Leso hoo bao tanggal 5 wulang 6 ntaung 2024, denge wero weong nai laing. Tombo mohas rowa Tuang Gerardus Janur sili Borong.
De….baes laing dite ge Tuang.
Tombod Tuang Luis ata hae ka’engn sili Borong, lawang ho’o Tuang Geradus dekit pande misa. Agu donde ngger eta Ruteng.
Poli hitu ga, tombo kole le Tuang Luis, lawang ho’o Tuang Garadus donde inung tuak, cama laing agu weki serani.
Mai taed Tuang Luis, am wajol leng keta kamern tara nenggo’on kaut cemoln bo ga.
Nuk kin laku tombo de Tuang Geradus du pastor paroki lau Beo Kina.
Du hitu ca stasi reme keta rungang pande kapela. Nais wa ga toe tara betet panden kapela hitu. Bo keta poli bantang cama du wangkan.
Mai bantangn agu weki one stasi hitu ga, taaaa…com pande pesta te. Tegi tompal momang de weki serani so ce’e.
“Co’o panden Romo?” Nggitu reid cengata weki serani one stasi hitu. Mai waled Tuang Geradus, “Pande neho pesta sekolap ta de. Aku lonto jojop bolo. Na’a dulang bolo mai ranga daku. Sangged weki ga mai cau lime agu aku. Maik neka na’a one amplop seng. Na’a dungka one dulang hitu. Ma’u toe ritak sise na’a seng kope ko. Porong kig aku.”
Imus keraeng hitut rein canggu taen, “Eng ta Romo maram nggitu damang ga.”
Rapak ca minggu wa ga. Og de pande pesta hitu. Paki ca ele mese kut tiba meka.
Neho ata poli bantang minggu olo. Lonto jojop bolo Tuang Geradus. Gereng weki ata mai cau lime.
Rame ooo…do weki serani ata mai cau lime. Ine wai, ata rona. Ata molas agu ata reba. Penong keta weki situ.
Laing keta taed Tuang, toe cengatan ata ba seng kope du hitu.
Co’o kong ba seng kope weki situ, egen mbileng kin matad Tuang, porong weki situ na’a seng wa dulang.
Rapak du cemol rame hitu, itu kali bilang sengd ga. Maik toe manga tombon le Tuang du hitu, pisad keta nekid seng situ. Dod kaut taen.
Poli hitu ga, mai taen, canggu imus, “Ole meu e, woko tegi campe gici koe laku kut gelang polin kapela hoo, mejeng keta heses. Bo woko pande rame mole gi, londang ketam mai cau lime ba agu seng. Kali do sengs meu.”
Toe manga wantil le weki Serani situ. Imus kauts.
Du ca leso manga kole ca tombon. Tombo ine wai molas ata toe tara nesa taeng lata reba.
Nggo’o tombon. Aku du ngo lau tana Jawa manga pede data koe molas one mai paroki daku.
Nggo’o peded, “Romo eme kole ite, neka hemong “oleh-oleh” ngong wua lime.
“Eng. Manga bad laku. Ngaji kali meu, kud di’a lako daku.” Nggitu wale de Tuang.
Rapak du kole, ba le Tuang, gici ca arloji koe. Manik laingd.
Rapak du cumang kole agu ise enu molas sio ga. Rei lise, “Tuang, nia wua lime ata pede dami beheng?”
Canggu imus isung Tuang, hamar cikang deko, emi arloji, teing gici ca iset cua.
Naka ketas ise Molas situ. Imus isung tawa ranga.
Mai taed Tuang, “Eme donde pake le meu arloji ho’o, wela toe repa ketas mata data reba porong meu. Toe beheng na’a rona meu ce pisa.”
Wale le tawa lise enu molas.
Mai taed Tuang Geradus, “Tombo tu’ung daku. Neka wale le tawa mole le meu. Damang le meu ce pisa.”
Ioo…toe beheng wa ga, denge le Tuang ga, poli nanang lata ise enu sio ga. Hehehe…
Mai wantil daku hitu, “Romo, am lemot keta nain hi nana reba lelo wejong lime dise enu. Cait wejong canggu nggeru arloji weru.”
Mai wanged Tuang ga canggu tawa , “Nuk dise arloji bod situt teing daku, kali manga icid.”
Maik toe toi le Tuang, ceing ko ceing enu situ. Nia wan beod. Ceing ngasang de hae kilod. Aik da.
Manga kaut bae le rud taen hehehe….
Delek kaut dise enu molas situ ga. Kome dalod. Ngain tiba arloji, tiba kole arloji mese renggeng hehehe…
Di’a-di’a lako dite ge Tuang lembak nai. Neka hemong ngaji latangt ami.