“Ematu’a, mai ce’e Ite bo a?” Nggitu reis de wote weru canggu imus.
Toe wale li Ematu’a. Agu dion keta rangan. Ranga rabo. Toe kopn liha reis de wote weru hitu.
Di’an kali ga gelang wantil le hae kilon hi wote weru. Taen, “Neka rabo Ite Ematu’a, calang reis de wotem hitu bo ga. Toe pecing liha co reis eme lonto ne nggo’o. Aku ata salan ai toe olong toing hia laku bao. Cewen kole one beo dise toe manga wintuk reis neho dite ce’e.”
Mai wantil di Ematu’a, “Nggitun ko? Delek eme nggitu ta Nana. Ai eme toe e, nehot weki toe pecing, ranga toe rupa aku li Wote bo ga.”
“Somba Ematu’a. Ata calang reis de wotem hitu bo. Nggolong koe du ngongs. Nggoling du tonis lite.” Nggitu rewengd hae kilon hi Wote.
De … wajol reis hio bao ga ruda keta lobo mu’u de sangged ase ka’e ata lonto leok one lutur hitu. Pande beka kole lata iwon. Raos ketas tawad ga.
Lelo ranga de wote weru ga ndereng keta. Imiamas. Wajol ritak. Rei liha, nia kali ata salan reis daku ga. Inggos keta laku bo. Maik wa nai kaut. Toe pa’u pe’ang.
Di’an kali ga saok le hae kilon ata lonto ce cupu. “Asi simpung Ite, laku tombon agu sangged iset lonto leok.” Ngetuk kaut hi wote weru wale saok de hae kilon.
Itu kali pu’ung tombon reis hio bo ga le hae kilon hi wote weru.
Ematu’a agu sangged ema do. Nggitu kole aseka’e, weta, agu anak laing. Kut di’a pecing lite. One beo dise enu so’o toe laseng reis neho dite eme manga meka. Eme cai meka imus kaut iset ngara mbaru. Hitu disen ling reis.
Wajol losing wuat le inang hia bao ga itu tara panden liha reis neho ruku dite ce’e. Jari a ata reme nungkun bo wote dite ho’o. Do do rabod sangged ite.
Ata salan bo ga, hemong te toing co’o ata di’an reis eme reme lonto ne nggo’o.
Itu kali toi le hae kilon hi wote weru ga. Campe le weki lonto leok iwon tombo hitu.
Reweng reis toe de camas. Lelo comongn. Eme ata benta lites asekae, reweng reis ga nggo’o, neho rapangn, reis ranga ema laing le wote, “Ema hitu Tite bo ga?”
Bae one nain hi Ema ga, o … tu’ung ata poli bantang cama dise so’o kut benta aku ca one lonto ho’o.
Manga leng li Ema wale wokok kaut, “Io Enu.” Ngela de rangan hi Ema eme nggitu reisn lite.
Eme ata mai lejong beo lambu mbaru, toe pecing lite musi olong mai diha, dion de reis a. Eme poli lonto one loce meka ga, ite kole lonto paka di’a. Len reis dite, “Ema, mai ce’e Ite bo ko.”
Nganceng kole ne nggo’o reisn lite, “Ema, lejong ce’e Tite bo ko? Ko lako gula Ite bo ko?”
Wale de li Ema ga, “Eng Enu.”
Eme ata melet lejong ga, nganceng nggo’o reisn lite, “Ema, melet keta lejong. Kole nia maim bo ga?”
Remon wa ga, tesi lite meka, “Ema, neka rabo lonto di Tite, aku ngo be musi.” Itu kali pesot hedong dite ngo musi dapur. Ngo pande wae kolang.
Mai kole musi mai ba le dulang wae kolang. Na’a di’a wa ranga di Ema. Poli hitu ga hedong pesot. Lonto di’a one loce. Neka tadang bail agu meka.
Remon wa ga, itu kali tae kole lite meka, “Asa Ema, inungs ga.”
Eme lelo li Ema hanang hia kanang ata manga wae kolang, manga de nggo’o tae diha, “Hae, Enu, hanang aku bo inung ho’o a?”
“Eng o Ema, neka rabo Ite ga. Hitu koe di ami inung bo.” Nggitu lite walen.
Maik eme neho reis neho dite hio bao, hiot nggo’o bao, Ematu’a mai ce’e ite bo? Toe tiba di’a le Ematu’a, ai hi Ematu’a ata benta litey tara mai ce’en. Toe le ngoeng run.
Ngetuk kaut wote weru senget tombo de hae kilon, canggu taen, “Ematu’a neka rabo Ite bo ga. Nuk daku bo ga hitu ata kopn. Ai one beo dami toe laseng manga mbajik keta reis neho ce’e. Bo ngger olon ga toe manga calang kole aku. Ai pecing laku ga.”
Itu po tawa rangan hi Ematu’a agu inung wae kolangn ga.
Wantil li Ematua ga. “Eng Wote, delek woko ita lite bo ga.”
Danung kole tombo di Ematu’a. “Senget di’a sangges taung meut uwa hitu wa len e. Dite ce nenggitu de. Eme cai meka, laring cain keta reis. Eme poli reis ga neka legong hanang koen meka. Paka lonto cama agu hia di. Hitu ngasangn ga raes meka.”
Toe dopo nitu tombo di Ematu’a. Danung kole nekn, “Du lonto raes hitu neka tadang bail keta, maik ruis koe. Eme di’an de tombo ge, cait eme manga tombo roce, itu de manga tawa cama ga. Hitu ngasangn ga raos. Raos hitu ngong, neka tiba le ranga rengit meka. Maik le ranga tawa. Reweraes keta tombo.”
Tambang kole li Ematu’a, “Eme manga ata bana one mbaru hitu, neka denge cai meka pisik toe denge. Paka mai lonto cama keta agu meka hitu. Hitu ngasangn ga ras.”
Cemoln toing di Ematua ga, “Neka hemong situ le meu: reis, raes, ruis, ras, raos.”
“Eh … hemong laku ca kole. Neka mendo mu’u ditet ngara mbaru, eme toe manga weleng mbako dite ko toe manga dumpu cepa, tesi di’a. Ite, neka rabo Tite, toe manga weleng mbako ami. Nggitu kole cepa. Di’am manga lerong koe Dite.” Nggitu toing di Ematu’a.
Manga kali wale le meka, “Ma’u ta Ite, rongko cama mbako ho’ot di. Cepa kole ata ca saung koey.”
Danung le Ematu’a, “Maik eme manga, neka tae toe manga, kali mangkang kid kala ata na’a sili loce be wa. Neka tesi pisik ningkir, kali pidik kid sili lupi siding.”
Poli hitu ga, mai tae di Ematu’a ngong asen, “Asa Ase, don tombo do e, com olon tombo Dite ge. Maram ruda keta tombo bana to’ong ta, tama poli tombo betuan liup impung dite mane ho’o.”
Itu kali teti tuak asen hi Ematu’a ga, len reweng reis agu kapu sangged asekae’n. Poli hitu ga itu kali tombon liha betuan padir wa’i rentu sa’i cama laing.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.