Du wulang lima agu wulang cepulu, sangged weki serani ata Katolik ngaji kontas. Lete ntaung. Mede main muing ga.
Du hitu poli muing pantil le ata pepak laing, leso apa ngaji neteng-neteng mbaru. Eme poli mbaru’d cengata wie ho’o, diang wie ga mbaru ce cupu mai. Hitu ngasang’n ngaji giliran.
Neteng wie pantil di’a. Cengatan cako ngaji. Cengatan cako dere. Nggitu kole ata bacang Surak Nggeluk, cengatan. Nganceng kole bacang cama-cama keta’y Surak Nggeluk hitut poli pilen.
Danong laseng cako agu wale ngaji kontas curup Manggarai. Pu’ung one tanda panggol. Nggitu kole ngaji Io Ema Dami agu Tabe O Maria. Dere kole curup Manggarai mole. Lelo one surak ko buku Dere Serani.
Laseng cako le guru gama de ngaji. Guru gama hitu ngong guru agama. Ai toe sanggen taung weki pecing cako ngaji.
Am bo pecing, maik ritak agu rantang jejer ai toe laseng pa. Mai nitu main de mangan cadel. Wiga tawa taung ata cemol’n.
Weki serani ga rengguk keta wale ngaji. Neka manga ata poli olo ngaji. Paka cama-cama keta. Nggitu kole dere.
Cengkalin-cengkalin manga kole ata pande roce laing du reme ngaji hitu.
Reme keta di’an tengguk taung sa’i gereng kut wale ngaji, rodo tuan kaut pecu data koe. Uuuuuukkk … runing’n.
De … lelo bo hiat ngara runing ga lemot kin. Toe noing le run runing uk hitu bo … hehehehe ….
Denge taung le weki situt reme mentuk ngaji. De … wan kaut tawa data toe nganceng ta’ong. Ita-ita tau tawan hitu. Cait woko tawa ata cepet mole tambang keta rocen ga. Ata tu’a mole manga ata tawa. Cewen keta ata koe. Maik manga kole ata ta’ong tu’ung. Toe tawa.
Ise situt ta’ong toe tawa de ga nggulak agu re’ing ise situt tawa.
Cewen keta kraeng guru gama ge ae … toe nggule kaut maik nggulak tu’ung keta. Nehot kut mbeter be peang’s mata anak’n … hehehe ….
Eme leng bail toe sepos ata koe situt tawa ga, mai guru gama nanek le buku Dere Serani. Manga kole ata peke le pemantik liha. Itu po lik’s tawad.
Bo woko ata calang wale ngaji Tabe O Maria, toe manga roce laing lise. Am wajol laseng ga.
Eme cako guru gama, “Tabe o Mari ata penong le widang Nggeluk. Mori Kraeng manga agu ite. Ite kali ata cewe don berkak one inewai agu berkak de Mori Yesus Wua tuka dite.”
Walen ga, ne nggo’o, “Maria Nggeluk, ende’d Mori Kraeng, ngaji koe latang te ami ata ndekok, te ho’on, agu du ami turung matag’m. Amen.”
Toe’g jepek ne nggitu walen ga, maik do ata koe ata nggo’o waled, “Maria Nggeluk, ende’d Mori Kraeng, ngaji koe latang tami ata ndekok te ho’on, anter matan. Amen.”
Uwa ho’o ga, toeg de le curup Manggarai du ngaji kontas ga. Melaju mole gi. Bo dere. Cengkalin-cengkalin emi one mai Dere Serani.
Wiga te ho’on ga eme cako ngaji curup Manggarai do ata toe pecing wale. Cewen keta ro’eng ko’e sot reme sekola’d.
Eme ata senget tu’ug keta lite wale ngaji melaju hitu manga kole ata salang be peang. Cewen keta eme du wale ngaji litani.
Eme ne ngo’o cakon le guru gama, “Santa Maria Bunda Allah.” Toe’g wale, “Doakanlah kami,” maik kawe emong kaut, “Doal kena dami.” Hehehehe ….
Eme poli ngaji ga, mbajik keta inung wae kolang. Pareng le tete ko muku teneng. Donde kole hang agu kokis.
Reme nggitun ga. Manga-manga kaut’s de tombo. Toe keta hemong tombo kupon.
Reme keta di’an tombo kupon situ bo ga. Rodo wan kaut reid cengata ata tua ende, “Enu nia peng apa de eman ata na’a lobo regek ho’o laku bo.” Hehehe ….
Raos tawa sangged weki situ. Wajol senget rei di ende.
