One ca leso, rodo teka kaut rei de Kraeng Rikus hae lonto daku one kema sekek kawing.
Nenggo’o rein: ”Paeng puruk dite keta tombo Sabuk Hijau ho’o ko?”
Mai tae daku, “Ai co’o tara nggitun rei dite ge.”
Wale diha gah, ”Ai bo denge daku olo main, dite muing ngaran agu wangka laingn olo main gah. Maik denge kole laku awo Matim one minggu olo. Nehot de kraeng hitu awo morin tombo Sabuk Hijo ho’o”.
Mai kole tae daku gah, ”Toe kole manga salan eme manga tombo nenggitu, tama keta helek toto polokn peh.”
Mai rimba diha gah, ”Hitu ata tu’ung ne ite. Hitup tara paka nesa koep tombo pete diten e, ot hena taud ko toe tai tombo situ.”
“Ma’u e Kesa,” wale daku.
Helek muing laku tombon one natas “Kambe Mata Wae” Krebadi’a ho’o. Toe ici tuka ko ici nai agu utek de rug aku de tombo Sabuk Hijau ho’o–Sal Ta’a ngasang de Manggarain.
Aku teti one mai ca buku tulis de Kraeng Mochtar Lubis. Nenggo’o runingn pu’un tulis diha: “Lino (Dite) Ka’eng Lupi Ngampang Rawi Rewut” (Dunia di Tepi Jurang Kehancuran).
Lorong tombo diha gah, one ntaung casebu ciok ratus ciok mpulu pat keta di bentas sangged wartawan nggerlau Rio de Janeiro, Brasil, kudut lonto cama agu sangged ata bae polokn kreba holapn tana lino gah. Ngasangn lonto hitu gah “Summit on Earth“. Ngong tombo lonto leok da’atn kolang ko darap de tana lino gah.
Betuan lonto hitu gah kudut senget agu petang di’a tombo data bae polokn kolang de tana lino. Apa campin agu co’o keta di’an wintuk kudut pande lep koe cekoen kolang de tana lino gah. Ai bom manga ata ngancengn tuke nggereta awang kudut ngo culengn lewo de rinding ozon gah. Toe kole nganceng dumuk wa kaut pande puar koles puar so’ot poli ponggad.
One lonto leok hitu manga ata ali one tombo wusak de tana lino. Lete ntaung tae de ali hitu gah, tambang moran wusak de tana lino. Lorong hitu toeg manga mai dani gempur de ska’e tani temu tana lino.
Manga kole alin ata nganceng rekeng pa’un dani data tani lete ntaung. Toto liha one angka wa was maid dani data tani, wiga toe nganceng haeng le cekeng werud dani situ. Kanang ata tombo darum bilang ntaung.
Manga ali ata toto foto seng de rindingn ozon hot caka darap de mata leso, boto hena dungka darap hitu nggerone tana lino agu sanggen caoca.
Poli hitu, toto taungs foto ponggad puar cengit one lima negara liset ali puar. Lima negara situ gah negara Brasil, Nigeria, Filipina, Malaysia, agu Indonesia. Mede main gah, lima negara so’o keta ata tukeng agu tanjik laing “pucu agu rak” mose de lino ho’o.
Woko toto taungs foto nggosakn tana lino le moras puar, nenggitu kole toto foto lewon rinding de ozon agu taung wusakn tana lino le wartawan agu tulis de sangged ali gah, nitug de toto tu’ungn polok agu campitn holap de tana lino gah.
Le tae di Kraeng Mochtar Lubis gah, ”Woko perek taungs foto de wartawan agu tulis de ali beta lobo meja, doingn gah neho keta ciek camas one ca ciek agu wolal hele hobas lino ho’o le ka’eng one holap.”
Le holap lino hitu gah mangan tombo laing wintuk agu wuli weki de ska’e lau Amazona, Brasil. Toing agu titong one mai gereja kudu lai ca one bantang te dungkang darap tana lino. Mangan panden dise gah Green Belt (Sabuk Hijau). Ngong Sal Ta’a ngasang de Manggarain.
Kudut kukut tu’ung keta bantang hitu gah, og de widang sal ta’a neteng weki. Kudut le hitu manga kin bengkes kudut poleng kole koe puar koe one lupi mata wae. Agu te racang rak ata neteng tana kudut pola caman mendo kolang de tana lino one leso ho’o gah.
Sal hitu gah pongo one gelu wanang. Ata wina keta tekolon karong weri haju situ one lupi mata wae. Tara nggitun gah, ai ata wina keta atat lete leso ngo teku wae. Lise ata bae agu doing tu’ung toeg manga kembus wae teku le lewe len lena bilang ntaung.
Lau Mosambique kole manga pande nenggitu. Ngasangn gah Harambee. Cama neho leles agu dodo taed Manggarain. Ase ka’e beo renjang ketas ngo neteng mata wae olon, ngo weri haju kudut pande mbau koles mata wae le haju atat nganceng meser wae usang laing nggerone mata wae.
Rencun tombo daku gah, toe paeng puruk daku, toe tua one mai ici tuka agu ici utek daku tombo Sal Ta’a ho’o. Maik woko ciar keta ita di’an laku wintuk de ska’e lau Brasil agu Mozambique hitu, hitu tara mangan to’o get kudut tunti wintuk di’a dise hitu.
