Tabe ase ka’en. Naka rabo, nais toe cumang tau. Di’am sehat?
Tombo de ase ka’e, ata ita laku one Whatsapp Group data Rahong Raya.
Madis tulis kole laku, ai halok le melaju iwon dihat ngaran, kut tombo kamping ite. Delek eme poli denge deit lite tombo hitu. Asi kaut senget lite ga.
Manga cengata ine wai one ca beo. Uwa kin. Reme nang wekin. Toe di nais. Am reme 3 ko 4 wulang. Hitu di anak laring cain dise.
Manik laing keta taran hi Enu. Molas di’a. Lerem eme pelet wuk lewen. Letet, benet muing eme senget rewengn. Itu tara lepot keta matan hi Rikus eme ita hi enu hituy. Hehehe….
Ca leso ngo bana hae kilon hi Enu. Ngo paing seng bon barang ata pika diha one tana tadang. Ka’eng hanang koen hia musi mai.
Poli di’a pede le ronan hitu, paka neka ngo bana hi enu musi mai. Ai bom toe poli pedeng sanggen ca o ca one mbaru.
Rapak ca leso ngo lejong one mbaru di Enu hi Rikus. Mbaru di Rikus dungka taud agu mbaru dise Enu hitu. Toe tadang koen. Ca kali natas labar. Bae li Rikus ngo bana ronan hi Enu.
Benta li Kraeng Rikus, “Uuuuu…Enu nia ngaok?”
Wale li Enu, “Ho’ok ite. Mai ga mai. De…nai pake kaut sendal. Asi lego nitud.” Tara nggitun tae diha, ai kut lego bolo mai paras sendal di Rikus.
Canggu imus hi Rikus, lonto di’a one krosi.
Woko poli lonto hi Rikus ga, Itu kali reis li Enu. “Ite, lejong ce’e tite bo a?”
“Io Weta.” Wale di Rikus.
Poli hitu, itu kali rei li Rikus, “Toe denge ngaok kraeng ho’o? Ngo banay a?” Pisik-pisik rei di Rikus. Egen ita one mai para tongang liha one meseng ngon hae kilon hi Enu hitu.
Wale li Enu, “Ooo Ka’e, ngo le Maumerey e. Ngo paing seng barang koen siot pikanp ta Ka,e. Ata tama ngo Ka’e. Lorong reke data situ beheng.”
“Eng Weta, nggitu muing, ai co’o cemoln. Cepisa kolen?” Pisik keta rei di Rikus.
“Dee…Ka’e, remo naisn, ai ata dos ata situt bon barang. Cewen keta eme rekes koles lata situ bajard seng situ.” Nggitu tombo di Enu.
“Oleee…Enu nggitun ko. Emet bae laku meseng, co’om benang laku te ngo hia reme nggo’on.” Nggitu wantil di Rikus.
Canggu agu melo keta rangan hi Enu, Rei liha, “Ai co’o leng tara nggitun taaa…Ka’e?”
“Eng Enu, pede lite hia. Asi nais bail le. Gelang koe kolen. Toe di’an de ngo bana eme reme weki mendo hae kilo. Neho ite pa.”
“Olee…Ka’e nggitun ko. Ta Ka’e toe pecing lami hitu e. Ai co’o neng tara nggitun ta Ka’e?” Nggitu rei di Enu.
Pisik-pisik toe walen hi Rikus. Lelo ngger eta lobo. Poli hitu mecol kole rongkon. Lego nus etan. Kembus keta. Etan nus, etan kole mata rikus. Porong towol nus hitu etan.
Gereng-gereng walen rei di Enu liha, toe tara tua.
Reme nggitun ga, hedong cekoen hi Enu. Ngo musi dapur. Toe beheng musi. Nehot diki dakang ketay. Mai kole musi mai, ba agu kopi. Ca mok kanangy.
Na’a di’a liha kopi hitu bolo mai hi Keraeng Rikus. Poli hitu ga, itu kali rei li Enu, “Ka’e, tombo ruda koe lite tae dite hio bao. Neka koe da’et cangkem agu benang ngerangm ta Ka’e. Ba’eng koe akuh.”
Senang nai Rikus ko, woko nggitu reweng di Enu. Tekar ketay. Maik ta’ong toe ngaok. Udeng kumet, toe losa.
Itu kali pande madis koe lonton hi Rikus ga, mai taen, “Enu, aku momang keta itek, cewen keta anak dite hitut le puar kin. Ko toe momang lite ko?”
“Deee…Ka,e co’ob tara toen ga.” wale di Enu.
“Hitup ta Enu, cait anak laring cain de meu hitu. Itup tara mai aku bao.” Nggitu wale di Rikus.
Danung kole tombo di Rikus, “Nggo’o Enu, denge pede data tu’a so’o aku, reme nenggo’on, toet lako bana hae kilo, ai toe di rapak taungs dedek wekin meka weru hitu one tuka. Am teme tilu koen, isung koen, wiwir koen, ko pali banan kole. Taaa…Weta bom toe baes lite sangged taung ata perlu mangad one itet manusia e.”
Lelo ranga di Enu li Rikus ge, simpung ketay. Mai taen ga, “De Ka’e co’o keta mole panden ga?
Wale li Rikus, canggu hus nai mese, “Itup ta Weta, co’o keta mole panden ga. Ai bom ngaceng lata bana bi. Weki run Keraeng ho’op keta kali ata ngancengn.”
