Cengata ata tua rona one ca beo. Reme keta di’an lonto jojop bolo mai mbaru, tatap natas ata ringi rangas wajol da’atn walis du kole duat mane tana, itu wan caid meka salang. Tadang mai. Nanang cenggo tegi toko one mbaru wajol mane tana ga.
Benet keta nain. Enam liha ngger eta lobo, ita roto kanang situ eta. Taungs bokong ga. Curup wa nain ga, teing hang apas laku meka so’o wie ho’o tong.
Og de mangan saok bantang agu hae kilon sili dapur. Pio-pio. Boto denge le meka.
“Weta, manga meka so le. Ata lako salang tadang. Tegi toko ce’es.” Nggitu tombod data tua ema agu hae kilon.
“De … Nara, teing hang apas lite meka situ tong. Dea toe weang. Latung taungs ga. Tete koe taki ce’en toe weleng. Tadan te manga ca o ca dite ho’o.” Nggitu tilir de hae kilon.
Mai wantil data tua ema, “Weta, asi simpung, aku ngo tuda lau Kraeng Tua. Ai hia ata laseng manga na’an.”
“Eng maram nggitu ga, gelang koe kali Ite ngod boto ngacek hang wie ise lau. Tuda dungka dea kaut ga. Ai eme tuda woja tite, du nia di sokor tukn to’ong.” Nggitu wantil de hae kilon.
“Eng, ma’u co mole di. Lelo, pande gerak ranga di wie ho’o to’ong. Neka tombos cokol, neka turas tuda. Aku ngok ga. Ite weli ga teing wae di meka situ le. Am masa ketas bo ga. Cait lako tadang.” Nggitu tae data tua rona, canggu lakon.
Cai lau mbaru de Kraeng Tu’a, ketok para. Woko poli cengkan para ga, itu kali segol tabe data tu’a rona, “Tabe o Ite. Nia ngaok?”
“Ho’okm. Mai ga.” Wale diset ngara mbaru.
“De, kali Ite bo e. Mai ge. Co’o tara lejong wiem keta.” Nggitu reis de Kraeng Tu’a ata lonto kin one molang canggu towol rongko.
“Ole Ite, toe di’an dami le mbaru. Reme keta tundu embong mose geong ka’eng one ke’ot du walis lewe ho’o rodo ocokn meka ata toko rontong. Co’oy di panden. Ma’ut weling’y ko?” Nggitu gosi data tu’a rona.
“Eng e bo hitun, toe manga salan Dite. Co’o weli betuan lejong Dite bo ga? Neka rabo Ite, nehot curu wenen keta rei daku.” Nggitu reweng de Kraeng Tu’a.
“Toe manga rabon ta Kraeng Tu’a. Ina kut toe beheng aku e. Delek kole laku woko rei nggitu aku asem Lite. Kut mai tuda dea Dite aku e. Jera de ase ine wai Dite. Ai toe manga weang ami le kut sila meka situt tombo daku bo.” Wale data tu’a rona.
“Nggitun bo ko. Eng e, aku rei kae ine wai Dite di.” Nggitu wale de Kraeng Tu’a canggu lako ngo sili dapur.
Kole bantang sili mai dapur Kraeng Tu’a ga. Itu kali pa’u rewengn kamping ata tu’a rona ata mai lejong, “Ase, mangay dea koe hio sili e, maik ca tongka kanangy.”
“Delek ta Tu’a. Emi nggituy e. Kut gerak koe rangag’m wie ho’o tong. Co’oy kalig ta Tu’a. Pangang gereng keta poli ako data so’op di po nganceng lekon lami dea Dite hitu. Tuda ka’ut lami dea hitu ga.” Nggitu tegi data tu’a rona.
Mai waled Kraeng Tu’a, “Eng ta Ite. Tombo agu ise ase daku le mbaru. Toe manga co’on e tama gerak keta ranga Dite wie ho’o. Lelo, dea koe hitu weli ga asi nuk Lite. Toe maleng tudan Lite. Hitu koe ling sabi ako koe dami one pisa.”
“De … Kraeng Tu’a, cembes keta laku senget reweng Dite hitu. Konem toe di teneng dea hitut teing Dite bo ga, becur muing tuka daku.” Nggitu wantil data tu’a rona.
“Hehehe … ta de, neka nggitu keta bail e. Ai bom hanang cengatan geong ho’o. Ite mane ho’o. Am aku diang ce sua.” Reweng de Kraeng Tu’a.
“Bo hitun e Tu’a. Wali di’a keta laku nai ngalis Dite agu ise ka’e ine wai ge Ite. Aku weli inggos’k di.” Nggitu tesi data tu’a rona canggu tiwid dea koen.
“Io … nggitu damang ga. Am gereng kid ise enu le mbaru. Di’a-di’ah ge. Neka rabo Ite bo ga, cait toe mbajik inung bo.”
Kali neho baon porong kin anak cucu di Kraeng Tu’a. Senget tombo dise agu ata tu’a rona le mai mbaru le.
Itu kali inggos main lonto ruis eman. Mai rei koen, “Ema, ngong apa tuda hitu bo?”
Wale le Kraeng Tu’a, “Tuda hitu ngong celong ko cokol paeng data. Maik tuda hitu lasengn ga eme celong woja ko latung. Nganceng kole celong dea. Laseng de gereng poli ako po lekos. Maik bekay de. Rapangn eme tuda ca tongka, poli ako ga leko ce roto ci’e ngong sua tongka.”
“Eme seng ge Ema, toe caro tuda?” Nggitu rei de anak cucu.
“Eng, eme celong seng toe laseng caro tudan. Laseng hitu ga cokol ko celong ngasangn.” Nggitu toing de Kraeng Tu’a.
Danung kole tombo de Kraeng Tu’a, “Dite hio bao toe de tuda. Bo tegi diha bo tuda moley dea hiot teing dite, maik asi tae daku. Hitu bo ga ata cimpa. Ngong ata tei bon kaut, sabi ako dite. Toe de leko lise ce pisa. Manga kaut leko le Morin kamping ite ce pisa.”
Mai toing de Kraeng Tu’a, “Nana, mose ho’o de toe nganceng jepek taung keta. Leso ho’o ise ata geong. Am ite diang ce sua. Itu tara nggo’on campe-campe tau.”
Ngetuk hiat cucu. Maik poli hitu ga wa tawa canggu rei, “Adong di Ema a, co’o lekon le Morin cepisa dea ca tongka hio ge? Ai bom Hia bo ata mai tudan dea hitu ga. Ko ata jera Diha ata tua rona hitu bo a?”
“Toe nggitu betuan ta Nana. Ngong nggo’o pe, manga teing berkak dite le Morin agu Ngaran. Teing dani woja dite wa sawa. Teing bekas ata na’ang agu pening dite pe’ang natas. Nggitu kole teing bolek loke baca tara. Hitu ngasang leko le Morin.” Nggitu curup de Kraeng Tu’a.
“Ham ge Ema. Idep laku ga.” Wantil de anak cucu.
Reme nggitun ga, denge’g lise benta di Ende sili mai dapur. Kut hang wie ga.
Itu kali hesen Kraeng Tu’a ga, ngo sili dapur. Witir agu lime dihat cucu. Cait nendep hitu silin.
Baca juga artikel terkait TOMBO-TOMBO atau tulisan menarik Maksi Mbangur lainnya.
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.