Neho keta pale neng gah cain kolang da’at one ntaung sua sebu campulu telu agu sua sebu campulu pat one kota Ruteng bate ka’eng daku. Lete leso tombo pa’itn kawe wae kudut inung cebong nawi perkakas dapur agu wewas pake weki.
Dod kole tombo mata agu metid mata wae. Bom laseng tombo nggitun danong main ka’eng kota Ruteng. Okot ces agu okot do wae kali.
Kolang ntaung hitu ata pande kengko koles tombo de Kraeng Mochtar Lubis one nai agu utek daku. Toe manga rempe kole gah, ngo cumang ase ka’e lau Desa Latung kudut bantang cama panden wintuk Sabuk Hijau, tunti pande de ska’e lau Amazona hio bo. Maik manga bekan gah. Sanggen ska’e tiba agu tukeng bantang hitu.
Mangan neng reke leso agu tanggel kudut mangan gejur weri haju neteng mata wae agu cake ngali latang tong wae usang agu ta’ang wae ronco, kudut nganceng meser nggerone mata wae. Infiltrasi tae de melaju elmu kambe mata wae (konservasi mata air)
Woko poli jimet bantang gah, hitu kali mengkek, weli di’as plastik koker gah, elong tana le oto, kawes belak ara. Di’as neng uwad belak situ tedeng pitu wulang. Tegi campe de hae reba gah kudut weli bancik agu linggis.
One wulang sua ntaung sua sebu campulu pat gah ra’up taungs ska’e ata poli hena le bantang. Tambang don weki gah, ai cai koles ska’e SM3T (Sarjana Mengajar di Daerah Terdepan Terluar dan Tertinggal) lau mai Universitas Negeri Semarang.
Le wien kengkel one mbaru gendang keta dih. Wan laku tombo rajan agu betuan wintuk Sabuk Hijau ho’o. Ai bo tombo holap lino ho’o, bae taung lata temu tana lino gah. Maik toe manga wintu was wintuk kudut caka koe cekoen darap de tana lino (Summit on Earth). Hitu tara mangan bantang kudut tunti pande diset lau Amazona Brasil gah. Kudut tambang menteng keta one nai agu utek gah, toe tunti dungka kaut Sabuk Hijau Amazona.
Sabuk Hijau hot pande daku gah tambang le cake jebakan air, ngali kudut tong wae usang agu caka ronco kudut meser nggerone mata wae.
Poli hitu toe weri kauts haju one lupi mata wae. Olong pande Teing Hang Dara Belak Haju dih one mbaru gendang, boto manga babang agu bentang le ceki agu wura. Agu boto manga do’ong le ronggo one gori de Sabuk Hijau hitu.
Turung cemoln gah, pande Misa Ekologis kudut condo nggerone Morin gori weri haju agu cake jebakan air. Ai Morin muing imbi dite kudut tiba agu berkak koe Liha gejur de Sabuk Hijau dite.
Icin gah, cangkali ba telu raja one Sabuk Hijau ho’o. Diten gah, telu salang situ gah: Salang Adat de Manggarai, Salang de Agama, agu Salang de Ilmu Konservasi. Toe manga lewe bail laku tombod situ. Jeper kaut kut teing gerak nuk agu pande ndeng cama keta Sabuk Hijau ho’o nggerolon.
One Sabuk Hijau ho’o kole pande laku “Rak” (Rencana Aksi). Neteng cekeng rame Natal paka pande Misa ko Ibadat Natal Ekologis. Icin gah, pande tanda mata rame Natal le weri Haju Natal Mose one lupi mata wae.
One Rame Leso Wae agu Puar Calino neteng tanggel sua mpulu ca agu sua mpulu sua one wulang Maret lete ntaung, paka manga gori weri haju ko besik mata wae.
Nenggitu kole one Leso Lino agu Leso Lingkungan Hidup poro neka lako liba kaut leso situ lete ntaung. Paka manga keta le’en one lino ho’o. Toe poli kaut le pol tombo one meja seminar ko diskusi kaut.
Le get hitu kole gah poro manga ca leson one ca lonto leok. Co’o keta tombon wae teku ho’o lorong lata bae polokn one mai agama (agama apa kaut). Co’oy tombon lata bae polokn lorong ita de adat Manggarai. Agu co’oy ita data bae polokn one mai Ilmu Konservasi Mata Air. Agu co’oy ita le masing weki ska’e neteng beo one wae teku dise lete leso one leso ho’o gah. Cama neho Konferensi Mata Wae. One melaju Inggrisn gah “Conference on the Wells” one mbaru gendang ko one natas tai nggerolon.
Peden gah, Sabuk Hijau dite ho’o ca wintuk agu wuli weki dungkang lite holap tana lino (global warming). Toe gereng wuli weki de pemerenta, maik paka wuli wa mai wake remangn (akar rumput) keta ata mesen.
Ca do’ong dite ho’o gah, toe danga do ata rimba di’an. Toe kole do ata wiwas keta tombo agu pande slamakd mata wae dite.
Landing neho tae kali gah, manga kin bengkes. Eme toe leso ho’o, am dod to’o agu totod nuk agu wintuk molor one leso nggerolon one mai neteng weki dite.
Neka mora bengkes.
Baca juga artikel terkait KAMBE MATA WAE atau tulisan menarik Hubert Bogos lainnya.
EDITOR: Redaksi Krebadia.com
Hubertus Bogos, pencinta Mata Air dan perintis gerakan Sabuk Hijau Manggarai.