Mai wale di ema. “Ta weta toe manga pedeng nitub apa daku e.” Hahahaha … tambang keta rame tawa ga. Ruda bekan tombo hitu ga.
Rame o … ae … toe manga nuk’d sangged mose kasi asi. Renceng keta lonto pedek. Lemot le rewo lonto leok.
Ca wie ge ngaji kontas one ca mbaru. Rapak du poli bacang Surak Nggeluk, mai rei dihat wewa kreba, “Anak-anak agu sangged ase kae. Nggitu kole weta. Eme ngaji tite one kilo koed, apa ata donde tegi dite kamping Morin agu Ngaran?”
Teti limen ce ngata ata tu’a ende. “Aku ite eme ngaji tegi agu gesar kamping Morin latang’t anak koe’g sot reme sekolad. Porong lobo watus koes.”
“Meu ge anak sekola, tegi apa eme ngajim?” Rei dihat wewa kreba.
Mai wale dihat cengata anak sekolah, “Aku tegi lulus. Tegi kut ngaceng cir laing sekola daku. Tegi kole laku porong neka koe betis ende agu ema daku.”
“Bo ranga dakun, eme ngaji kaku tegi keta ata reba sot di’a nai. Dia wintuk ata mai nanang aku. Porong neka koe katu ata rona ngonde. Ata rona maeng.” Nggitu ngaji data koe molas.
Woko denge wale data molas hitu bo renggas taung tawa sangged weki.
Mai tae de cengata ata tua ende, “Ta enu asi koe di hitu e. Nukung pande cemon di sekola’m.”
“Dakun kali ga. Aku olo nanang ciri DPRD deit. Tegi kamping Morin. Mori lobo watu koe daku bet agu bengkes ho’o. De … kali toe bone. Bo kaut oke seng lanar.” Nggitu wantil de cengatata tua ema.
Lik taung weki hitu. Ai bae lise tu’ung keta, mante deit kraeng hitu beheng nanang ciri DPRD. Lelo ngger one hia taung weki.
Danung kole tombon kraeng hitu, taen, “Maik ase kaen woko tenang laku, ae … am toe no’o salang daku teing le Morin. Itu taran nggo’on ngaji daku ga, Mori teing koe salang Lite latang’t aku kut nganceng kawe mose kaku te mose hae kilo agu sangge’d roeng sot katu Dite. Kali teing tu’ung le Morin. Ho’o aku ga manga uma duad ga.”
Itu kali olo-olo rei lihat wewa laing. Bo denge daku, manga ata nggo’on taen, ole sial leso ho’o e ite toe manga cumang ata beti. Oke bon lako daku leso hoo bo. Hitu reweng de kraeng manteri.
Denge tombo hitu tawa taungs sangged weki. Am nggo’o nuk dise, ole co’ob tara bengkes do ata betin mantri hitug ta de.
“Asa ite ge ende. Ai ite kole ca ata pantil kut lami agu pande ina ata beti.” Nggitu rei kamping iset perawat.
“Ae … dion dise danong. Dion dami te hoon ga. Bo dami, eme ngaji, toe manga cebanan. Ngaji pande gelang koe inad sangged iset beti situ. Agu porong neka pucu wokok koe sangged amit perawat.” Nggitu wale dise ende perawat.
De guru ga toe danga lewen koen ngajin. Tegi nai lewe agu lembak nai. Kut di’a nganceng toing agu titong roeng one sekola.
Woko cemol taung’s waled sangged weki serani ata mai ngaji wie hitu ga, itu kali olo-olo rei lata wewa kreba.
Ita laku neteng kota, cewen keta one ruis mbaru sakit. Manga ata pika peti latang’t ata mata. Ata ita diten, co’o keta eme ngaji iset pika peti situ? Tegi apas kamping Morin agu Ngaran?
Toe nesa waled sanggen weki situ. Wan tawa. Rame ketas tawad ga canggu lelo tau. Nais tawa hitu.
Ma’u toe nggo’o wa nai’d, eme tegi nahe do koes naud peti so’o, cama neho ata tegi, nahe do koes ata rowa. Itu tara toe kong walen. Tawa kaut.
Asa weli liten ase kaen ga. Co’o keta icin tegi diset pika peti situ eme ngajis?
EDITOR: Redaksi Krebadia.com
Maksimus Mbangur, S.Pd adalah seorang katekis. Pemerhati adat dan budaya Manggarai. Berpengalaman luas dalam bidang pendidikan, terutama dalam pengurusan sekolah menengah di wilayah Keuskupan Ruteng.