Poli kaut tae nggitun hi Rikus agu pas poli taung kole kopin ga, itu kali tesi kut kole gi. Cait remo nendep tana ga. Boto ma’ut lata baling mbaru, agu boto babang lata pe’ang natas.
Wie hitu, hi Enu, toe nganceng tokon. Nuk keta liha anakn eme loasy ce pisa. Am toe kaut manga tilun. Ko ca kanang tilun. Am toe manga nua isung koen. Ko toe jepek wiwir koen. De…Mori ampong. Nggitu tombo hanang koen hi Enu.
Deee…nai….Pande dite e Nana. Musi toe olon ngo banam. Gereng koe poli loas akuh de. Nggitu tilir di Enu.
Mai kole wale le run, maik eme toe ngo muing hia paing seng situ, le pai mintur eme lonto wa aku ce pisa. Deee….nai….Cebel o nai. Anak daku o nai. Moriiii….coo mole keta gi.
Reme nggitun ga, dengeg liha kakor lalong. Maik toe di to’o ta’a hia. Halas kin one lece. Gereng gerang tu’ung keta tana po to’oy.
Rapak neho diang ga, ita li Rikus cengka paran hi Enu. Diki dakang keta hi Rikus selek kope, pisik-pisik ngo duat. Lako bolo mai mbaru di Enu.
Benta li Enu, “Ka’e, cenggo koeh di ta Ka’e.”
Toe lewang li Rikus. Olong lelo di’a ngger musi, itu po ngo one mbaru hitu hi Lipus.
“Nggo’op bo tegi daku ta Ka’e, cala nganceng campe lite koe Keraeng ho’o. Ai nais kin le Maumere hia. Rantang toe rapak koes wekin anak koe dami cepisa.”
Dantat pucu di Rikus ko, gerengt mbetar be peang nek. Maik kumet tu’ung keta liha. Toe ngaok. Mai taen canggu ngengur, pepas keta, “Asi ta Enu, rantang keta aku e. Rantang Keraeng ho’o agu rantang keta ndekok aku e.”
Mai wale di Enu, “Ta Ka’e, co’o tara rantang laing lite e. Ai bom ata ngoeng ru dite. Ata tegi laku pa.”
Senang di buta hoo geee….tambang keta mberes bengkesn ga. Huwis kin ga. hehehe….
Woko nggitu reweng di Enu ge, ina nggitu kole bengkes di Rikus. Mai tae di Rikus, “Eng Enu, maram nggitu gi. Manga kaut mai ce’e aku pu’ung wie ho’o tong.”
“Delek ta Ka,e.” Nggitu wantil di Enu canggu imus.
Itu kali pu’ung wie hitu hi Rikus mai ce’e mbaru di Enu. Toko cama agu hia one lo’ang dise. Sibuk keta hi Rikus ga, campe dedek kut pande rapak taungs liha sangged menang ata perlun one weki de anak hitu one tuka di Enu.
Lorong tegi di Enu, hi Rikus lete 2 wie wa mai toko cama agu hi Enu, kut campe hia boto toe rapak sangged wekid anak hitu one tuka.
Remon wa ge, loas hi Enu ga. Ata rona. Reba di’a. Senang keta nain. Lelo liha manga taungs one wekin hi Lalong.
Rapak du ca leso ga, kango le eman hi Lalong, taen, “Nanaaaa…ita hau laku. Ita hau laku….?”
Tawa winan reges keta, “Ema Lalong, co’o tara ngggitun kango dite? Toe ita hau laku, ita aku le hau?”
“Ham ga. Nuk daku nggitu ata di’an.” Itu kali celu kangon ga, “Lalong, ite hau laku, e, ita aku le hau? Ita aku le hau”?
Reme di’an kango nggitun hae kilon hi Enu, mai-mai taen ga, “Oe Nana, mata keta bamboh, bot kango hi Lalong, toe nuk gauk nau data baling mbaru. Nawa nggalas data cama natas.
Mai tae de ronan, “Nuk gauk nau diong?”
Itu kali madis tombo li Enu, “Lelo, Ema Lalong, du ngo lako de meu one pisa, hi Ka’e mbaru bolo mai ite hio, saleng mai campe itey, ca wulang muing. Kut dedek tilu, wiwir agu isung di Nana. Sua wie kaut wa mai kole hia. Mai kaut kut hituy, poli hitu ga kole. Ngo toko lau mbaru run. Eme toe hia, lawang toe manga ite Ema Lalong ae, am toe manga wiwir ko tilun hi Nana dite.”
Denge kaut tombo hitu ronan ko, rabo mese keta. Jaka sa’in. Dila keta. Gelang emi semambu. Lampuk lau mbaru di Rikus. Toe rempe-rempe mbaut tu’ung liha hi Rikus. Toe keta sokor cipa li Rikus semambu hitu. Sebek tu’ung one wekid di Rikus.
Di’an kali ga, gelang losi hi Rikus. Reme nggitun ga, caig lawa do. Gelang pampang. Ngaok mese one beo hitu ga.
Og de kawe lata tu’a laing one beo hitu. Co ko co’o cemoln ga, toe pecing laku. Gereng kaut ca leson po ngo rei laku Tu’a Golo ata cacan mbolot hitu. Delek eme gelang ite ata baen.