur oné rukuN ata tu’ung kudut manga ludung kolé mut oné pucu de haé uku. Tenung kolé mosé werun ata nggelukn. Raés agu haéng saké de Mori Keraéng.
Te suan, Mori Keraéng ampong sanggén ité. Ngong ité kolé paka ampong cama haé atad. Pandé saké agu repi weru kamping Morin, ngong ité kolé ngoéngd te ujung curup agu haé ukud, pongo tombod cama haé golod. Kudut lor kolé mosé molor nggéré olon lorong potok de Mori Wowo ata penong le bong (kemuliaan).
Te telun, Mori Yesus rapang moséN (membandingkan hidupNya) ného wini gandum. Pa’u wa tanaY. Mata. Todo agu wua do. Kudut ciri pu’un slamak latang te ata temu tana. Mosé dité kolé cama ného wini. Toé ngancéng wuay oné mbaru boné agu oné roka, koném roka emas. Wini mosé dité ciri emas mongkoy émé todoy agu pandé bombong mosé data do oné ka’éng golo. Hituy po bonén pedé: ca weras ciri beka, ca mongko ciri do.
Cemol agu rekok (Penutup)
Asé-ka’én, kudut mangan bong (kemuliaan) paka ité merik nai te ciri ného wini hiot pa’u wa tanay. Maik todoy, lor, agu bombong oné molor. Hituy betuan raés saké ata poli pandén agu Mori Keraéng. Junggu agu sundur oné rukuN ata tu’ungd te pandé ludung. Le hitu mosé dité beka agu buary: ca weras ciri beka, ca mongko ciri do. Amén.
Ruténg, 16 Maret 2024