One pisa ntaung ho’o gah do ketas merek wae inung sot pika one tokong agu kios.
One kota Ruteng kaut manga aqua Ruteng, manga kole Hydro Fresh.
Di’an keta gah. Ai du cekeng rame gah, rame koe ko rame mese, toeg mangas tombo mas mata dise tanta ibu le cempong api kudut teneng wae inung latangt lawa rame. Senging teneng hang agu reok ute agu nakeng keta kali gah.
Maik aku donde nggut one naig. Bo di’an tu’ung latang lawa do mangad pika wae data bora so’o. Landing manga kole ba da’atn. Ai eme poli inungd wae situ gah, lorong hitu koles helad ko wecakd weang plastik.
Katut nenggitu ga, cala manga nuk naid ise kut cama laing pande perkakas kut tong weang one kota bone kaut meng. Ko delek keta eme campe pemerenta tambang koe weli oto kudut oke weang situ.
Mai nitu main gah, iset ngara dagang so’o gah, nehot lise kaut kuasan tana hot emi waen lise.
Ata neho rapang tombo aqua Ruteng. Toe manga dengen di tombo ot tedeng len kaut mangan usaha aqua Ruteng ho’o. Ai eme toe manga watasn hitu bo mangan tae gah.
Nehot ise kaut morin tana hitu gah.
Am bodokn ko toe kopn nuk daku. Cama neho gejur teku wae kaut ata dagang so’o. Ai teti kaut le mesing one mai tana peh. Poli hitu cahir neteng botol plastik. Poli hitu pika gah. Bom manga welin liha wae hitu. Pika keta kali gah.
Am ata cewe bodokn kole nuk daku ga … Ai neteng detik, menit, jam, agu lete bari kaut elongn wa mai tana bone wae hitu. Toe keta baen gah, ot neteng menit hitu koley cain wae nggerone tana be wa hitu.
Eme nenggitu tu’ungy, ngong toe kaut manga taungn tai wae bonen tana hitu.
Poli hitu kole gah, di’am toe manga ba da’at laingn latangt mata wae baling mai gejur dagang wae hitu … wae sot deming datat kerja sawa ko kerja ca’o ca sot perlu waes.
Kongd nuk agu nggut bodok daku situ bo gah. Cala nganceng nuk cama laing kudut tambang kole koes weri haju sot nganceng meser wae laings ngger wa tana. Neho rapangn weri haju ara.
Kudu le hitu gah, toe dopo kaut one tombo bajar pajak ska’e ata gejur dagang wae inung. Maik ise kole gah gori cama laing agu pemerenta ko agu ceing kaut kudut weri haju nia kaut ulu wae olon. Cewen keta baling mai bate gejur dagang wae hitu.
Tambang ketag ramen tombo dagang wae neteng beo dugu cekeng walis.
Ai dugu cekeng walis ramen saep wae. Rame kole nggut agu ngga’ut kamping pemerenta. Rame kole tilir agu gesar kamping Mori Kraeng.
Cang agu hitu kole ga, ramen kole dagang wae. Tama keta manga doi te weli oto agu weli cerigen mese ko cerigen koe. Teku kaut one wae lau pong hio ko nia kaut olon. Poli hitu elong le oto. Poli hitu lako gah neteng kampong pikad wae cerigen situ.
Toe nganceng toe welis lata wae situ. Ai co’o cemoln teneng hang, reok ute, ba one bak jambang agu bak cebong. Tae data dagang kali ga, manga seng manga wae. Bom weli bao liha wae hitu lau pong. Bom manga tombo pongo le ator de desa ko kecamatan ko kabupaten. Di’a tu’ung agu ramen kaut dagang wae dite leso ho’o gah.
Toe manga ramen tombo kerja mo’eng mosed mata wae.
Aikn kali ge lawa.
Baca juga artikel terkait KAMBE MATA WAE atau tulisan menarik lainnya Hubert Bogos
EDITOR: Redaksi Krebadia.com
Hubertus Bogos, pencinta Mata Air dan perintis gerakan Sabuk Hijau Manggarai.